Read Tedim Chin JEREMIAH 4 Bible Online

JEREMIAH 4 - Tedim Chin bible

JEREMIAH 4

¹TOPA in, “Israel mite aw, na kilehkik nop uhleh kei kiangah hong kilehkik un. Na kihhuainate uh kei kiang pan na paihkhiat uh a, na tai kawikawi kei uh a,

²‘TOPA a nuntak bangin,’ ci-in, thuman tak, kiptak, thutang takin thu na ciam nak-uhleh gam khempeuh in thupha ka piak ding hong ngen ding uh a, kei’ sungah amaute a lungdam ding uh hi,” a ci hi.

³Judah gammite le Jerusalem khuamite tungah TOPA in hih bangin ci hi: “Na lote uh kal unla, ling lakah khai vawh kei un.

⁴Judah mite le Jerusalem khuamite aw, TOPA’ thu zui unla, lungsim takpi tawh zui un. Na tuacih kei uhleh na bawl uh mawhnate hangin ka hehna mei bangin hong kuangkhia ding a, a phelhzo kuamah om lo ding hi,” a ci hi.

⁵Judah gamah va gen unla, Jerusalem khua-ah va taangko un. Gam sung khempeuhah peengkul mutin awng unla, va gen un. Hong kikhawm unla khuapi muanhuaite sungah va bu ni, va ci un.

⁶Zion paina lampi kihilh unla, na suahtak nadingun tai un; zekai kei un. Bang hang hiam cih leh leilu lam panin siatna lianpi ka hong puaksuk hi.

⁷Humpinelkai khat a bukna sawlkawm panin hong kuankhiazo a, gamte a susia ding pa hong paikhiazo hi. Na gam uh a kisiasak ding le na khuapite uhah kuamah a ten loh nadingin a susia dingin ama omna panin hong kuankhia khinzo hi.

⁸Tua ahih manin puanhampi silhin tau-in kap un. Bang hang hiam cih leh TOPA’ hehna lauhuaipi eite’ kiang panin kiheikhia nai lo hi.

⁹TOPA in, “Tua ni ciangin kumpipa le kumpi uliante lungkia ding uh a, siampite lau mahmahin, kamsangte dipkua ding uh hi,” a ci hi.

¹⁰Tua ciangin keimah in, “Ah, Topa PASIAN aw, nangmah in hih mite le Jerusalem khuamite khem cih takin na khem khinzo hi. Bang hang hiam cih leh amau kiangah, ‘Nopna hong om ding hi,’ ci napi-in, amau a sunlum dingin namsau khat a om gige hi,” ka ci hi.

¹¹Tua hun ciangin hih mite le Jerusalem khua mite kiangah, “A sa mahmah huih, sehnel gam a sang mun panin ka mite tungah hong nung ding a, tua huih pen anvaite a zapsiang dingin a nung huih bang hi lo hi.

¹²Ka sawl huih pen tua bang dingin hat lua ding hi. Tu-in TOPA in amaute tungah thu khenin a gen hi,” kici ding hi.

¹³En un, meii bangin i gal pa hong pai a, a sakol leengte pingpei tawh kibang a, a sakolte muvanlai sangin manlang zaw hi. Gimna i thuak ding hi; bang hang hiam cih leh gal lel ding ihi ta hi.

¹⁴Jerusalem khua aw, nang hong kihotkhiat nadingin na lungsim sung panin gitlohna sawpkhia in. Na sungah gitlohna lungsim bang tanvei kemcip ding na hi hiam?

¹⁵Ngai un; Dan gam panin aw khat hong ging a, Efraim Mual panin kisiatna ding thu hong kitaangko hi.

¹⁶Minamte kiangah va gen unla, Jerusalem kiangah va taangko un. “Gamlapi panin mite hong pai uh a, Judah gam khuapite langpangin hong kiko uh hi.

¹⁷Judah gam in kei hong langpan’ ahih manin lohongte bangin a galte in a kimkotah a pang dimdiam uh hi, TOPA in kong ci hi.

¹⁸Na lungsim le na gamtatnate’ hangin nang’ tungah hih thu hong tung hi. Hih pen nangma gitlohna hang hi a, na lungtang pailetin hong sun hi,” a ci hi.

¹⁹Aw, ka lungtang, ka lungtang! Na ka sa mahmah hi. Ka lungtang kisai vanvan a, ka om hithiat thei kei hi; bang hang hiam cih leh peengkul mutna aw, gal kisimna aw ka za hi.

²⁰Siatna khat khit ciangin adang khat hong tung a, gam sung khempeuh kisia khinta hi. Thakhat thu-in ka bukte hong kisuksiatsak a, ka puankhaite kikekgawp hi.

²¹Bang tanvei galkisimna mu lai ding ka hi hiam? Bang tanvei peengkul aw za lai ding ka hi hiam?

²²TOPA in, “Ka mite hai uh a, kei hong thei lo uh hi. Naupang haite bang uh a, bangmah thei lo uh hi. A sia bawl ding lamsang siam bek uh hi. A hoih bangmah bawl thei lo uh hi,” a ci hi.

²³Leitung ka et leh limlemel nei lo a, vantungah zong khuavak om lo hi.

²⁴Mualte ka et leh kiling damdam uh a, mual neute kileh kawikawi uh hi.

²⁵Ka khuadak leh mi khat beek ka mu kei a, vana vasate zong a leengmang khin uh hi.

²⁶Ka et leh, logam leihoih teng sehnel gam suakkhin a, TOPA’ mai, a hehna lianpi mai-ah, khuapi khempeuh kisia khin uh hi.

²⁷Bang hang hiam cih leh TOPA in, “Gam buppi, gamlak suak ding a, ahih hangin ka susia sam kei ding hi.

²⁸Tua thu hangin leitung kap ding a, vantung mial ding hi. Bang hang hiam cih leh ka gensa, ka khensatsa hi a, ka kisik loh bangin ka lungsim zong ka kheelkik kei ding hi,” a ci hi.

²⁹Sakol tunga tuangte le thal tawite’ aw a kizak ciangin mi khempeuh galtai mang uh a, gamlakah tai-in suang lakah a kahto uh hi. Khuapi khempeuh kinusia khin a, kuamah teng nawn lo hi.

³⁰Jerusalem khuapi aw, a siacip ding na hita hi. Puansan silhin kham tawh na kizep liatluat hangin, na mitte zemin na golsak hangin, a mawkna-in a kizem na hita hi. Na lawm ngaihte in nang hong nusia ta uh a, tu-in hong that nuam ta uh hi.

³¹Nau a suak ding numei a kiko bang khat ka za a, tacil a suak numei’ tauna tawh kibang hi. Zion’ tanu husam liangin a kikona aw na hi a, a khut tegel zakin, “Gimna ka thuak ding hi. Kei hong that ding uh hi,” a ci hi.