Read Tedim Chin EZEKIEL 25 Bible Online

EZEKIEL 25 - Tedim Chin bible

EZEKIEL 25

¹TOPA in kei kiangah thu hong gen a,

²“Mihing ahi Ezekiel aw, Ammon mite’ lam nga inla, amaute mawhsakna thu gen in.

³Topa PASIAN ahi keimah in amaute tungah ka gen thu hih bangin gen in: Ka biakinn kininsakin, Israel gam kisusia-in, Judah mite salin a pai na muh uh ciangin nuamin na lungdam se uh hi.

⁴Tua ahih manin nisuahna lam panin a hong pai mite’ khut sungah note ka hong pia ding a, amaute in note’ gam sungah phual hong satin hong teng ding uh hi. Note’ nek ding singgahte le note’ dawn ding bawngnawite hong gaihsakmang ding uh hi.

⁵Rabbah khuapi pen kalaoh khua ka suaksak ding a, Ammon khuapi dangte zong tuukhawk ka suaksak ding hi. Tua ciangin TOPA ka hihna thu nong thei ding uh hi.

⁶“Bang hang hiam cih leh Topa PASIAN ahi keimah in kong genin-ah: Note lungdamin khut bengin, kipakin na diang uh a, Israel gam na simmawhbawl uh hi.

⁷Hih bangin gamta se na hih manun note’ nate hong sutgawp ding minamte’ khut sungah kong pia ding hi. Note hong sumaimang ding ka hih manin a minamin ahi a, a gamin ahi zongin na dingzo nawn kei ding uh hi. Tua ciangin TOPA ka hihna na hong thei ding uh hi, ci-in gen in,” a hong ci hi.

⁸Topa PASIAN in kei kiangah thu hong gen a, “Moab mite in a thugenna uhah, Judah gammite pen minam dangte bangmah hi lel uh hi, ci se uh hi.

⁹Tua ahih manin Moab gam hutna-in a kiphut a kiima om khuapite le a khuapi minthang pente ahi Bethjeshimoth, Baalmeon, le Kiriathaim khuapite, midangte ka simsak ding hi.

¹⁰Ammon mite a zawhgawp mah bangin, Moab mite zong, nisuahna lam mite ka zogawpsak ding a, Moab mite pen minamin dingzo nawn lo ding uh hi.

¹¹Tua bangin Moab mite gim ka pia ding a, tua ciangin TOPA ka hihna thu hong thei ding uh hi,” a hong ci hi.

¹²Topa PASIAN in kei kiangah thu hong gen a, “Edom mite in Judah mite tungah a phulakna uh nasia lua ahih manin tua a phulakna hangun Edom mite tungah mawhna om hi.

¹³Tua ahih ciangin Edom mite gim pia-in, a mihing a ganhingin ka thahmangna ding thu tu-in kong pulak hi. Teman khuapi pan a kipan Dedan khuapi dongin a gam sung khempeuh uh gamkhing ka suaksak ding a, a mite khempeuh uh gal sungah si ding uh hi.

¹⁴Keima mi Israel-te in Edom mite tungah phu hong laksak ding uh a, ka heh mahmahna tawh kizui-in Edom mite thuaksak ding uh hi. Keima phulakna zia Edom mite in thei ding uh hi. Topa PASIAN in thu gen khin hi,” a hong ci hi.

¹⁵Topa PASIAN in kei kiangah thu hong gen a, “Filistia mite in galin a neih tawntung mite uh tungah phu nasia lakin hehna tawh susiagawp uh hi.

¹⁶Tua ahih ciangin Filistia mite simin ka beimangsakna ding thu a hong genkhia ta ka hi hi. Filistia Zanglei a a omlai mi khempeuh ka susiamang ding hi.

¹⁷Amaute nakpitakin gim pia-in, a kicing zah dongin amaute tungah phu ka la ding a, ka hehna a thuak ding uh hi. Tua ciangin TOPA ka hihna thu hong thei ding uh hi,” a hong ci hi.