Read Tedim Chin JEREMIAH 30 Bible Online

JEREMIAH 30 - Tedim Chin bible

JEREMIAH 30

¹TOPA in hong hopih a,

²“TOPA, Israel mite’ Pasian in kong genin-ah: Kong gensa thute khempeuh laibu khat sungah khum in.

³Bang hang hiam cih leh TOPA in kong cihin-ah, ka mi Israel le Judah-te a saltanna uh ka beisakkik ni a hong tung ding hi. A pu a pate uh tungah ka piaksa gamah ka tunpihkik ding a, amaute in tua gam a tangkik ding uh hi, TOPA in kong ci hi,” hong ci hi.

⁴Israel le Judah mite tawh kisai-in hih bangin a gen hi:

⁵“TOPA in kong cihin-ah: Launa le patauhna aw ka za a, lungnopna aw ka za kei hi.

⁶Tu-in ngaihsun dih un. Pasalte nau a suak ngei uh hiam? Tua ahihleh bang hangin pasal khempeuh in numei nausuak dingte bangin a tai uh hum ahi uh hiam? Bang hangin a mai uhah si teng lo ahi hiam?

⁷Nu e! Tua ni lianpi hong tung ding a, nidang tawh tehtheih ding hi lo hi. Jakob suante’ gimhun hi ding a, ahih hangin amaute suakta veve ding uh hi.

⁸“Vanglian TOPA in kong cihin-ah, tua ni ciangin amau’ ngawng panin a hakkolte uh ka kuaihtansak ding a, a khaute ka sutat ding hi. Amaute, gamdang mite’ salin a om nawn kei ding uh hi.

⁹TOPA, amau’ Pasian’ na ahi a, amaute’ kumpipa-in ka koih ding David’ na ahi zongin a semzaw ding uh hi.

¹⁰“Tua ahih manin TOPA in kong cihin-ah: Ka nasempa Jakob’ suante aw, lau kei un. Israel mite aw, patau kei un. Bang hang hiam cih leh gamlapi gam panin no kong honkhia ding a, na suan na khakte uh a saltanna uh panin ka honkhia ding hi. Jakob’ suante hong ciah ding uh a, nuamtakin a tengkik ding uh hi. Kuamah in amaute a lausak nawn kei ding hi.

¹¹Bang hang hiam cih leh TOPA in kong cihin-ah, a hong honkhia dingin note kong ompih hi. Note ka hong thehthangna gamte khempeuh ka susia ding a, ahih hangin note kong susia kei ding hi. A kilawm zahin kong thuhilh ding a, gim pia loin kong mawk nusiat kei ding hi.

¹²“Bang hang hiam cih leh TOPA in kong cihin-ah: Na liamma uh dam thei lo a, na meima uh nasia mahmah hi.

¹³Note a hong don ding kuamah om lo a, na liamma uh a’ ding zatui om lo a, note’ lungdamna ding bangmah om lo hi.

¹⁴Na lawm ngaihte un hong mangngilh khin uh a, hong don nawn lo uh hi. Bang hang hiam cih leh na khialhnate uh lian lua-in, na mawhnate uh nasia lua ahih manin, galte bangin note kong bawl a, nasia takin gim kong thuaksak hi.

¹⁵Bang hangin na sa-in kapkap na hi uh hiam? Na natna uh a dam thei ding hi lo hi. Na khialhnate uh lian lua-in, na mawhnate uh nasia lua ahih manin hih bangin note ka hong thuaksak hi.

¹⁶Tua ahih manin no hong thatte kithat ding a, na galte khempeuh uh salin kiman kik ding hi. No hong buluhte kibuluh ding a, no a hong mante, matin omzaw ding uh hi.

¹⁷Bang hang hiam cih leh TOPA in kong cihin-ah, na galte un note, pampaih mi pawl, hong ci-in, ‘Kuama don loh Zion na hi hi,’ hong cih uh hangin note kong cidamsakkik ding a, na liammate uh ka damsak ding hi.

¹⁸“TOPA in kong cihin-ah: En un, keimah in Jakob suante’ bukte ka lamkik ding a, a tenna uh ka hehpih ding hi. Khuapi zong a omnasa mualtung mahah kilamkik ding a, kumpipa’ inn zong a omnasa mahah omkik ding hi.

¹⁹Tuate sung panin lungdamna la kisa ding a, gualnopna aw kiza ding hi. Amaute ka pungsak ding a, tawmkha bek hi lo ding uh hi. Amaute ka kipahtawisak ding a, ka neusak kei ding hi.

²⁰A tate uh nidang bangmahin a omkik ding uh a, a mite uh zong kiptakin ka mai-ah ka phut ding a, amau a bawlsiate gim ka pia ding hi.

²¹A kumpi ding uh amaute khat mah hi ding a, amaute a uk ding amau’ sung mah panin a piang ding hi. Keimah in amah ka kai ding a, kei kiangah amah hong pai ding hi. Tua hikeileh ama thu-in kei a hong zuan ngam ding kua om ahi hiam, TOPA in kong ci hi.

²²Tua ciangin note, ka mite na hi ding uh a, kei pen note’ Pasian ka hi ding hi,” a ci hi.

²³En un, TOPA’ huihpi nung! A hehna hong kinuai nainai-in hong paikhia ta a, migilo pa’ lutang hong kidenna ding hi.

²⁴A lungsim sunga a tupna teng a tangtunsak matengin, TOPA’ hehna a lauhuaipi kilehkik lo ding hi. Hong pai ding hunte-ah note in na telzaw semsem ding uh hi.