Read Tedim Chin EZEKIEL 12 Bible Online

EZEKIEL 12 - Tedim Chin bible

EZEKIEL 12

¹TOPA in kei kiangah thu hong gen a,

²“Mihing ahi Ezekiel aw, a lehdo thei mite lakah a teng na hi hi. Amaute in mit nei napi-in khua mu lo uh hi. Amaute pen a lehdo thei mite ahihna hang uh ahi hi.

³Ezekiel aw, tu-in galtai dingte’ gamtat bangin na van puak ding guang inla, suntangpi-in paikhia in. Na omna panin na paikhiatlam mi khempeuh musak in. A lehdo thei mi ahih tei hangun a thu theithei kha ding uh hi.

⁴Khuavak lai-in mite’ muhin salin a pai dingin na van guang inla, nitak ciangin salin a pai ding bangin na paikhiatna mite musak in.

⁵Tua bangin amaute in hong et laitakin na kawm sulet inla, tua vang panin na van lakhia in.

⁶Amaute’ muhin na van na liangko-ah kisuanto inla, na pai nading mun na muh theih loh nadingin na mit tunsa-in khuamial lakah paikhia in. Hih bangin na gamtatna pen Israel mite a dingin hilhkholhna khat hi ding hi,” a hong ci hi.

⁷Kei zong TOPA’ hong sawl bangin ka gamta hi. Galtaite’ hih ding bang teekin tua sunin ka van guangin, tua nitak khuamial ciangin ka khut tawh kawm ka sulet hi. Amaute’ muh mahin ka liangko-ah van kisuanin ka paikhia hi.

⁸A zingsang ciangin TOPA in kei kiangah thu hong gen a,

⁹“Mihing ahi Ezekiel aw, a lehdo thei Israel mite in na gamtatna thu nang hong dot uh ciangin,

¹⁰Topa PASIAN ahi keimah in amaute kiangah ka gen thu tu-in gen in. Tua thu pen Jerusalem khuasung a uk ulianpa le Jerusalem khua sungah a teng mi khempeuhte a’ ding ahi hi.

¹¹Na gamtatnasate pen amaute tungah a thupiang ding lahna lim ahihna thu gen in. Amaute pen a kiman, sal a suak ding mi ahi uh hi.

¹²Amaute a uk ulianpa in khuamial lakah a liangko-in ama van pua-in paikhia ding hi. Ama paikhiat nadingin amaute in kulh tawhvang sakin tua panin amah suakta ding hi. Amah in a mai humcip ding ahih manin a paina ding mun mu thei lo ding hi.

¹³Ama pai nading munah ka ngenthang ka zak ding a, amah awk ding hi. Tua ciangin Babylon khuapi-ah amah ka paipih ding a, a khuapi a mu lopi-in tua lai-ah a si ding hi.

¹⁴A ulianpihte, a thulamlakte, le amah a cingte, mun citengah ka thehthang ding a, amaute a that dingin namsau ka nungdelhsak ding hi.

¹⁵Minam dangte’ lak gam dangah amaute ka thehthang ciangin TOPA ka hihna thu amaute in hong phawk ding uh hi.

¹⁶Ahi zongin galsung, kialpi, le natna sung panin tawmkhat ka suaktasak ding a, minam dangte’ lakah a omna mun panun a gamtatnasate uh a muhdahhuaina phawkin, kei pen TOPA ka hihna thu hong thei ding uh hi,” a hong ci hi.

¹⁷TOPA in kei kiangah thu hong gen a,

¹⁸“Mihing ahi Ezekiel aw, lau mahmahna tawh a ling kawmsa-in an ne-in tui dawn in.

¹⁹Hih bangin na gamtatna pen, amaute’ gam a omlai ahi Jerusalem khuamite tungah Topa PASIAN’ thugenna ahihna thu va gen in. Amaute in launa linna tawh an ne-in tui dawn ding uh hi. Amau’ gam sungah a tengte a hoih gamtat khat beek om lo ahih manin, a gam sung uhah a om mi khempeuh kipai khiatpihmang ding hi.

²⁰Mihing a dimna khuapite kisusia ding a, gam sung khempeuh gamkhing suak ding hi. Tua ciangin TOPA ka hihna thu hong thei ding uh hi,” a hong ci hi.

²¹TOPA in kei tungah thu hong gen a,

²²“Mihing ahi Ezekiel aw, bang hangin, ‘Hun beibei a, genkholhnate a tung om lo hi,’ cih paunak pen Israel mite’ lakah zat belin kinei ahi hiam?

²³Tua ahih ciangin Topa PASIAN ahi keimah in tua thu tawh kisai-in ka thugenna amaute kiangah va gen in. Hih paunak ka beisakta ding a, Israel mite in genin a nei nawn kei ding uh hi. Tu-in a hun a naina le genkholhnate a manin a tunna ding thu amaute kiangah va gen in.

²⁴Israel mite lakah maangmuhna man lo ahi a, genkholhna man lo ahi zongin om nawn lo ding hi.

²⁵TOPA ahi keimah in amaute tungah thu ka gen ding a, ka gen bangin tung takpi ding hi. Tu-in zekai nawn lo ding hi. A lehdo thei mihingte aw, hih dingin ka gen bangin nomau’ nuntak sung mahmahin ka tungsak ding hi. Topa PASIAN ahi keimah in thu ka gen khinzo hi,” a hong ci hi.

²⁶TOPA in kei tungah thu hong gen leuleu a,

²⁷“Mihing ahi Ezekiel aw, na maangmuhnate le na thugen kholhnate pen mailam hun saupi ciangin a hong piang pan dingin Israel mite in ngaihsunkha uh hi.

²⁸Tua ahih ciangin Topa PASIAN ahi keima thugenna: ‘Zekai cih om nawn lo ding a, ka gensa bangin tung ding hi. Topa PASIAN ahi keimah in ka gen khinzo hi, ci hi,’ ci-in gen in,” a hong ci hi.