Read Tedim Chin EZEKIEL 22 Bible Online

EZEKIEL 22 - Tedim Chin bible

EZEKIEL 22

¹TOPA in kei kiangah thu hong gen a,

²“Mihing ahi Ezekiel aw, mi thahna tawh a kidim khuapi tungah thukhen dingin na kiging nai hiam? A gamtat hoih lohna khempeuh tua khuapi kiangah gen in.

³Topa PASIAN in hih bangin ci hi, ci-in gen in: Nangma mite mahmah tampi tak thatin, milim biakna tawh nangmah kininsaktawm na hih manin, tu-in na hun hong tungta hi.

⁴Na mi thahna hang le na milim bawlna hangin a mawh suak na hih manin tu-in nang a dingin a ni cingin, a kha cingta hi. Tua ahih manin minam dangte’ simmawhbawl, gamdang khempeuh’ hih thopthopin nang kong koih hi.

⁵A nai, a gamla-ah a om mi khempeuh in na gamtat hoih lohna hangin nang hong simmawh uh hi.

⁶Na sunga om Israel ulian khempeuh in amau’ thatang muang uh a, mi that uh hi.

⁷A nu a pa a zahtakbawl kuamah om lo hi. Pemtate kikhemgawp a, meigong le tagahte zong kihih thopthop hi.

⁸Mun siangthote zong zahtakna mel kinei loin, Sabbath-te zong kitang lo hi.

⁹Mi pawlkhatte in midangte a sih theih nadingin zuauthu phuak uh hi. Mi pawlkhat in milim biakna sa ne uh hi. Pawlkhatte amau’ lanna tawh kizui-in gamta tawntung hi.

¹⁰Pawlkhatte in a pa’ zi mawhpih uh a, pawlkhatte in numei ninnei kimlaipi buan uh hi.

¹¹Pawlkhat in midangte’ zi tawh nulepa mawhna bawl uh a, pawlkhat in a mote mawhpihin, pawlkhat in a sanggamnu ahi a pa’ tanu mawhpih hi.

¹²Pawlkhat in sum deih manin mi that uh hi. Pawlkhatte in a Israel mipih sum leitawi a late tungah nuamtak sa-in a meet lakna tawh hauhlawh uh hi. Amaute in kei hong mangngilh uh hi, Topa PASIAN in ci hi.

¹³“A man loin mi’ na na suhna le mi na thahna hangin ka khuttum ka zial ding hi.

¹⁴Tua bangin kong hih ciangin hang nawn dingin ki-um a, na khuttum likngam lai dingin ki-um na hi hiam? TOPA ahi keimah in thu ka gen khin a, ka gen bangin ka gamta ding hi.

¹⁵Gam khempeuh le minam dang khempeuh lakah na mite ka thehthang gawp ding a, na gamtat hoih lohna teng ka beisak ding hi.

¹⁶Tua ahih ciangin minam dangte in nang hong mindaisak ding a, ahi zongin nang Jerusalem in TOPA ka hihna thu na hong thei ding hi,” a hong ci hi.

¹⁷TOPA in kei tungah thu hong gen a,

¹⁸“Mihing ahi Ezekiel aw, kei a dingin Israel mite a kimanna om nawn lo hi. Amaute pen sumngo, dal, sik, hak, le ngun a kihelkhawm sung panin meikhuk sungah kihalin a ngunteng a kilak khit ciangin a omlai ngun-ek tawh kibang uh hi.

¹⁹Tua ahih ciangin Topa PASIAN ahi keimah in ka genin-ah: Note, tua ngun-ek bangin na kimanna uh om nawn lo ahih manin Jerusalem-ah kong kaikhawm ding hi.

²⁰Mite in ngun, sumngo, sik, hak, le dalte kaikhawmin a tuisak dingun meikhuk sungah a khul bangin ka hehna tawh note hong kaikhawmin kong tuisuaksak mang ding hi.

²¹Jerusalem-ah note hong khawm takpi-in na nuai uhah mei tawhin, ka hehna tawh kong haltui ding hi.

²²Meiphual sungah ngunte a kituisak bangin Jerusalem-ah note hong kibawl ding hi. Tua ciangin keima hehna a thuak na hihlam uh na thei ding uh hi,” a hong ci hi.

²³TOPA in kei tungah thu hong gen a,

²⁴“Mihing ahi Ezekiel aw, Israel mite pen ka hehna hangin puah loin, a tungah guah ka zuksak lohna leitang tawh a kibatna uh amaute kiangah gen in.

²⁵A uliante uh, ganhing a that humpinelkai hawk tawh kibang uh hi. Amaute in mi thatin, a sum le a neihsa khempeuh laksak uh a, a mi thahna hangun numei tampi tak meigong suaksak uh hi.

²⁶A siampite un ka thukham palsatin, a siangtho biakna nate ninsak uh hi. A siangtho biakna nate le a mawkmawk nate khenna mel nei lo uh a, a tate uh tungah a siang le a nin a kilamdanna zong hilh lo uh hi. Sabbath-te zong donin nei lo uh hi. Tuate khempeuh hangin Israel mite in kei hong zahtak lo uh hi.

²⁷A kumpi uliante uh, a sa matsa uh a bal gawpgawp ngiahon tawh kibang uh hi. Sum ngahtheih nadingin mi that uh hi.

²⁸Kulh nin kimlai leikang tui tawh a kizut kang bangin a kamsangte un hih bang mawhnate imcip uh hi. A man lopi maang mu uh a, a man lopi-in mailam thu gen uh hi. TOPA ahi keimah in amaute tungah thu gen lo napi-in, Topa PASIAN in hih bangin thu gen hi, ci-in zuau phuakin mite tungah thu gen uh hi.

²⁹Mi cithei a kineite in mi khemin a na sut uh hi. Mizawng mi cimawhte bawlsia-in, pemtate tungah nuamtak sa-in khualna mel nei loin a ututun gamta uh hi.

³⁰Keimah in ka hehna tawh ka suksiat ding hun ciangin kulh a ciangzo ding, kulh a kicipna munah a cingzo ding, le gam sung a huzo ding mi khat amaute lakah ka zong a, ahi zongin tua bang ding mi khat beek ka muzo kei hi.

³¹Tua ahih ciangin amaute’ gamtatna tawh kizui-in gimpiakna-in amaute tungah ka hehna khahin, mei in a kat bangin amaute ka maimangsak ding hi, Topa PASIAN in ci hi,” a hong ci hi.