Read Tedim Chin EZEKIEL 14 Bible Online

EZEKIEL 14 - Tedim Chin bible

EZEKIEL 14

¹Tua ciangin Israel mi makai pawlkhat kei kiangah hong pai-in Pasian’ deihna bang ahi hiam, ci-in hong dong uh hi.

²Tua ciangin TOPA in kei kiangah thu hong gen a,

³“Mihing ahi Ezekiel aw, hih mite in milim bia uh a, milim in mawhna sungah amaute tunpih hi. Amaute’ thu theihnopte a gen dingin hong um uh ahi uh hiam?

⁴Tua ahih ciangin Topa PASIAN ahi keimah in amaute tungah ka gen hih thute gen in: Milim bia-in mawhna sungah milimte kitunsak a, tua khit ciangin kamsangte tungah thu a dong dingin a hong pai Israel mi peuhmah in keima thudawnna kam ngah ding uh hi. Tua thudawnna pen a milim tampite uh in a zak dingun a kilawm dawnna hi ding hi.

⁵Tua milimte in keima kiang panin Israel mite paikhiatpih uh a, ahi zongin tua bangin ka dawnna tawh kei lamah ka mite ngahkik dingin ka kilamen hi.

⁶“Tua ahih ciangin Topa PASIAN ahi keima thugen pen Israel mite tungah hih bangin gen in: Hong kihei kik unla, na milimte uh nusia un.

⁷Israel mite khat peuhpeuh ahi a, Israel mite lakah a om gamdang mi khat peuhpeuh ahi zongin, kei kiang panin paikhia-in milim bia a, milim in mawhna sungah a tunpih khit ciangin kamsangpa tungah thu a dong dingin a pai leh, TOPA ahi keimah in ama thudotna ka dawng ding hi.

⁸Amah nialin, midangte’ etteh dingin ka bawl ding hi. Keima mite lak panin amah ka lakhia ding hi. Tua ciangin TOPA ka hihna thu na thei ding uh hi.

⁹Kamsang khat peuhpeuh in khemna tawh a man loin thu hong dawn leh, TOPA ahi keima khem hi ding hi. Israel mite lak panin tua kamsangpa ka lakhia ding hi.

¹⁰Kamsangpa le kamsang thu a dong pa a gim thuakna uh kibang ding hi.

¹¹Israel mite in kei hong nusiat loh nading le a mawhna uh tawh a kinitsak loh nadingun hih bangin ka hih ding hi. Amaute pen keima mi hi ding uh a, kei pen amaute’ Pasian ka hi ding hi. Topa PASIAN ahi keimah in hih thu ka gen hi,” a hong ci hi.

¹²TOPA in kei kiangah thu hong gen a,

¹³“Mihing ahi Ezekiel aw, gam khat peuhpeuh in khialhna bawlin kei tungah hong thuman kei leh keimah in a annek dingteng uh ka susia ding hi. Kialpi tungsakin a mihing a ganhingin ka siasak ding hi.

¹⁴Noah, Daniel, le Job, hih mihing thumte nangawn, amaute’ lakah a om hileh, amaute’ hoihna in amau’ nuntakna ciat bek mah suahtakzo ding uh hi, Topa PASIAN in ci hi.

¹⁵Mite a that dingin gamsa kihtakhuaite khahkhia-in, kuamah khual a zin ngam lo dingin tua gam sung a lauhuai-in om leh,

¹⁶tua gam sungah hih mihing thumte nangawn a om bang hileh, amaute’ tanute le tapate nangawn uh suahtak zo loin, amaute’ nuntakna ciat bek mah suahtakzo ding uh a, tua gam pen gamkhing suak takpi ding hi, ci-in a nungta Topa PASIAN ka kiciam hi.

¹⁷Tua gam sungah gal tungsakin, mihing ganhing a siaksiang dingin a husia galhiamte kizang leh,

¹⁸tua sungah hih mihing thumte a om hangin amau’ pumpi ciat simloh, amau’ tate nangawn suahtakzo tuan lo ding hi, ci-in a nungta Topa PASIAN ka kiciam hi.

¹⁹Tua gamah pulpi tungsakin, ka hehna tawh mihing ganhing sisak leng,

²⁰tua sungah Noah, Daniel, le Job-te a om ahi zongin, amaute’ hoihna in amau’ nuntakna ciat bek a hutzawh cih loh, amaute’ tate nangawn huzo tuan lo ding hi, ci-in a nungta Topa PASIAN ka kiciam hi.

²¹“Topa PASIAN’ thugen hih bang ahi hi: Mihing ganhing a sumai dingin gimna nasia pen li ahi gal, kialpi, a kihtakhuai gamsate, le natna, Jerusalem-ah ka tungsak ding hi.

²²A tanute a tapate a paikhiatpih dingin mi khat peuhpeuh a suaktazo kha a om a, nang kiangah hong pai leh, amaute’ omzia na en in. Amaute’ gitlohna zia na mu ding a, Jerusalem gim ka piakna a kilawm a thuman mah ahihna na phawk ding hi.

²³Amaute’ gitlohna zia na muh ciangin ka hihnate khempeuh a kilawm mah ahihna na phawk ding hi. Topa PASIAN in thu hong gen khinta hi,” a hong ci hi.