Read Tedim Chin JEREMIAH 6 Bible Online

JEREMIAH 6 - Tedim Chin bible

JEREMIAH 6

¹Benjamin’ suante aw, na suahtak nadingun tai un. Jerusalem khua taisan un. Tekoa khua-ah peengkul tum unla, Bethlehem khua-ah theihsakna meikhu khusak un. Bang hang hiam cih leh leilu lam panin gimna leh siatna lianpi a hong pai ding hi.

²A melhoih, a ngeek dikdek Zion tanu ka susia ding hi.

³Kumpite, a galkapte uh tawh ama kiang hong tung ding uh a, a kimkotah giahphual satin a deih peuhpeuh uh a la ding uh hi.

⁴Amaute in, “Jerusalem khua a sim dingin kisa un. Tho un, sun ciangin i sim ding hi,” a ci ding uh hi. Ahih hangin amau mah in, “Citciat aw, zekai lua hang! Ni tum dektakta a, i liimte sau keei ta hi.

⁵Kithawi un, zan ciangin i sim ding a, a kumpi innte uh i susia ding hi,” a ci ding uh hi.

⁶Bang hang hiam cih leh Vanglian TOPA in, “A singte phuksak unla, Jerusalem khua sim nadingin phungin ciang un. Hih khuapi gim piak kul hi; bang hang hiam cih leh kinetniamna bekbek tawh a kidim hi.

⁷Tuikhuk panin tuiphul a tawlngak loh bangin, Jerusalem khua panin siatna tawlnga lo hi. Khua sungah ngongtatna le suksiatna ka za ngitnget a, cinatna le liamna bekbek ka mu hi.

⁸Jerusalem khuapi aw, kidawm in. Na kidop kei leh nang kong taisan ding a, kuama ten lohna gam simtham na suakkha ding hi,” a ci hi.

⁹Vanglian TOPA in kei hong hopih a, “Leenggah lo-ah a sangte a kilawh khit bangin Israel mi a omlai sunteng lo siang vet in,” hong ci hi.

¹⁰Keimah in ka dawng kik a, “Amaute in a zak theih dingun kua kiangah va gen ding ka hi hiam? En in, a bil uh bing a, khua za thei lo uh hi. TOPA’ thu simmawh uh a, lungdamna-in la lo uh hi.

¹¹Tua ahih ciangin TOPA aw, kei zong ka heh mahmah a, ka thuakzo nawn kei hi,” ka ci hi. Tua ciangin TOPA in kei hong hopih a, “Kei’ tang dinga na hehna kongzing lak a naupangte tungah buakhia inla, tangvalte’ kikhopna-ah zong buakhia in. Papite le nupite zong kilakhia ding a, piteek puteekte zong kipaikhiatpih ding hi.

¹²A innte uh midangte in luah ding uh a, a lote le a zite uh a taan ding uh hi. Bang hang hiam cih leh TOPA in kong cihin-ah, hih mite’ langkhatah ka khut zanin gim ka pia ding hi.

¹³Bang hang hiam cih leh a neupen pan a lianpen dongin, thuman lopi tawh sum zongin a huaiham uh hi. Kamsangte a kipan siampite dongin thuman lo khin uh hi.

¹⁴Amaute in ka mite’ thuaknate thupi simsak lo uh a, hoihna om keei lopi, ‘Hoih hi, hoih hi,’ ci mawkmawk uh hi.

¹⁵Hih a kihhuai nate a sep uh ciangin a maizum beek uh hiam? Maizum beek lo uh a, kisuangthei beek lo uh hi. Tua ahih manin a site’ lak mahah amaute zong si ding uh a, gim ka piak ni ciangin a kilawnkhia ding uh hi,” TOPA in hong ci hi.

¹⁶TOPA in mite tungah, “Lam kabomah ding unla khuadak un. Lam hoih ahi lampi luite dong unla tawn un. Tua hileh na tawldam ding uh hi,” a ci hi. Ahih hangin amaute in, “Ka tawn kei ding uh hi,” a ci uh hi.

¹⁷TOPA in, “Peengkul tumna awging a ngai dingin ‘Galvil ding mi ka koih hi,’ kong ci hi,” a ci hi. Ahih hangin amaute in, “Ka ngai kei ding uh hi,” a ci uh hi.

¹⁸Tua ahih manin TOPA in, “Gamdangte aw, ngai un. Mite aw, amau’ tungah bang tung ding hiam cih thei un.

¹⁹Leitung aw, ngai in! En un, hih mite tungah a thuak ding mahun a kilawm siatna ka tungsak ding hi. Bang hang hiam cih leh ka thu hong ngai lo uh a, ka thukhamte a nial uh hi.

²⁰Bang deihna tawh Sheba gam panin paknamtuite hong pai a, gamlapi panin sing namtuite hong tung ahi hiam? Na meihal biaknate uh ka sang thei kei a, nong biaknate uh deihhuai ka sa kei hi.

²¹Tua ahih manin TOPA in kong cihin-ah: En un, hih mite a puk nadingin a mai uhah suangtum ka koih ding a, pate le tate, inn vengte le lawmte pukin a si ding uh hi,” a ci hi.

²²TOPA in, “En un, leilu lam gam panin mi hong pai uh a, leimong gamla pen panin galsim dingin gam lian khat hong kithawithawi hi.

²³Thal le teipi tawi uh a, gilo mahmah uh a, hehpihna lungsim nei loin a husa uh tuipi ging tawh kibang hi. Jerusalem aw, sakol tungah amaute tuangin, nangmah a hong sim dingin a kithawi uh hi,” a ci hi.

²⁴Tua thu i za a, bangmah i cih thei kei hi. Lungkhamna in hong lencip a, nupi nausuak ding bangin na i sa hi.

²⁵Gamlakah paikhia kei unla, lampi-ah zong pai dah un. Bang hang hiam cih leh i galte in namsau tawi uh a, i kimkot khempeuh a lauhuai hi.

²⁶TOPA in, “Ka mite’ tanu aw, puanhampi silh inla, vut lakah kikhuk in. Tapa khat neihsun a si bangin kap vangvang in. Bang hang hiam cih leh a hong susia ding pa thakhatin hong tung ding hi.

²⁷Jeremiah aw, ka mite a ze-et dingin nang kong koih hi. Ze-et inla, a om dan uh thei in.

²⁸A vekpi-un kei hong langpan’ tentan uh a, zuauthu a gen kawikawi uh hi. Sumngo le sik bangin khauh mahmah uh a, a vekpi-un a siat gamtat khin uh hi.

²⁹Nakpi takin pum a kizap hangin a ekte tui thei lo a, luangkhia thei lo hi. Pum a kizapzap hangin a mawkna a suak hi. Bang hang hiam cih leh migilote omlai veve hi.

³⁰Amaute, a kideih lo ngun-ek kici ding hi. Bang hang hiam cih leh TOPA in, ‘Amaute ka deih kei hi,’” hong ci hi.