Read Tedim Chin EZEKIEL 17 Bible Online

EZEKIEL 17 - Tedim Chin bible

EZEKIEL 17

¹TOPA in kei tungah thu hong gen a,

²“Mihing ahi Ezekiel aw, Israel mite kiangah thugentehna khat gen inla,

³Topa PASIAN in hih bangin ci hi, ci-in gen in: Muvanlai a gol mahmah, a khate zong golin a kizal deda khat om hi. Tua muvanlai in khaveng hoih mahmah nei hi. Lebanon Mual tungah va leengin taamtak kung khat a dawn va kuaitan a,

⁴sumbawlte’ omna gamah pua-in sumbuk bawlte’ khuapi sungah va koih hi.

⁵Tua ciangin Israel gam panin leengguino khat la-in, a khan theih nadingin tui a om tawntungna leihoih mun khatah a suan hi.

⁶Tua leengguino hong khangin a hiangpha leengguipi hong suak hi. A hiangte pen muvanlai lamah zaam a, a zungte in leisung thukpi-ah zung kha hi. Tua leenggui in hiang le teh tampi tak nei hi.

⁷“Tua ciangin a gol mahmah, a khate golin a mul a pha mahmah muvanlai dang khat a om hi. Tua ahih manin tua leenggui in, ama kisuannasa mun a tui a ngah sangin tui a tamzaw piazo ding, ci-in lametna tawh tua muvanlai lamah a zung kha-in a tehte zong tua lam mah a ngasak hi.

⁸Ahi zongin tua leenggui pen, a teh no-in, a gah gah thei-in leenggui lianpi a suah theih nadingin limtakin tui a ngah theihna mun leihoihna sungah a kisuan khinsa ahi hi.

⁹“Tua ahih ciangin Topa PASIAN ahi keimah in ka dotnop thu pen: ‘Hih leenggui hingin hoihtakin khangzo ding ahi hiam? Muvanlai masa pen in zungbawhin, a gahte zutkhia-in, a hiangte kuaitanin, keutumsak ding hi lo ahi hiam?’ cihna ahi hi. Tua leenggui bawhkhiat nadingin thahatna ahi a, minam lianpi ahi zongin kisam lo hi.

¹⁰Hih leenggui pen a kisuan hi mah hi. Ahi zongin hingin khangzo ding ahi hiam? Nisuahna huihpi in a mutkhiat ciangin keutum ding hi lo ahi hiam? Tua a kisuanna munah keutum lel ding hi lo ahi hiam?” a hong ci hi.

¹¹Tua ciangin TOPA in kei tungah,

¹²“Hih a lehdo thei mite in hih thugentehna a khiatna a thei uh hiam, dong in. Jerusalem khua-ah Babylon kumpipa hong pai-in a kumpipa le a uliante manin Babylon-ah a ciahpihna thu gen in.

¹³Amah in kumpipa’ innkuanpih mite khat la-in, amah tawh thuciamna khat bawl a, ama tungah a thuman taktak nadingin kiciamna bawlsak hi. Tua gam a miliante ciahpih hi.

¹⁴Bang hang hiam cih leh tua minamte in lehdokik nawn loin, a thuciam bawlna uh a kizuihna ding a deihna ahi hi.

¹⁵Ahi zongin Judah Kumpipa in amah lehdo veve a, sakol galkap honpite a ngen dingin Egypt gamah mi paisim sak hi. A deihna bangin tangtung ding ahi hiam? Tua bangin a gamtatna tawh suaktazo ding ahi hiam? A thuciamna palsat napi-in gimthuak loin om thei ding ahi hiam?

¹⁶“Kei pen a nungta Topa PASIAN ka hih mah bangin, kumpi tokhom tungah a tusak, Babylon kumpipa tawh a thuciamna palsat ahih manin Babylon gamah hih kumpipa si ding hi.

¹⁷Babylon mite in mi tampi a thah theih nadingun kan bawlin dum a tawh uh ciangin a thahat Faro’ galkap honpite nangawn in amah huh zo lo ding uh hi.

¹⁸Amah in a kiciamna le a thuciamna palsatin hih bangin gamta khin ahih manin, amah suakta ngei lo ding hi.

¹⁹“Tua ahih ciangin kei pen a nungta Topa PASIAN ka hih mah bangin a zuih dingin keima min tawh a kiciam thukimna palsat ahih manin gim ka pia ding hi.

²⁰Amah a awk theih nadingin ngenthang ka zak ding a, amah ka awksak ding hi. Kei tungah amah hong thutak lo ahih manin Babylon-ah paipihin tua lai-ah gim ka pia ding hi.

²¹A galkap muanhuai pente, gal sungah si ding a, a suakta sunte zong mun citengah kithehthang ding hi. Tua ciangin TOPA ahi keimah in thu a gen ka hihlam na phawk ding hi,” a hong ci hi.

²²Tua ciangin Topa PASIAN in, “Keimah in taamtak sangpi a dawn khat la-in, a dawnngek khat ka satkhia ding a, mual sangpi dawn khatah ka suan ding hi.

²³Israel mual sangpen dawnah suanin, a hiang zaai-in a gah luai ding a, taamtak lianpi khat suak ding hi. Tua tungah vasa nam khempeuh tawlnga ding a, bu bawlna munin a nei ding uh hi.

²⁴Tua ciangin singkung sangte phukin, singkung neute a liansak pa, singkung hingte keusakin, singkung keute a hingkiksak TOPA ka hihna thu gam sunga om singkung khempeuh in hong thei ding uh hi. TOPA ahi keimah in hih thu ka gen khin a, hih dingin ka gen bangin ka gamta ding hi,” a hong ci hi.