Read Tedim Chin EZEKIEL 19 Bible Online

EZEKIEL 19 - Tedim Chin bible

EZEKIEL 19

¹Israel uliante hih bangin tamlawh in hong ci hi:

²Na nu uh humpinelkai tawh kibang hi. Humpinelkai dangte tawh kikhawlin, a note a khoi hi.

³A note khat thuhilh a, hong khangcing hi. Sabet zong hong siam a, mi hong ne hi.

⁴Mite in tua thu za uh a, gum sungah awksak uh hi. Bawm sungah khum uh a, Egypt gamah paipih uh hi.

⁵A pi’ lametnateng beita hi. A no dang khat pantah leuleu a, a khangcing khat a suah hi.

⁶Amah hong khangcing a, a dangte tawh kikhawl hi. Sabet zong hong siam a, mi hong ne hi.

⁷Kulhpite sugawp a, khuapite siasak hi. Hawk zelzel a, a za mite lau mahmah hi.

⁸Amah a hih dingin mite kikaikhawm uh a, mun khempeuh panin hong kuan uh hi. A ngenthang uh zak uh a, thangah a awksak uh hi.

⁹Bawm sungah khum uh a, Babylon kumpipa kiang a tunpih uh hi. Israel mualtung tengah ama hawkna a kizak nawn loh nadingin a khumcip uh hi.

¹⁰Na nu uh, luitui gei-ah a kisuan leenggui tawh kibang hi. Tui tampi ngah a, a teh, a gah, a pha hi.

¹¹A gui hiangte hong lian a, kumpi ciangkhut hong suak hi. Leenggui hong khang a, van hong ban hi. A teh pha-in sang mahmah a, mi khempeuh in mu kim hi.

¹²Ahi zongin hehna tawh leenggui kizungbawh a, leilak kidenna hi. Nisuahna huihpi hong nung a, a gahteng keutumsak hi. A hiangte kikuaitan a, keu-in kihaltum hi.

¹³Tui om lohna lei keu gamah tu-in hih leenggui kituah hi.

¹⁴Hih leenggui mei in kang a, a hiang a gah kangtummang hi. A hiangte liankik nawn lo ding a, kumpi ciangkhut suakkik ngei nawn lo ding hi. Hih a tunga pen tamlawhna hi a, a kisa zelzel ngei khat ahi hi.