Read Tedim Chin JEREMIAH 49 Bible Online

JEREMIAH 49 - Tedim Chin bible

JEREMIAH 49

¹Ammon mite tawh kisai-in TOPA in a genin-ah: “Israel mite in tapa nei lo ahi uh hiam? Innluah ding nei lo ahi uh hiam? Bang hangin Milkom pasian biate in Gad gam la-in a khuapite sungah teng ahi uh hiam?

²Tua ahih manin, TOPA in kong cihin-ah, Ammon gam Rabbah khua kisimin, galdona aw a kizak hun ka tungsak ding hi. Tua khuapi kisusiamang ding a, a khuaneute a kihaltum ding hi. Tua ciangin TOPA in kong cihin-ah, Israel mite in a gam uh a laksakte’ kiang panin a gam uh a ngahkik ding uh hi.

³Heshbon khuamite aw, kap un! Ai khua kisia khinta! Rabbah khua numeite aw, kap un! Puanhampi silh unla kap un. Khua lakah lung-amin kawi taitai un. Bang hang hiam cih leh na Milkom pasian uh le a siampite le a uliante hong kilak khiatsak ding hi.

⁴A citak lo mite aw, bang hangin na hatna uh kisaktheihpih na hi uh hiam? ‘Kua in eite hong simzo ding ahi hiam?’ ci-in bang hangin na hauhna uh suang na hi uh hiam?

⁵Vanglian Topa PASIAN in kong genin-ah, na kiim na pamte uh kiang panin note tungah gimna kong tungsak ding hi. Note hong kihawlkhia ding a, mi khempeuh amau tum ciatin taikeek ding uh a, a hong kaikhawm kik ding kuamah om lo ding hi.

⁶“Ahih hangin TOPA in kong cihin-ah, nidang ciangin Ammon mite a ngei bangsakin ka hausakkik ding hi,” a ci hi.

⁷Edom gam tawh kisai-in Vanglian TOPA in a genin-ah: “Teman gamah a pil om nawn lo ahi hiam? Thu ngaihsut siamte in ngaihsun thei nawn loin a pilna uh beita ahi hiam?

⁸Dedan gamah a tengte aw, kihei unla galtai un; guam sungah bu un. Bang hang hiam cih leh gim ka piak ni ciangin Esau’ suanlekhakte tungah siatna ka tungsak ding hi.

⁹Mite in leenggah a lawh uh ciangin a gui tungah tawm a nusia lai uh hi. Zanin gutate in na a guk uh ciangin a deih teng bek uh a gu uh hi.

¹⁰Ahih hangin Esau’ suanlekhakte khempeuh ka guaksuaksak a, a bukna munte uh ka kilangkhia sak hi. Tua ahih manin a bu thei nawn kei uh hi. A tate uh, a sanggamte uh, le a vengte uh si khin uh a, khat beek a suakta kei hi.

¹¹A tagah na tate uh ka kiangah hong koih un; ke’n amaute ka kem ding hi. Na meigong numeite uh zong kei hong muangsak un.

¹²“Bang hang hiam cih leh TOPA in kong cihin-ah: Gim a thuak dingin a kilawm lo mite nangawn in thuak veve uh ahihleh note in zong thuak loin om ding na hi uh hiam? Note in gim thuak loin na om kei ding uh a, na thuak veve ding uh hi.

¹³Bang hang hiam cih leh TOPA in kong cihin-ah, Bozrah khua pen mite’ lipkhap ding, zahpih ding, nusiat ding le kihamsiatna-in a zat ding uh a suak ding hi,” a ci hi.

¹⁴TOPA kiang pan thu ka za a, gam khempeuhah thugen dingin mi khat kisawl hi: “Hong kikaikhawm unla, Edom gam a sim dingin hong kithawi un.

¹⁵Bang hang hiam cih leh keimah in gamdangte sangin nang hong neusak zaw-in mite kong simmawhsak ding hi.

¹⁶Na kisaktheihna in nang hong khem a, na ngaihsut bangin mite in nang hong kihta lo hi. Suangkeen dawnah na teng a, mualsang tungah na teng hi. Muvanlai bu zahin sangpi-in na ten hangin tua lai mun panin kong lakhiasuk veve ding hi, TOPA in kong ci hi.

¹⁷“Edom gam pen a mulkimhuai gam suak ding a, a kantan mi khempeuh in a siatgawpna hangin lamdangsa-in a mulkim ding uh hi.

¹⁸TOPA in kong cihin-ah, Sodom khua, Gomorrah khua, le a kiima khuate a kisiatgawp bangin, tua lai munah kuamah teng lo ding a, kuamah a peem kei ding hi.

¹⁹En un, lonona-ah nuamtakin a om tuute, Jordan gam tulak panin a hong paito humpinelkai in a delhmang bangin, a gam uh nusia-in thakhat thu-in ka taimangsak ding a, a gam uh a uk dingin ka deih peuhpeuh ka seh ding hi. Bang hang hiam cih leh kei bang mi kua om ahi hiam? Keima to ahi ding kua omlai ahi hiam?

²⁰Ka mai-ah kua kumpi hong ding ngam ding ahi hiam? Tua ahih manin Edom mite’ thuak ding le Teman gam a teng mite’ gim nadingin TOPA’ geelna le ngimnate ngai dih un. A ta ngeekte nangawn uh kikaikhia ding hi. Mi khempeuh lau taktak ding uh hi.

²¹A pukna uh gin’ ngaih lua ahih manin leitung a kiling ding hi. A kahna uh San Tuipi dongah kiza ding hi.

²²En un, muvanlai bangin manlang takin galte hong leengin Bozrah khua a sim dingin tua khua tungah a kha hong zal ding uh hi. Tua ni ciangin Edom galkapte pen nupi nausuak dingte bangin a lau ding uh hi,” a ci hi.

²³Damaskas khua tawh kisai-in Vanglian TOPA in a genin-ah: “Hamath khua le Arpad khuate in thusia za uh ahih manin lungmangin a om uh hi. Tuipi dai thei lo bangin a launa uh dai thei lo hi.

²⁴Damaskas khuamite thazaw mahmah uh a, a taimang dingin a kithawi uh hi. Lungkhamna, dahna, le launa in amaute lencip a, nupi nausuak ding bangin a om uh hi.

²⁵Tua khuapi minthang, lungdamna khuapi, tu-in kinusia ta!

²⁶Tua ahih manin Vanglian TOPA in kong cihin-ah, tua ni ciangin khuapi laizangah tangvalte si ding uh a, galkap khempeuh zong a kithat khin ding uh hi.

²⁷Damaskas khua kulhpi mei tawh kihal ding a, Benhadad kumpipa’ inn zong a kangtum ding hi,” a ci hi.

²⁸Babylon kumpipa Nebukhadnezzar in a zawh Kedar minamte le Hazor khua ukte tawh kisai-in TOPA in a cihin-ah: “Kisa un, Kedar mite va sim un! Nisuahna lamah a om amaute va thatlum un!

²⁹A puanbukte uh le a tuuhonte uh a kipan a buk kongkhak puante uh le a nate khempeuh uh kilaksak ding hi. A kalaohte uh kipaikhiatpih ding a, ‘Mun khempeuhah launa!’ ci-in a kiko ding uh hi.

³⁰“Hazor khua-ah a teng mi khempeuhte aw, TOPA in kong cihin-ah, gamlapi-ah taimang unla, guam thuk sungah bu un. Bang hang hiam cih leh Babylon kumpipa Nebukhadnezzar in note a hong langpang dingin geelna le ngimna a nei khinzo hi.

³¹Babylon kumpipa aw, tho in. Nuamtak, ngaihmuang takin a om gam va sim in. Tua khuapite in kongpi lah nei lo a, a kalhna sik tawn zong bangmah nei lo uh a, a tuaci ommawk uh ahi hi.

³²“A kalaohte uh kisuh khiatsak ding a, a bawnghonte uh kilaksakmang ding hi. A sam uh a mettom amaute mun khempeuhah ka kithehthangsak ding hi. Mun khempeuh panin amaute tungah siatna ka tungsak ding hi, TOPA in kong ci hi.

³³Hazor khua pen se-alte’ tenna suak ding a, a tawntungin a kisia den khua a suak ding hi. Kuamah teng lo ding a, tawmvei beek zong a va zin kei ding uh hi,” a ci hi.

³⁴Judah gamah Zedekiah kumpi a suah tungin Elam gam tawh kisai-in TOPA in kei tungah thu hong gen hi.

³⁵Vanglian TOPA in a cihin-ah: “En in, Elam gam’ hatna bulpi ahi a thalpite ka kuaitan ding hi.

³⁶Vantung mun li panin huihpi ka mutmangsak ding a, Elam gam panin ka hawlkhiatte mun khempeuhah kithehthang sakin a tun lohna uh gam khat beek ka omsak kei ding hi.

³⁷Amaute a that nuam, a galte uh mai-ah Elam mite ka lausak ding hi. Amaute ka thahsiang mateng namsau ka nungdelhsak ding hi.

³⁸TOPA in ka cihin-ah, Elam gamah a kumpipa uh le kumpi uliante thatin ka kumpi tokhom ka phut ding hi.

³⁹“Ahih hangin nidang ciangin Elam gam nidanga a ngei bangin omsakin ka hausakkik ding hi, TOPA in ka ci hi,” a hong ci hi.