Read Tedim Chin KAH LA 1 Bible Online

KAH LA 1 - Tedim Chin bible

KAH LA 1

¹Khatvei lai-in mi a dimtakin a tenna Jerusalem khuapi bangzah takin gamdai ahi hiam? Leitung bup in a zahtak khuapi tu-in meigong tawh a kibang ta hi. Leitung a om khuapi khempeuhte’ lak panin a thupi pen khuapi tu-in salin a kiman khinzo hi.

²Amah zan khuavakin kap a, a khitui a biang tungah a tak kauhkauh hi. Amah a it ngeite khempeuh a hehnem ding khat beek a om nawn kei hi. A kipawlpihte khempeuh in amah khemin, tu-in a langpan’ khinta uh hi.

³Judah mite, a huh ding a nei lo silate bangin a inn panun kihawlkhia hi. Amaute gam dangah teng uh a, amau’ gam ding a om kei hi. Galte in umcih uh a, a suahtak theih nading uh lampi a om kei hi.

⁴Ni siangtho ni ciangin Pasian a bia dingin Biakinnpi-ah kuamah a pai nawn kei hi. Tua lai-a lasa numeite in gimna thuak uh a, siampite a tau uh hi. Khua kongpi-ah kuamah om nawn lo a, Jerusalem khuapi in gimna a thuak hi.

⁵A galte gualzo uh a, amaute a nuaisiah gawp uh hi. Mawhna tampi a neih manun, TOPA in tua bangin gimna a thuaksak hi. A mite khempeuh sila dingin a kipuakhia hi.

⁶Jerusalem a minthanna teng a maimang zota hi. A makaite uh, lonona mun mu loin a vak kawikawi, sabengte a muh ciangin tailahpi-in a tai teitei sazuk tawh kibang hi.

⁷Tu-in Jerusalem kisiazo ta a, nidanga a thupinate a nung phawkkik hi. Galte in a sim laitakin a huh ding khat beek a om kei hi. Guallel ahih manin a galte in a nuihsan uh hi.

⁸A minthanna teng a beita hi. A guaktangin om ahih manin a maizum hi. Thumin tau a, a zum manin a mai a hum hi. Jerusalem in mawhna lian bawl ahih manin a kihhuai mahmah hi.

⁹A kihhuaina teng kimukhia pah hinapi, gimna thuak ding ahihlam a awlmawh tuan kei hi. Tua ahih manin gimna a thuakna lian lua mahmah a, kuamah in a hehnem zo kei hi. A galte in zo ahih manin TOPA kiangah hehpihna a ngen hi.

¹⁰A galte in a neih a lam khempeuh a laksak khinmang hi. Biakinnpi sungah lut uh a, TOPA in Gentail-te a pai ding a phal lohna munah a lut uh a mu hi.

¹¹Amaute, a thum kawmsa-in annek zong dingin a paikhia uh hi. A nuntak theih nadingun a sum a pai uh tawh an a khek uh hi. Khuapi in, “Hong en in TOPA aw, ka thuakna teng hong mu in,” ci-in a kiko hi.

¹²A kiim a pamah a pai mi khempeuh kiangah, “Hong en in, kei’ thuak zahin gimna a thuak, TOPA in a heh laitakin a hong thuaksak gimna a thuak kei longal, midang kuamah om lo hi,” ci-in a kiko hi.

¹³Amah in vantung panin meikuang hong khiasuk a, ka sunglam a hong kang hi. Amah in thang hong siah a, awkin leilakah ka kipuk hi. Tua bangin natna ka thuak tawntung hi.

¹⁴Amah in ka mawhna khempeuh a vekpi-in ciamteh a, tuate henin lomkhat suahin ka ngawngzangah hong khih a, gik lua mahmah ahih manin ka taangzo peuhmah kei hi. TOPA in ka galte’ khut sungah hong pia ahih manin a cimawh ta ka hi hi.

¹⁵TOPA in ka galkap a thahat pente nuihsan lel a, amah in kei a hong sim ding, ka tangvalte a susia dingin galkap honpi a hong kuansak hi. Amah in ka nungakte leenggah gawizan bangin a hong gawizansak hi.

¹⁶Tua ahih manin ka mit pan khitui a dimletin a luang hi. Hong hehnem ding le a hong hanthawn ding kuamah om lo hi. Galte in hong zo khin a, ka mite a cimawh uh hi.

¹⁷Hong huh un, ci-in ka khut ka vanvan hangin kuamah in a hong huh nuam kei hi. TOPA in mun khempeuh panin galte hong paisak a, amaute in a kihhuai na khat bangin kei a hong gimneih uh hi.

¹⁸TOPA a thutang ahi hi. Bang hang hiam cih leh keimah in ama thu a mang lo ka hi hi. Mun khempeuhah a om mite aw, ka thugenna hong ngai un. Ka thuaknate hong mu dih un. Ka khangno numei le pasalte salin a kipuakhia hi.

¹⁹Ka kipawlpihte ka sapsap hangin a hong huh nuam kei uh hi. A nuntakna ding uh an a zonna lamun siampite le makaite kongzing lakah a si uh hi.

²⁰TOPA aw, ka thuaknate, ka lunggimnate hong en in. Ka mawhna hangin dah mahmah ka hih manin ka lungsim a kitam hi. Kongzing lakah kithahna om a, inn sungah zong sihna mah a om hi.

²¹Ka tauna hong ngai in; kei a hong hehnem ding kuamah dang om nawn lo hi. Gimna nong thuaksak manin ka galte lungdam lua uh hi. Na ni ciam ni hong tungsak inla, kei’ thuak bangin ka galte zong thuaksak in.

²²A gitlohna hangun amaute tungah thu khen in. Ka mawhna hangin gim nong piak mah bangin amaute zong gim pia in. Gimna ka thuak manin ka tautau a, ka lungsim a gim mahmah hi.