Read Tedim Chin EZEKIEL 13 Bible Online

EZEKIEL 13 - Tedim Chin bible

EZEKIEL 13

¹TOPA in kei tungah thu hong gen a,

²“Mihing ahi Ezekiel aw, Israel kamsangte mawhsakna gen in. ‘TOPA’ thugen ngai in,’ ci khemin amau’ lungsim bangin thu a gente’ tungah gen in.

³Topa PASIAN’ thugen hih bang ahi hi: Hih kamsang haite in gimna thuak ding uh hi. Amaute in amau’ lungsim bangin thu gentawmin, maangmu kineih uh hi.

⁴Israel mite aw, na kamsangte uh ahihleh innsia lakah a om ngiate tawh kibang uh hi.

⁵Amaute in kulh a kicipna munte cing lo uh a, a kicimte ciangkik lo uh ahih manin TOPA’ ni-in gal hong tun ciangin Israel-te hu zo lo ding uh hi.

⁶Amaute’ maangmuhnate zuaupi hi a, a thugen kholhnate uh zong zuauthu ahi hi. Keimah in amaute sawl lo napi-in amaute in, ‘TOPA in hih bangin ci hi,’ ci khem uh hi. Tua bang hinapi-in amaute’ thugente ka tunsak ding a lamen lai uh hi.

⁷Tua ahih manin amaute kiangah ka gen thu in: ‘Na maangmuhnate uh zuaupi hi a, na thugen kholhnate uh zuauthu ahi hi. Note kiangah keimah in thu hong gen lo napi-in keima gen bangin na gen uh hi,’ ka ci hi,” a hong ci hi.

⁸Tua ahih ciangin Topa PASIAN in amaute kiangah, “Na thugente uh zuaupi hi a, na maangmuhnate uh zuaupi ahi hi. Tua ahih manin note kong langpan’ hi.

⁹Zuauthu tawh maangmu kineihin, mite a khialh theih nadingin zuauthu a genkhol no kamsangte gim a hong pia ding ka hita hi. Ka mite a kikhop uh ciangin tuate lakah na kihel kei ding uh a, Israel mite’ min a kigelhna lakah note’ min kigelh lo ding hi. Na gam uhah na ciahkik ngei nawn kei ding uh hi. Tua ciangin Topa PASIAN ka hihna thu na hong thei ding uh hi.

¹⁰Bang hang hiam cih leh thu hoih lo napi-in hoih hi, ci khemin ka mite na makaih khial uh hi. Ka mite in kulh dingin suang a cian uh ciangin no kamsangte in a tungtham buan tawh na zut uh hi.

¹¹Tu-in na kulh zut uh kicim hi. Tu-in guahpi ka zusak ding a, gialpite in tua kulh kha-in huihpi hat in mutgawp ding hi.

¹²Tua bangin kulh a kicip ciangin na kulh zut uh bang phattuamna om ahi hiam, ci-in mite in hong dong ding uh hi.

¹³“Tua ahih manin Topa PASIAN ahi keima thugen in: Ka hehna tawh huihpi nungsakin, guahpi zusakin, gialpi kiasakin, tua kulhpi ka susia ding hi.

¹⁴A tungtham na zut uh kulh sukhamin, thehthangin, a bul dawksak ding a sawm ka hi hi. Tua bangin ka suksiat ciangin note a hong denglum ding hi. Tua ciangin TOPA ka hihna thu mi khempeuh in hong thei ding uh hi.

¹⁵Tua bangin kulh le tua kulh a zut note in ka hehna na thuak ding uh hi. Tua ciangin keimah in, ‘Tu-in kulh maimangta a, tua mah bangin kulh a zut mite -

¹⁶thu hoih lo napi-in thu hoih hi, ci-in Jerusalem a lungmuan nadingin thu a gen kamsangte zong bei khinta hi,’ ka ci ding hi. Topa PASIAN ahi keimah in hih thu ka gen hi,” a hong ci hi.

¹⁷Tua ciangin TOPA in, “Mihing ahi Ezekiel aw, na mite’ lakah a om, a thugen ding uh a phuaktawm numeite en in. Amaute’ gamtatna hangin mawhsakna thu gen inla,

¹⁸Topa PASIAN ahi keimah in amaute tungah ka gen thu hih bangin gen in: No numeite in gimna na thuak ding uh hi. Mi khempeuh in a khutah a bulh ding uhleh a lu tungah a khip ding uh aite na bawl uh a, tua nate in mite’ lungsim uk hi. Note’ phattuam nadingin sih nading le hinna ding vangliatna thu, ka mihingte tungah na zang nuam uh hi.

¹⁹Mangbuhham khut khat dim le anlum them tawmkhat na ngah theih nadingun ka mite’ mai-ah kei nong minsiasak uh hi. A si dingin a kilawm lopite na that nuam uh a, a hing dingin a kilawm lopite na hingsak nuam uh hi. Tua bangin ka mite tungah zuauthu genin, amaute in note’ thugen hong um uh hi.

²⁰“Topa PASIAN ahi keimah in ka gen thu in: Sihna le hinna ukna-in na zat uh na aite uh ka deih kei hi. Note’ khut panin tuate hong bawhkhiat sakin, ukcip dingin na hanciam uh mite ka khahkhia ding hi.

²¹Na ai khipte uh zong hong hawkkhiat sakin note’ khutsung panin ka mite ka suaktasak paisuak ding hi. Tua ciangin TOPA ka hihna thu na hong thei ding uh hi.

²²Keima gen hi lo napi-in na thuzuau genteng uh tawh mihoihte na lunggimsak uh a, migilote a sihtheih nadingun hong kihei loh nading lamah na lehhanthot zawsop uh hi.

²³Tua ahih ciangin tu-in na zuau maangmuhnate uh le mi lam a khialsak thei na thugen kholhnate uh beita ding hi. Note’ khutsung panin ka mite ka honkhia ta ding a, tua ciangin TOPA ka hihna thu na hong thei ding uh hi,” a hong ci hi.