Read Tedim Chin EZEKIEL 23 Bible Online

EZEKIEL 23 - Tedim Chin bible

EZEKIEL 23

²“Mihing ahi Ezekiel aw, khatvei lai-in unau numei nih om hi.

³Amaute Egypt-ah a omlai, a khangno laitakun, a nungakna lim uh bei-in numei paktat a suak uh hi.

⁴A unu’ min Oholah hi a, Samaria khuapi tawh kibang a cihnopna ahi hi. A naunu’ min Oholibah hi a, Jerusalem khuapi tawh kibang a cihnopna ahi hi. Hih numei nihte ka tenpih a, a nihun kei tawh ta nei uh hi.

⁵Keima zi hinapi-in Oholah pen numei paktatte mah bangin gamta lailai a, Assiria gam pana a lawm ngaihte lunggulh mahmah hi. Tua a lawm ngaihte pen

⁶puansan a silh galkap hangte, gam uk mangte, le galkapmang liante hi a, a vekpi-un a ngaihhuai, sakol tung tuang galkapmang liante ahi uh hi.

⁷Amah pen Assiria uliante khempeuh tawh a mawhsa khat hi a, ama huk luatna hangin Assiria milimte nangawn va bia hi.

⁸A nungakna beisakin, Egypt gam a a paktat mah zom lailai hi. A nungak tung a kipanin mite in luppihin numei paktatte bangin bawlin a ututun hih uh hi.

⁹Tua ahih ciangin a lunggulh mahmah, a it Assiria mite’ khut sungah amah ka pia hi.

¹⁰Assiria mite in a puan hawkkhiatsak uh a, a tanu le a tapate matsakin, tua ciangin namsau tawh amah that uh hi. Mun khempeuha numeite in amah gentehna khatin nei uh a, ama tungah thu kikhen hi.

¹¹“A naunu Oholibah in hih thu thei napi-in, a unu Oholah sangin zong a siazaw, a sukzaw-in paktat lai hi.

¹²Amah in a vekpi-in a ngaihbaang Assiria mi tangval ahi gam ukte le galkapmangte, puansan a silh galkapte, le sakol tung tuang uliante nak lunggulh mahmah hi.

¹³Hih a naunu zong a u zah mahin sia taktak hi, ci-in ka mu hi.

¹⁴“A paktatna nakpitakin hong sia semsem hi. Amah in Babylon uliante’ limte, kawm tungah a san zeza-in a kizut, a kawngten puan le a dialkhip kaite tawh cingtakin a kibawl limte a muh ciangin hoihsa mahmah hi.

¹⁵

¹⁶Amah in tua limte a muh phetin amaute lunggulh mahmah pah a, a sam dingin Babylon gamah kamtai a paisak pah hi.

¹⁷Babylon mite zong amah tawh a mawh dingin hong pai uh hi. Amaute in a lungkim dongun tua nu hih nilohin ninsak uh a, a tawpna-ah amaute a ngaih gen loh a kihzah ciang dongin a bawl uh hi.

¹⁸Amah numei paktat ahihna mi khempeuh theisakin, tua bangin amah le amah a kipholak ciangin a unu ka muhdah zah mah bangin amah zong ka mudah hi.

¹⁹A paktatna uang semsem a, a nungak lai-in Egypt gamah a paktat mah bangin gamta niloh hi.

²⁰Sakoltal lan bangin a zang a gol, a lan mahmah mi khempeuh ngai pahpah hi.

²¹Tua hi a, Oholibah aw, Egypt gamah nungakin na omlai-in na nawi hong kinuaigawp sakin, na nungakna na beisak huna na gamtat hoih lote mah a gamtakik nuam na hi hi.

²²“Oholibah aw, Topa PASIAN ahi keima hong gen thu in: Tu-in nang in hih na lunggulh mite na cimtakta hi. Ahi zongin nangma tungah amaute ka hehsak ding a, nang a hong umcih dingin kong paipih ding hi.

²³Babylon khuamite, Khaldea gammite, Pekod mite, Shoa mite, Koa mite, le Assiria mite khempeuh kong paipih ding hi. Amaute a vekpi-in tangval melhoih, a ngaihbaang gam ukte le galkapmangte hi a, a vekpi-un ulianpipi, sakol tung tuang galkapmang liante vive ahi uh hi.

²⁴Amaute in leilu lam panin nang hong sim ding uh a, leeng galkap le vanpua leeng tampi hong kengin galkap tampi tak tawh hong kuan ding uh hi. Lumte le siklukhute tawh kidalin amaute in nang hong umcih ding uh hi. Amaute’ khut sungah nang kong ap ding a, amaute’ ngeina om bangin nang’ tungah thu hong khen ding uh hi.

²⁵Nangma tungah kei heh ka hih manin nangma tungah amaute hong heh gamtat ding uh hi. Na nakleh na bilte hong atkhiatsakin na tate hong thahsak ding uh hi. Na tanu le na tapate na kiang panin hong sutin a hingtangun hallum ding uh hi.

²⁶Na puante hong hawkkhiatsakin, a manpha na kizepnate zong hong laksak ding uh hi.

²⁷Na huknate le Egypt gam a kipan na gamtat hoih lohnate ka beisak ding hi. Milimte et-in na nei nawn kei ding a, Egypt-te zong na ngaihsun nawn kei ding hi.

²⁸“Bang hang hiam cih leh Topa PASIAN in hih bangin ci hi: Na muhdah na etsat mite’ khut sungah nang kong pia ding hi.

²⁹Amaute zong nangma tungah hong muhdah gamtat ding uh a, na thalawhsa na khempeuh hong laksakin na hawmguakin hong nusia ding uh hi. Na paktat gamtatnateng hong kipholak ding hi. Na hukna le na paktat gamtatna in

³⁰nangma tungah hih bangteng hong tungsak hi. Minam dangte tawh na paktat a, a milimte uh tawh na kininsak hi.

³¹Na unu’ khekhapteng mah tawn na hih manin amah gim ka piak bangin nang zong gim ka hong pia ding hi.

³²Topa PASIAN in hih bangin ci hi: Na unu’ hai mah na dawn ding a, tua hai golin thuk mahmah hi. A hai dim sitset ahih manin mi khempeuh in hong simmawhin hong nuihsan ding uh hi.

³³Na unu Samaria’ hai pen launa le siatna hai hi a, hong amsakin hong lungkhamsak ding hi.

³⁴Tua hai a tawdat nangawn na dawn kang ding a, a hai na petkham ding hi. A hai kitam themte tawh na nawi na kuikham ding hi, Topa PASIAN in ci hi.

³⁵“Tu-in Topa PASIAN in hih bangin gen hi: Nangmah in kei hong mangngilhin hong nungngat na hih manin na hukna le na paktatna hangin na thuak ding hi,” a hong ci hi.

³⁶TOPA in kei kiangah thu hong gen a, “Mihing ahi Ezekiel aw, Oholah le Oholibah tungah thukhen dingin na kithawi nai hiam? A gamtat hoih lohna teng uh amaute tungah gen in.

³⁷Amaute in milim biakna tawh nulepa mawhna bawlin mi zong that lai uh hi. Milimte tawh mawhna gamta-in, kei tawh a neih a tapate uh that uh hi. A tapate uh milim biakna-in go uh hi.

³⁸Amaute’ gamtatna tu-a bangteng bek hi lo lai hi. Ka biakinn ninsak uh a, ka Sabbath-te zong palsat lai uh hi.

³⁹Milim biakna-in ka tate a gawh khit uh ciangin tua ni mahin ka biakinn-ah pai-in ninsak uh hi. Ka biakinn sungah hih bangin gamta tazen uh hi.

⁴⁰“Amaute in gamlapi-a a om mite a sam dingin kamtai sawl uh a, a sap mite hong pai uh hi. Hih numeite kisilin, a mit uh zemin, kizepna a manpha a tuamtuamte tawh kizemin kipuah uh hi.

⁴¹Lupna hoih mahmah tungah tu-in a mai uhah sabuai limtakin koih uh hi. Tua sabuai tungah keima piaksa paknamtui le oliv thaute koih uh hi.

⁴²Lungnuamin a om mihonte’ gamlumna kiza a, gamlak panin mihon mawkmawk pawlkhat zong hong kitunpih hi. Amaute in tua numeite’ khutah tau butsak uh a, a lu tung uhah kumpi lukhu hoihte khusak uh hi.

⁴³Nulepa mawhna bawlin a paat ngingeisa numei khat, numei paktatte khat mah bangin a hih lailai uh hi tah a, ci-in ka ngaihsun hi.

⁴⁴Numei paktatte kianga a hawh bangin amaute pai niloh uh hi. Tu-a bangin a gamtat hoih lo Oholah le Oholibah-te kiangah a paktat dingin amaute a pai uh hi.

⁴⁵Amaute in nulepa mawhna bawlin mi thahna tawh zong kipelh lo uh ahih manin midikte in nulepa mawhna bawlna hang le mi thahna hangin a mawhsak ding uh hi.

⁴⁶“Topa PASIAN in hih bangin ci hi: Amaute lausak gawpin a nate uh a sutgawp dingin mihon khat paisak in.

⁴⁷Tua mihonte in amaute suang tawh dengin, namsau tawh amaute sugawp hen la, a tate uh thatin, a innte uh halsak hen.

⁴⁸Amaute’ gamtat bangin kuamah a gamtat loh nadingun gam sunga a om numei khempeuh hilhkholhna limin hih bang gamtat hoih lohnate, gam sung khempeuhah ka beisak ding hi.

⁴⁹No unau numei nihte ahihleh, na paktatna uh le na milim biakna hangun gim kong pia ding hi. Tua ciangin Topa PASIAN ka hihna thu na hong thei ding uh hi,” a hong ci hi.