Read Tedim Chin EZEKIEL 24 Bible Online

EZEKIEL 24 - Tedim Chin bible

EZEKIEL 24

¹Zedekiah in a uk a kum kua kum, a kha sawmna sung a ni sagih ni-in TOPA in kei kiangah thu hong gen a,

²“Mihing ahi Ezekiel aw, tuni pen Babylon kumpipa in Jerusalem khuapi a umcih ni ding ahih manin lai sungah tuni limtakin ciamteh in.

³Topa PASIAN ahi keimah in amaute a dingin gentehna-in ka gen ahi hih thugentehna pen a lehdo thei ka mite tungah hih bangin gen in: Mei tungah beel suang unla a sungah tui a dimin buk un.

⁴Sa a phei, a liang, a limci pente khah unla, a guh limcite tawh zong dimsak un.

⁵Tuu limci pente’ sa zang unla, beel nuai-ah mei cih un. A tui sosak unla, a guh le a sate sosak un.

⁶“Topa PASIAN ahi keimah in ka gen thu hih bang ahi hi: Mi thahna tawh a kidim khuapi tu-in a sia ding hi ta! Amah pen a kang-op a kinawtkhia ngei lo beel tawh kibang hi. Beel sunga sate khat khatin kilakhia a, a vekpi-in bei khinta hi.

⁷Khuapi sungah mi kithahna om a, a sisante, leivui in a vuh theih nading leilakah taaksak loin, suang tungah taaksak uh hi.

⁸Ka heh suakin a phu a kilak theih nadingin a manthan’ theih loh nading munah a sisante a tua ci-in ka omsak hi.

⁹“Tua ahih manin Topa PASIAN ahi keima gen thu hih bang ahi hi: Mi thahna tawh a kidim khuapi pen tu-in a sia ding hi ta! Kei mahmah in a mei ka cih ding hi.

¹⁰Sing hong cih beh un! A mei sem un! A sa huan un! A tui kangsak un! A saguhte kangtumsak un!

¹¹Tua ciangin a taubeel hawm mei-am tungah suangin sansak veva un. Tua hileh a kang-op ninteng kangtumin hong siangkik ding hi.

¹²Ahi zongin bangzahin hanciamin a kisep hangin, a kang-op in bun lua ahih manin siang zo lo ding hi.

¹³Jerusalem aw, na gamtat hoih lohnate in nang hong ninsak khin hi. A siansuah dingin kong hanciamciam hangin a nin mahin na omlai veve hi. Ka heh mahmahna na thuak khit matengin na siangkik ngei kei ding hi.

¹⁴TOPA ahi keimah in thu ka gen khin hi. Tu-in ka gamtat hun ding hong tungta hi. Kong kiphawkmawh bawl nawn kei ding a, ki-ip nawn loin, zong kong khasiat ngaihsut kei ding hi. Na gamtatna bangin gim hong kipia ding hi, Topa PASIAN in ci hi,” a hong ci hi.

¹⁵TOPA in kei tungah thu hong gen a,

¹⁶“Mihing ahi Ezekiel aw, na it penpen mi khat thakhatin a hong laksak ding ka hi hi. Na thum na tau kei ding a, zong kap loin, na khitui zong na luangsak kei ding hi.

¹⁷Mite’ zakin zong na kidik kei ding a, dahna limin lukhu khu lo, khedap bulh lo, cih bangin zong na om kei ding hi. Na mai zong na khuh kei ding a, a dahte’ annekte pawl zong na ne kei ding hi,” a hong ci hi.

¹⁸A zingsang lamin mite kiangah thugenin ka om a, a nitak ciangin ka zi hong si hi. Kei zong a zing ciangin TOPA’ hong sawl bang teekteekin ka gamta hi.

¹⁹Tua ciangin mite in, “Bang hangin hici gamtat na hi hiam?” ci-in hong dong uh hi.

²⁰Kei zong amaute kiangah, “TOPA in kei kiangah thu hong gen a,

²¹Israel mite kiangah hih bangin thu gen in hong ci hi. Ama cihna-ah: Note in na kisaktheihpih uh, a sungah paipai-in na etet nop uh ka biakinn pen a ninsak ding ka hi hi. Tua ciangin note’ nungah a omlai na tate uh, namsau-in si ding uh hi, ci hi.

²²Tua ciangin keima gamtat bangin note gamta-in, na mai uh na khuh kei ding uh a, a dahte’ annekte pawl zong na ne kei ding uh hi.

²³Lukhu khu-in khedap na bulh ding uh a, thum lo, tau loin na om ding uh hi. Note’ gitlohna hangin note maimangin, a taukhawm litlit ding na hi uh hi.

²⁴Tua ciangin kei pen note a dingin lim ka hi ding hi. Keima gamtat bangbangin a gamta ding na hihna uh hong gen hi. Hih bangin thu hong pian’ ciangin, kei pen Topa PASIAN ka hihna hong thei ding uh hi, hong ci hi,” ci-in ka dawng hi.

²⁵Tua ciangin TOPA in kei kiangah, “Mihing ahi Ezekiel aw, amaute in a kisaktheihpih, a lungdampih, paipai-in a etet nop uh biakinnpi ka lakhia ding a, a tanu a tapate uh zong ka laksak ding hi.

²⁶Tua bangin ka hih ni ciangin tua siatna panin a suakta mi khat hong tai-in nangma kiangah a thu hong ko ding hi.

²⁷Tua ni ciangin nang na pauthei kik ding a, amah tawh na kihokhawm thei ding hi. Tu-a bangin nang pen mite a dingin lim khat na hi ding a, tua ciangin TOPA ka hihna amaute in hong thei ding uh hi,” a hong ci hi.