Read Tedim Chin EZEKIEL 18 Bible Online

EZEKIEL 18 - Tedim Chin bible

EZEKIEL 18

¹TOPA in kei tungah thu hong gen leuleu a,

²“Israel gam sungah mite in zat belin a neih paunak, ‘A pate in leenggah thuk ne a, a tate’ ha kim,’ cihna pen bang a cihnopna ahi hiam?

³Kei pen a nungta Topa PASIAN ka hih mah bangin kong genin-ah: Israel gam sungah hih paunak na zang nawn kei ding uh hi.

⁴Mi khempeuh keima a’ hi a, pate ahi a, tate ahi zongin keima-a’ ahi hi. A mawh mipa bek si ding hi.

⁵“Gentehna-in mi a hoih mahmah, a thuman, a diktat mi khat om hi.

⁶Amah in Israel mite’ milim biakte biakpih lo a, milim biakna pia lo ding, ci-in a kikhamna munah milim biakna sate zong ne lo hi. Midangte’ zi zong luppih dingin zol lo a, numei in nin a neih laitakin zong luppih lo hi.

⁷Kuamah khem lo a, kuama na zong sut lo hi. Sum leitawi a lapa in khapna van a apte zong piakik hi. Gilkialte an vakin, puan nei lote puan guan hi.

⁸A meet bekbek lunggulhna-in sum leitawi pia lo hi. Gamtatsiat ding ut lo a, mite’ thu a manin khensak hi.

⁹Amah in ka thupiakte mangin, ka thukhamte hoihtakin zui hi. Tua bang mi pen mihoih ahih manin nungta ding hi, Topa PASIAN in ci hi.

¹⁰“Tua ciangin gentehna-in hih mihoih pa in tapa khat nei a, tua tapa in mi’ na gu-in mi that a, a pa’ gamtat ngei loh a siateng gamta hi.

¹¹Amah in milim biakna pia lo ding a kici munah a kipia biakna sate ne a, midangte’ zite zolin luppih hi.

¹²Mizawng mi cimawhte khemin, mi’ na sut a, sum leitawi a lapa in khapna-in a piak nate piakik loin kemsuak hi. Milim bia-in a zumhuai-in gamta hi.

¹³A meet lunggulhna-in sum leitawi pia a, a meet zong a kilawm loin tampi tak la hi. Hih bang mipa nungta ding ahi hiam? Nungta het lo ding hi. Hih bangin a mindaihuaite khempeuh gamta ahih manin tuate’ hangin amah si ding hi. Ama sihna pen ama mawhna hang ahi hi.

¹⁴“Gentehna-in hih mihoih lopa in tapa khat hong nei hi. Tua a tapa in a pa’ gamtat hoih lohna teng mu a, a pa’ gamtat bangin gamta lo hi.

¹⁵Israel mite’ milim biakte biakpih lo a, a kikhamna munah biakna-in a kipia biakna sa zong ne lo hi. Midangte’ zi zol lo a, zong luppih lo hi.

¹⁶Kuamah bawlsia lo a, kuama na zong sut lo hi. Sum leitawi a lapa in a khapna van a apte zong piakik hi. Gilkialte an vak a, puan nei lote puan guan hi.

¹⁷Gamtatsiat ding ut lo a, a meet bekbek lunggulhna-in sum leitawi pia lo hi. Ka thukhamte zui-in ka thupiakte mang hi. Tua ahih manin hih mipa pen nungta ding a, a pa’ mawhna hangin si het lo ding hi.

¹⁸A pa in ahihleh mi’ na sutin, mite tungah a sia gamta tawntung hi. Tua ahih manin ama mawhna hangin amahmah si hi.

¹⁹“Ahi zongin, ‘Bang hangin a pa’ mawhna a tapa in thuak lo ding ahi hiam?’ nong ci kha ding uh hi. A tapa a hoih a manin a gamtatna hang ahi hi. Amah in ka thukhamte kemin hoihtakin zui hi. Tua ahih manin pel loin amah nungta ding hi.

²⁰A si ding pa pen a mawh mipa ahi hi. Ta in pa’ mawhna thuak lo ding a, tua mah bangin pa in ta’ mawhna thuak lo ding hi. Mihoih pa in a hoihna thaman ngah ding a, migilo pa in a gitlohna thaman thuak ding hi.

²¹“Migilo khat in a mawh bawlna khawlin ka thukham zui hen la, a hoih a manin gamta leh, tua mipa si lo ding a, pel loin nungta ding hi.

²²Ama mawhnasa khempeuh kimaisak ding a, amah a manin a gamtat manin nungta ding hi.

²³Migilo khat a si ka muh ciangin a lungdam dingin hong ngaihsun na hi uh hiam? Ka lung dam het lo hi. Amah hong kisikin a nuntak ding pen keima deih ahi zaw hi.

²⁴Ahi zongin mihoih khat in a gamtat hoihnateng khawlin, migilote’ gamtat bangin a mindaihuai gamtatsiate gamtat ding hong kipan leh, amah nungta paisuak ding ahi hiam? Nungta het lo ding hi. A hoih ama gamtatnasate kiphawksak lo ding hi. Ama cihtak lohna le ama mawhna hangin si ding hi.

²⁵“Ahi zongin note in, ‘TOPA’ hihna zia man lo hi,’ na ci uh hi. Israel mite aw, ka thugen hong ngai un. Keima hihna zia a man loin ngaihsun na hi uh hiam? A man lo pen nomau’ ngaihsutna zia hizaw hi.

²⁶Mihoih khat a gamtat hoih khawlin mawhna a bawl ciangin si ding hi. Ama sihna pen a gamtatsiatna hang ahi hi.

²⁷Migilo khat a gitlohna panin khawlin a hoih a manin gamta leh ama nuntakna a suahtak ahi hi.

²⁸Amah in a gamtatna phawkin a mawh bawlna khawl hi. Tua ahih manin amah si het lo ding a, nungta paisuak ding hi.

²⁹Ahi zongin no Israel mite in, ‘TOPA’ hihna zia man lo hi,’ na ci uh hi. Israel mite aw, keima hihna zia man lo ahi zenzen hiam? A man lo pen nomau’ ngaihsutna zia hizaw hi.

³⁰“Topa PASIAN ahi keimah in note kiangah kong genin-ah: Israel mite aw, na gamtatnasa bang ciat un thu kong khen ding hi. Kisik kikin na gamtatsiatna khempeuh panun khawl unla, na mawhna hangun kisisak kei un.

³¹Na gamtatnasa uh mawhna khempeuh nusia unla, na lungsim uh le na ngaihsutna uh thaksuaksak un. Bang hangin no Israel mite si nuam na hi uh hiam?

³²Kuama sih ding ka deih kei hi. Tua ahih manin na mawh gamtatna uh khawlin nungta un, Topa PASIAN in ci hi,” a hong ci hi.