Read Tedim Chin EZEKIEL 10 Bible Online

EZEKIEL 10 - Tedim Chin bible

EZEKIEL 10

¹Tua ciangin kherub-te’ lu tung sanah a om a kuum ka et leh sapfaia suangmanpha tawh a kibawl kumpi tokhom bang pian khat, tua a kuum tungah a om hi.

²Tua ciangin Pasian in saihadial puan a silhpa kiangah, “Na khut dimin mei-am tawi inla, kherub nuai-a om leengpeite kikalah va om in. Tua ciangin khuapi tungah a mei-amte theh in,” ci-in a sawl hi. Kei zong ama pai ka en gige hi.

³Tua ciangin mipa a pai laitakin kherub-te pen biakinn leitaw lamah na ding uh a, biakinn tual sungnungteng dimin meiipi a kai hi.

⁴Kherub-te’ tung panin TOPA’ minthanna vang hong paikhia-in biakinn kongah va om hi. Tua ciangin biakinn sungah meiipi hong kai a, biakinn tualah TOPA’ minthanna vang taang zeizai hi.

⁵Kherub-te’ khazap ging pen biakinn tual puanung ciang dongah kiza a, Vanglian Pasian a pau ciangin a awging tawh kibang hi.

⁶Kherub-te’ nuai-a om leengpeite’ kikal panin mei a la dingin TOPA in saihadial puan silhpa a sawl ciangin, tua mipa zong va pai-in leengpei khat gei-ah a va ding hi.

⁷Tua ciangin kherub khat in a khut zanin amau’ kikal-a om meikhuk sawkin mei-am pawlkhat la a, saihadial puan a silhpa’ khut sungah a koih hi. Saihadial puan a silhpa zong tua mei-amte tawi-in a paikhia hi.

⁸Tua kherub-te in a kha nuai ciat uhah mihing khut tawh a kibang nei ciat uh hi.

⁹Tua kherub-te’ gei-ah leengpei khat ciat omin, tua leengpeite suangmanpha bangin tee hi.

¹⁰Tua leengpeite a pianzia kibang kim a, leengpei khat in a kikantanin pei dang khat ciat nei thuah uh hi.

¹¹Tua kherub-te a pai ciangin kihei kul loin a utna lam peuhpeuh uhah pai thei uh hi. A pai nading lam a nga a pei paina-ah adangte in zui-in kihei tuan lo uh hi.

¹²A leengpei kualte a pei kanna khaute le a pei buppi dimin mittang om hi.

¹³Hih leengpeite pen maang ka muh masakna sungate mah tawh a kibang ahi hi.

¹⁴Tua kherub-te in maitang li ciat nei uh hi. A maitang khatna bawngtal maitang, a nihna mihing maitang, a thumna humpinelkai maitang, a lina muvanlai maitang tawh kibang hi.

¹⁵Hih kherub-te pen Khebar Gun gei-a ka muh ganhingte mah ahi hi. Tua ciangin hih kherub-te leengto uh a,

¹⁶amau a kin uh ciangin a leengpeite in zong a zui uh hi. A leeng dingin a kha a zal uh ciangin zong leengpeite in zui lai uh hi.

¹⁷Kherub-te a khawl ciangin leengpeite khawl a, kherub-te a leen ciangin leengpeite in zong a zui uh hi. Bang hang hiam cih leh tua leengpeite pen kherub-te’ khutnuai-ah a om ahi uh hi.

¹⁸Tua ciangin biakinn kong panin TOPA’ minthanna vang paikhia-in kherub-te’ tung sanah va om hi.

¹⁹Tua bangin ka et laitakin kherub-te in zong a kha uh zalin leilak panin leengto uh a, leengpeite in zong a zui uh hi. Biakinn nisuahna lam kongpi-ah khawl uh a, amaute’ tung sanah Israel Pasian’ minthanna vang zong a khawl hi.

²⁰Hih kherub-te pen, Israel Pasian a kumpi tokhom tawh a pua, Khebar Gun gei-a ka muhte mah hi, ci-in ka thei hi.

²¹Amaute in maitang li, kha li, le a kha nuai ciat uhah mihing khut tawh a kibang khut nei ciat uh hi.

²²Amaute’ maitang pen Khebar Gun gei-a ka muhsa maitangte mah tawh kibang teekteek a, a pai uh ciangin a mailam ciat mahah tang takin a pai thei uh hi.