Read Tedim Chin EZEKIEL 26 Bible Online

EZEKIEL 26 - Tedim Chin bible

EZEKIEL 26

¹Zedekiah in a uk a kum sawm le khat kum, tua kha a ni masa ni-in TOPA in kei kiangah thu hong gen a,

²“Mihing ahi Ezekiel aw, Taia khuapi mite awngin hih bangin kiko uh hi. Amaute in, ‘Sumbawlna lama i kidempih Jerusalem khuapi zancip gawp hi. A kulhpite tu-in kihongkek a, amaute’ guallelhna tu-in eima hauhna suak ding hi,’ ci uh hi.

³Tua ahih ciangin Topa PASIAN ahi keimah in ka genin-ah: Taia khuapi aw, kei pen nangma lang ka hi hi. Nangmah a sim dingin minam tampi kong paipih ding a, tuipi hualte bangin hong kuan henhan ding uh hi.

⁴Na kulhpite susia-in, na tausangte supai ding uh hi. Tua ciangin leitang khempeuh kiatkhia-in a suangtumte bek omlai ding hi.

⁵Nidangin tuipi in a tup ngei suangte tungah tu-in ngasa bengte in a ngen uh pho ding uh hi. Topa PASIAN ahi keimah in thu ka gen khin hi. Minam dangte in nang Taia khuapi hong luhgawp ding uh a,

⁶na gam sunga khuapi dangte sungah a teng mi khempeuh, a namsau uh tawh that khin ding uh hi. Tua ciangin TOPA ka hihna thu nang Taia khuapi in na hong thei ding hi, ci hi.

⁷“Tua ciangin kumpi khempeuh lak panin a lianpen ahi Babylon kumpipa Nebukhadnezzar, nang Taia khuapi a sim dingin kong paipih ding hi. Amah leilu lam gam pan hong kipanin galkap honpi, sakolte le a leengte, le sakol galkap honte hong tonpih ding hi.

⁸Gam sunga om khuapi-a teng mi khempeuh galkidona sungah si ding uh hi. Note hong sim nadingun galte in dum to-in, phung ciangin, a kidalna dingun kulh muanhuai bawl ding uh hi.

⁹Amaute in molhtum tawh na kulhpite satkham ding uh a, na tausangte uh zong hei tawh phukgawp ding uh hi.

¹⁰A sakolte uh a paina leivui khute in khuapi tuamcip ding hi. Van pua leeng le leeng galkapte’ ginna in khuapi kulhte cimsak ding a, a kisusiasa kulhkongpi-a pai bangin hong lut lel ding uh hi.

¹¹Sakol galkapte in kongzing khempeuh tuancilgawp ding uh a, a namsau uh tawh mi khempeuh vatlum ding uh hi. Innkhuam lianpipite leilak kidenna ding hi.

¹²Note’ neihsa na hoih khempeuh, na galte un a ututin zang ding uh hi. Kulhte supai-in inn hoihpipite satthanggawp ding uh hi. Inn-a kizang sing le suang, le na khempeuh la-in tuipi sung denna ding uh hi.

¹³Khuapi sungah lasakna awging ka beisak ding a, tumtheih awgingte khempeuh zong kiza nawn lo ding hi.

¹⁴Khuapi sungah bangmah om nawn loin, ngasa bengte in a ngen uh a pho theih nading suangtumte bek ka omsak lai ding hi. Nang Taia khuapi hong kilamkik nawn lo ding hi. TOPA ahi keimah in hih thu ka gen khinta hi,” a hong ci hi.

¹⁵Topa PASIAN in Taia khuapi tungah hih bangin thu gen hi: “Nang hong kisimin hong kilak ni ciangin na sunga kithat mite’ kut vengvangna in tuipi dunga teng mite lau-in patausak ding hi.

¹⁶Tuipi a zang minamte’ kumpite, a kumpi tokhom tung uh panin kumkhia ding uh a, a kumpi puante uh le a puan hoih silhte uh suahkhia-in, leilakah tu-in, lau-in a ling ding uh hi. Nangma thuakna hong muh manun lau mahmah ding uh a, a ci-lin uh pha thei lo ding hi.

¹⁷Tua ciangin nang tawh kisai-in hih bangin dah la hong phuah ding uh hi: A minthang khuapi kisia ta a, a teembawte tuipi panin maimangta hi. Hih khuapi mite in tuipi uk ngei uh a, tuipi gei-ah a teng mi khempeuh’ kihtak hi ngei hi.

¹⁸Tu-in hih khuapi kia ta a, tuikulh khempeuh lau-in ling uh hi. Tua bang siatna hangin tuikulh-ah a teng mite, lau-in lamdang a sa uh hi.

¹⁹“Bang hang hiam cih leh Topa PASIAN ahi keimah in hih bangin ka ci hi. Kuamah a ten lohna a kisia khuapi bangin a gamkhing khuapi-in kong bawl ding hi. Tuipi tuite kong tumsak ding hi.

²⁰Tanglai-a a sisa mite tawh a tengkhawm dingin misite’ khua Leinuai-ah kong puak ding hi. Siatna a thuak tawntung leinuai-a omte lakah kong koih ding a, a sisate tawh na om ding hi. A hingte lakah a omkik dingin tua lai panin nong kilehkik nawn kei ding hi.

²¹Nang pen mite’ etteh dingin a lauhuai mahmahin kong bawl ding a, tua pen nang a dingin a beina hita ding hi. Mite in nang hong zonzon hangun hong muzo nawn lo ding uh hi. Topa PASIAN ahi keimah in hih thu ka gen khin hi,” a hong ci hi.