Read Tedim Chin EZEKIEL 20 Bible Online

EZEKIEL 20 - Tedim Chin bible

EZEKIEL 20

¹Sal ka suah uh a kum sagih kum, a kha ngana, a ni sawm ni-in TOPA’ kiang panin thu a dong dingin Israel makai pawlkhat ka kiangah hong pai uh hi.

²Tua ciangin TOPA in kei tungah thu hong gen a,

³“Mihing ahi Ezekiel aw, Topa PASIAN ahi keimah in amaute tungah ka gen, ‘Kei tungah thu a dong dingin hong pai na hi uh hiam? Kei pen a nungta Topa PASIAN ka hih mah bangin note’ thudotin ka om het kei ding hi, ci-in gen in,’ hong ci hi.

⁴“Mihing ahi Ezekiel aw, amaute tungah thu a khen dingin na kiging nai hiam? Na kigin’ khit leh amaute tungah thu khen in. A pu a pate uh’ gamtat hoih lohna teng amaute phawksak in.

⁵Amaute tungah keima thugente gen in. Israel mite ka teel laitakin amaute tungah thuciamna khat ka bawl hi. Egypt gam sungah amaute tungah ka kilang a, kei pen Topa note’ PASIAN ka hi hi, ci-in ka kigen hi.

⁶Egypt gam panin amaute paikhiatpihin, amaute a dingin ka zonkhiatsak, bawngnawi le khuaizu tui bangin a luanna gam ahi, gam sung khempeuh panin a hoihpenna munah amaute ka tunpih ding ni teek mahin ka kiciam hi.

⁷Kei pen Topa amaute’ PASIAN ka hih manin a muhdahhuai a milim itte uh paikhia-in, Egypt mite’ pasian man lote tawh a kinitsak loh nading uh ka gen hi.

⁸Ahi zongin amaute in kei hong demin, ka thugen hong ngai lo uh hi. A muhdahhuai a milimte uh paikhia tuan lo uh a, Egypt pasian-te zong nusia lo uh hi. Tua hi a, ka heh mahmahna teng Egypt gam sungah thuaksakgawp ning, ci-in ka ngaihsun hi.

⁹Ahi zongin Egypt gam panin no Israel mite kong paikhiatpih ding hi, ci-in amau’ ompih mite’ zakin gen khin ka hih manin, tua bangin gim thuaksak leng keima min a daisak suak ding, cih ngaihsutna hangin gim ka pia kei hi.

¹⁰“Tua ahih ciangin Egypt gam panin amaute paikhiatpihin gamlak ka tunpih a,

¹¹a zui peuhpeuh a nuntak theih nading ka thukhamte le ka thupiaknate ka hilh hi.

¹²TOPA ahi keimah in amaute pen mi siangtho-in ka bawlna thu a phawk nadingun kote’ kikalah thukimna limin Sabbath tan’ ding thu ka pia hi.

¹³Ahi zongin Israel mite in gamlak nangawnah kei hong dem uh a, a zui peuhpeuh in nuntakna a ngahna ding uh ahi keima thukhamte le ka thupiaknate a nial uh hi. Ka Sabbath-te zong nakpitakin siasak uh hi. Tua ahih manin amaute a maiman nadingin ka hehnateng gamlakah a thuaksakgawp dingin ka kithawi hi.

¹⁴Ahi zongin Egypt gam panin amaute ka paikhiatpihna minam dangte in hong mu khin ahih manin tua bangin gamta leng, keima mindaina ding mah hi zel ahih manin amaute bangmah ka cih kei hi.

¹⁵Tua ahih manin bawngnawi le khuaizu tui bangin a luanna, gam hoihpen ahi, amaute tungah ka piaksa gamah amaute ka paipih loh nading thu, gamlakah ka kiciam hi.

¹⁶Tua bangin kiciamna ka bawlna pen, amaute in ka thupiaknate nialin, ka thukhamte zui lo uh a, ka Sabbath-te siasak uh hi. Amaute in kei hong biak ding uh sangin milim biak ding utzaw uh ahihna hang ahi hi.

¹⁷“Ahi zongin amaute ka khasiat a, gamlakah amaute ka susia kei a, ka maimangsak kei hi.

¹⁸A tate uh kiangah, ‘Na pu na pate un a bawl thukhamte zui kei unla, amaute’ tat ngeinate zui kei un. A milim biakte uh tawh zong kininsak kei un.

¹⁹Kei pen TOPA ahi note’ Pasian ka hi hi. Ka thukhamte zui unla, ka thupiaknate bangin gamta un.

²⁰Kei pen TOPA ahi note’ Pasian ka hihna na phawkna ding uh le note tawh i bawlsa thukimna lim dingin Sabbath-te na siangthosak un,’ ka ci hi.

²¹“Ahi zongin a tate nangawn un kei hong dem uh hi. A zuite in nuntakna a ngahna ding ahi ka thukhamte palsatin ka thupiaknate mang lo uh a, Sabbath-te siasak uh hi. Tua ahih manin, ka hehnateng gamlakah thuaksak gawpin, amaute a sumai dingin ka kithawi hi.

²²Ahi zongin tua bangin hih leng, Egypt gam panin Israel mite ka paikhiatpih hong mu mite’ lakah ka min daii ding ahih manin amaute ka susia kei hi.

²³Tua ahih manin leitung gam khempeuhah amaute ka thehthang gawpna ding thu, amaute tungah kiciamna dang khat tua gamlakah ka bawl leuleu hi.

²⁴Hih bangin kiciamna ka bawlna pen, amaute in ka thupiaknate nialin, ka thukhamte zui lo uh a, ka Sabbath-te siasak uh hi. Tua banah a pu a pate un a biak milimte mah a biakna hang uh ahi hi.

²⁵“Tua ahih manin kei zong amaute a dingin nuntakna a piangsak lo thukhamte le thupiaknate amaute tungah ka pia hi.

²⁶Amaute’ biakpiaknate mah tawh amau mah kininsakin, a tapa upa pente uh zong biakna-in ka piasak hi. Hih bangin ka hihna pen amaute gimpiakna le kei pen TOPA ka hihna thu a hong theih nading uh ahi hi.

²⁷“Tua ahih ciangin mihing ahi Ezekiel aw, Topa PASIAN ahi keima thugen pen Israel mite tungah hih bangin gen in: A cihtak lohna uh tawh na pu na pate un ka min hong daisakin kei hong hehsak uh hi.

²⁸Amaute tungah piak dingin ka ciamna gamah amaute ka paipih hi. Amaute in mual sang ahi a, singniim khat peuhpeuh ahi zongin a muh uh ciangin tua bang mun khempeuhah biakna a pia uh hi. Meihal biakna a piakna uh le tuiphih biakna a piaknate uh tawh kei hong hehsak uh hi.

²⁹Amaute kiangah, ‘Na paina uh mun sangte bang ahi hiam?’ ci-in ka dong hi. Tua ahih manin tua hun a kipanin tua munte pen ‘Mun Sangte,’ kici hi.

³⁰Tua ahih ciangin Israel mite tungah Topa PASIAN ahi keima thugen hih bangin gen in: Na pu na pate un a bawl mawhnate mah note in zong bawlin a milimte mah uh sulzuih ding na hi uh hiam?

³¹Tuni ciang dongin note in a kipia ngei letsongte mah puakin, tua milimte mah biakna-in na tate uh na hal uh ciangin noleno a kininsaktawm na hi uh hi. Tua bangin na gamtat khit uh ciangin no Israel mite, kei kiangah thu a dong dingin nong pai lai uh hi. Kei pen a nungta Topa PASIAN ka hih mah bangin, note’ thudotin ka om het kei taktak ding hi.

³²Note in na lungsim ngaihsutna uh khentat khinin, gam dangah a teng minam dangte mah bangin sing le suang na bia nuam uh hi. Ahi zongin note’ utbang hithei ngei lo ding hi.

³³“Kei pen a nungta Topa PASIAN ka hih mah bangin, khut khauh tak le ka vangliatna le ka hehna tawh note kong ukgawp taktak ding hi.

³⁴Gam khempeuhah note kong thehthangna panin kong kaihkhopkik ciangin note tungah ka vangliatna le ka hehna kong lak ding hi.

³⁵Note pen minam tuamtuamte’ gamah kong paipih ding a, tua munah maitang kituahin note tungah thu kong khen ding hi.

³⁶Egypt gam sung Sinai gamlakah na pu na pate uh tungah thu ka khen mah bangin tu-in note’ tungah kong khen ding hi, Topa PASIAN in ci hi.

³⁷“Note khauhtakin kong uk ding a, thuciamna kong zuisak ding hi.

³⁸Note lak panin a lehdo thei mite le kei tungah hong mawh mite ka lakhia ding hi. Tu laitakin a ompakna uh gam panin ka lakhia ding a, ahi zongin Israel gamah ka ciahsakkik kei ding hi. Tua ciangin TOPA ka hihna thu na thei ding uh hi,” a hong ci hi.

³⁹Topa PASIAN in, “Israel mite khempeuh aw, na milimte uh biabia un! Ahih hangin tu a kipanin keima thu nong man’ uh kul ding a, na milimte uh letsong piakna tawh ka min siangtho na daisak nawn kei ding uh hi,” a hong ci hi.

⁴⁰Topa PASIAN in, “Ka mual siangtho, Israel mual sang tungah Israel mite khempeuh in kei nong bia ding uh hi. Note tungah kong lungdam ta ding a, biakpiaknate, a limcipen piaknate, le na letsong siangthote uh kong lamen ta ding hi.

⁴¹Na kithehthangna uh gam tuamtuam panin note hong paikhiatpihin mun khatah note kong kaihkhop khit ciangin a namtui na biakpiaknate uh kong sang ding hi. Note in kei nong biak manun minam dangte in a siangtho ka hihna hong thei ding uh hi.

⁴²Na pu na pate uh tungah piak dingin ka ciam Israel gam sungah note kong tunpih ciangin TOPA ka hihna thu na hong thei ding uh hi.

⁴³Tua hun ciangin, a kilawm loin na gamtatnate khempeuh uh le nomau mah na kinitsak tawmna thute uh na phawk ding uh a, na gamtat siatnasate uh hangin nomau mah na kimudahtawm ding uh hi.

⁴⁴Na gitlohna, na gamtatsiatna uh tawh kizui-in note tungah hong bawl loin, ka min a daikhak ding khualna tawh note tungah hong gamta ka hih manin kei pen TOPA ka hihna thu no Israel mite in na hong thei ding uh hi, Topa PASIAN in ci hi,” a hong ci hi.

⁴⁵TOPA in kei tungah thu hong gen a,

⁴⁶“Mihing ahi Ezekiel aw, leitaw lam gam en inla, leitaw lam gam siatna ding thu genin, leitaw lam gam tulakte a siatna ding thu genkhol in.

⁴⁷Leitaw lam tulakte kiangah thu gen inla, TOPA’ thugen ngai un. Topa PASIAN in hih bangin ci hi: ‘En un, tu-in gamhal a kipan ding ka hi a, na sunga om singkung a hing, a keu-in kangtummang ding hi. Kuamah in tua meikuang phelh zo lo ding hi. A taw panin a khung dongin kangtummang ding hi.

⁴⁸Hih gam sung a hal pa pen TOPA ahi keimah ka hihna thu le kuamah in a phelh zawh lohna thu mi khempeuh in thei ding uh hi,’ ci-in gen in,” a hong ci hi.

⁴⁹Tua ciangin kei zong, “Topa PASIAN aw, kei hong sawl kei in. Mi khempeuh in kei pen khiatna nei-a thugen thei pa hi, ci-in a hong ngaihsut uh ka hi hi,” ci-in ka nial hi.