Read Tedim Chin JEREMIAH 31 Bible Online

JEREMIAH 31 - Tedim Chin bible

JEREMIAH 31

¹“TOPA in kong cihin-ah, tua hun ciangin kei pen Israel mi khempeuhte’ Pasian ka hi ding a, amaute pen keima mite ahi ding uh hi,” a ci hi.

²TOPA in hong genin-ah: “Namsau tawh thahna a thuak lote in gamlakah hehpihna a mu ding uh hi. Israel mite in tawldamna ding a zon laitakun,

³gamlapi pek panin TOPA ka kilang hi. Keimah in nang kong it tawntung a, tua ahih manin nang’ tungah kong thuman tawntung hi.

⁴Aw, nungak siangtho Israel aw, nang kong bawlpha kik ding hi. Na khuangte na man kik ding a, a gualnuamte’ lamna-ah na va kihel ding hi.

⁵Samaria gam mualtung tengah leenggah na suankik ding a, huan bawlte in suanin a gah ne-in nuam a sa ding uh hi.

⁶Bang hang hiam cih leh Efraim mualtung panin galvilte in, ‘Tho un! TOPA i Pasian kiang Zion khua-ah va pai ni,’ ci-in a hong kiko hun uh hong tung ding hi,” hong ci hi.

⁷Bang hang hiam cih leh TOPA in kong cihin-ah, “Jakob a dingin lungdamna tawh ngaih takin la sa unla, gam khempeuh lakah gam lian pen a dingin kiko-in awng un. ‘TOPA in Israel mi a omlaite, ama mite hong honkhia khinzo hi,’ ci-in taangko unla phat un.

⁸En un, keimah in leilu lam gam panin amaute ka la ding a, leitung a gamla pen mun panin ka kaikhawm ding hi. Mittawte le khebaite zong hong kihel ding uh a, nupi gaite le nausuak ding numeite a kipan hih lai munah mihonpi hong ciahkik ding uh hi.

⁹Amaute a kap kawmin hong pai ding uh a, keimah in hehnemin amaute ka pi kik ding hi. Tui omna lui gei-ah amaute ka paipihkik ding a, lam nuamah paipihin a tuk kei ding uh hi. Bang hang hiam cih leh Israel mite’ pa ka hi a, Efraim, ka ta upa pen ahi hi.

¹⁰“Aw, gamdangte aw, TOPA’ kammal ngai unla, gamlapi, tuipi gei-a omte kiangah va gensawn un. ‘Israel mite a kithehthang sakpa in kaikhawm kik ding a, tuucingpa in a tuute a kep bangin a kem ding hi,’ va ci un.

¹¹Bang hang hiam cih leh TOPA in Jakob ka suaktasak khinzo a, a zawhzawh loh khutte’ sung pan ka honkhiazo hi.

¹²Amaute hong pai-in Zion mual tungah ngaihtakin la sa ding uh a, TOPA’ hehpihna ahi, buh, leenggahzu, sathau le tuuno, bawngnote’ hangin amaute a lungdam mahmah ding uh hi. A nuntakna uh, tui a kibuak huan bang ding a, lungkham nawn lo ding uh hi.

¹³Tua ciangin nungakte lamin lungdam ding uh a, tangvalte le papite zong nuam ding uh hi. Amau’ kahnate lungdamna ka suaksak ding a, amaute hehpihin a dahnate uh kipahna ka suaksak ding hi.

¹⁴An lim pen tawh siampite ka vak ding a, keima hoihna hangin ka mite a lungkim ding uh hi, TOPA in ka ci hi,” a ci hi.

¹⁵TOPA in kong cihin-ah: “Ramah khua-ah aw khat kiza a, tauna le kah ngutngutna awging ahi hi. Rachel, a tate a dingin a kap hi. A tate om nawn lo ahih manin kinem zo lo hi,” a ci hi.

¹⁶TOPA in kong cihin-ah: “Kap nawn kei unla, na khitui uh nul un. Bang hang hiam cih leh TOPA in kong cihin-ah, na nasep thaman uh na ngah uh hi. Amaute galte’ gam panin hong ciahkik ding uh hi.

¹⁷Na mailam uh a dingin lametna a om hi, TOPA in kong ci hi. Na tate uh zong na gam mah uhah hong ciahkik ding uh hi.

¹⁸Efraim’ kahna aw ka zazo a, ‘TOPA aw, bawngtal sin loh bangin kei nong thuhilh khinzo hi. Kong ciahkik theih nadingin hong lakik in; bang hang hiam cih leh nang pen TOPA ka Pasian na hi hi.

¹⁹Nangma kiang panin ka paikhiat khit phetin ka kisikkik a, nong thuhilh khit ciangin dahin ka kun hi. Ka neu laitak a ka minsiatna teng pua niloh ka hih manin maizumin ka lung-am hi,’ a ci hi.

²⁰“Efraim, ka it ka tapa hi lo ahi hiam? Amah keima ngaihno hi lo ahi hiam? Bang hang hiam cih leh ama thu ka gen simin amah ka phawk lailai hi. Tua ahih manin amah ka ngaihsun tawntung a, ka hehpih taktak ding hi, TOPA in ka ci hi.

²¹Lampi-ah ciamtehnate bawl unla, lamlahnate phut un. Na paikhiatna uh lampi mah limtakin zongkik un. Nungak siangtho tawh a kibang Israel mite aw, hong kilehkik unla, na khuapite uh hong zuankik un.

²²Bang tanvei lungka ding na hi hiam, a zulhzau ka tanu aw. Bang hang hiam cih leh TOPA in leitungah na thak khat bawl a, numei in pasal a honzo hi,” a ci hi.

²³Vanglian TOPA, Israel mite’ Pasian in hong genin-ah: “Keimah in amaute a gam uhah ka omsakkik ciangin, Judah gam le a khuapite uhah amaute in, ‘Thuman thutak a tenna mual siangtho aw, TOPA in thupha hong pia ta hen,’ ci-in a genkik leuleu ding uh hi.

²⁴Judah gam le a khuapite sungah lokhote le tuucing a a vak kawikawi mite a tengkhawm ding uh hi.

²⁵Bang hang hiam cih leh a gim mite ka tawldamsak ding a, gilkialin a thazawm mite khempeuh an ka vak kham ding hi,” a ci hi.

²⁶Tua khit ciangin ka khanglo a, ka khuadak hi. Ka khanlawh nuam ka sa mahmah hi.

²⁷TOPA in kong cihin-ah, “Israel gam le Judah gam, mihing le ganhing tawh ka dimsak hun hong tung ding hi.

²⁸Amaute a kibetkhiatna ding le a kitapzanna ding ahi zongin, a kisuankhiatna ding le a kisiatna ding ahi zongin ka vaihawm mah bangin, TOPA in ka cihin-ah, amaute a kilamna ding le a kiphuh nadingin ka vaihawm ding hi.

²⁹Tua ni ciangin amaute in: “‘Pate in leenggah thuk ne uh a, a tate uh’ ha a kim hi,’ a kici paunak a zang nawn kei ding uh hi.

³⁰Mi khempeuh amau’ mawhna ciat uh hang bekin a si ding uh hi. Leenggah thuk a nete’ ha bek a kim ding hi.

³¹“En un, TOPA in kong cihin-ah, Israel minamte le Judah minamte tawh thuciamna thak khat ka bawl ni hun hong tung ding hi.

³²Tua pen, a pu a pate uh, Egypt gam panin ka lakkhiat nadingin a khut uh tawh ka kaihkhiat huna ka bawl uh thuciamna tawh kibang lo ding hi. Tua hun lai-in kei amaute’ pasal hinapi-in ka thuciamna a hong palsat uh hi, TOPA in kong ci hi.

³³Ahih hangin TOPA in kong cihin-ah, tua hun hong tun ciangin Israel minamte tawh hih bangin thuciamna ka bawl ding hi: Amaute’ sungah ka thukham ka koih ding a, amaute’ lungtang tungah ka gelh ding hi. Kei pen amaute’ Pasian ka hi ding a, amaute pen keima mite ahi ding uh hi.

³⁴Kuamah in midangte le a sanggamte uh kiangah, ‘TOPA thei in,’ ci-in a kihilh nawn kei ding uh hi; bang hang hiam cih leh TOPA in kong cihin-ah, amaute in a neupen panin a lianpen dongin, a vekpi-un kei a hong thei ding uh hi. Bang hang hiam cih leh amau’ khialhnate ka maisak ding a, amaute’ mawhnate zong phawkin ka nei nawn kei ding hi,” a ci hi.

³⁵TOPA in sun-a khuavak dingin ni hong pia a, zan a khuavak dingin a kikheel ngei lo kha le aksite hong pia hi. Tuipi a lawh ciangin tuihualte ging zuazua a, ama min pen Vanglian TOPA kici hi.

³⁶Amah in, “TOPA in kong cihin-ah, hih a kip mahmah leitung le vantung ngeinate a kikheel hun ciang bekin, Israel mite’ suanlekhakte in gam nei loin a om pan bek ding uh hi,” a ci hi.

³⁷TOPA in hong genin-ah, “Vantung a kiteh theih ciang le leinuai-a leitung bulpite a kivel theih ciang bekin Israel-te’ suanlekhakte khempeuh a mawhna uh hangin ka lawnkhiamang pan ding hi, TOPA in kong ci hi,” a ci hi.

³⁸TOPA in kong cihin-ah, “Hananel Tausangpi panin khuakulh Kiu Kongpi dongin khuapi a kibawlphat hun hong tung ding hi.

³⁹Tua lai panin khuapi huang dingin nitumna lamah Gareb mual dong kiteh suak ding a, Goah lamah a kihei ding hi.

⁴⁰Misi luanghawmte le vutte a kibuakna kuam buppi le Kidron lui phak ma-a loteng khempeuh tawh, tua panin nisuahna lama Sakol Kongpi kiu ciang dong, TOPA a dingin mun siangtho a suak ding hi. Cikmah ciangin tua khuapi kisusia nawn lo ding a, a kisuankhia ngei nawn kei ding hi,” a ci hi.