Read Tedim Chin EZEKIEL 27 Bible Online

EZEKIEL 27 - Tedim Chin bible

EZEKIEL 27

¹TOPA in kei kiangah thu hong gen a,

²“Mihing ahi Ezekiel aw, Taia khuapi tamlawhna kah la khat sa in.

³Tuipi gei-ah omin tuipi dunga mite tawh sumlei sumzuakna a nei khuapi tungah Topa PASIAN keimah in ka gen thute hih bangin gen in: “Taia khuapi aw, na melhoihna na kisaktheihpih hi.

⁴Nangma inn pen tuipi hi a, nang hong lamte in teembaw hoih bangin hong bawl uh hi.

⁵A sing zat dingun Senir Mual a om taksingte zang uh a, na puankhai khuam dingin Labanon a om taamtak singte zang uh hi.

⁶Nangmah hawh nadingin Bashan tawsaw singte la uh a, Grik tuikulh panin a kila taaksante tawh na sual ding bawl uh a, saiha pak tawh nang hong zem uh hi.

⁷Egypt gam saihadial puan a kizemte tawh na puankhai kibawl a, gamlapi pek panin zong kithei thei hi. Saipras tuikulh panin a kingah puan hoihpente, kumpi mel puante tawh na tungkhuh kibawl hi.

⁸Sidon le Arvad khuapi mite in nang hong hot uh a, misiam mahmahte in nang hong hawl uh hi.

⁹Nang hong lem lettamate pen Gebal khuapi mi khutsiam mahmahte ahi uh hi. Tuipi tungah a pai teembaw nasemte khempeuh in na sumbuk hong zuan uh hi.

¹⁰“Persia gam, Lud gam, le Put gammite in nangma galkap hong sem uh a, na sungah a lumte uh le a siklukhute uh a khai uh hi. Amaute in nangma tungah minthanna hong tunpih uh hi.

¹¹Arvad gam galkapte in na kulh cing uh a, Gamad gammite in na tausangte cing uh hi. Amaute in na kulh tungah a lum uh a khai uh hi. Nang a hong etlawmsak mite pen amaute ahi uh hi.

¹²“Tarshish gammite tawh sumlei sumzuakna-ah na kizom uh a, na van tampite hong lei-in ngun, sik, dal, le haknawte hong pia uh hi.

¹³Javan gammite, Tubal mite, le Meshek mite in zong sumlei sumzuakna-ah nang tawh kizopna nei uh a, na vante hong leina-in sila dingin mite, le sumngo beelte hong pia uh hi.

¹⁴Bethtogarmah gammite in zong vante hong leina-in vanpua sakolte, sakol galkapte, le late hong pia uh hi.

¹⁵Rods gammite in zong nang tawh sumzuakna-ah kizopna nei uh a, tuipi gei-a om gam khempeuhte in na van hong leina-in saiha le ningsing hong pia uh hi.

¹⁶Edom mite in zong na van tampi hong lei uh hi. Van leina-in emerald suangmanpha, puansan, a kizem puante, saihadial puan hoihte, suangkhi, le ruby suangmanphate hong pia uh hi.

¹⁷Judah le Israel gammite in zong na van leina-in mangbuh, oliv thau, le theipal, khuaizu le sing namtui tuamtuamte hong pia uh hi.

¹⁸Damaskas khuapi in zong na vante tampi tak hong lei a, a man dingin Helbon gam a piang leenggahzu, tuumul kang, a kihuansa sik, taksing, le thalsingte hong pia hi.

²⁰Dedan mite in na van hong leina-in sakol dapphahte hong pia uh hi.

²¹Arabia mite le Kedar gam ukte in tuuno, tuutal, le keeltal tawh na van hong lei uh hi.

²²Sheba le Raamah sumbukte in na van leina-in singnamtui hoihpente, suangmanphate, le kham hong pia uh hi.

²³Haran, Kanneh, Eden, Asshur, le Khilmad khuapite in zong nang tawh sumlei sumzuakna-ah kizopna hong nei uh hi.

²⁴Amaute in nang kiangah puan manpha mahmahte, puansan, a kizem puante, sualphah puante, le limtakin a kiheek khauhual hoih nam khempeuh hong zuak uh hi.

²⁵Nangma vante ahihleh teembaw lianpente pawl in a honhonin hong pua uh hi. “Nang pen van a dim pua-in tuipi tungah a pai teembaw lianpi tawh na kibang hi.

²⁶Nang hong hotte in tuipi thukna gamlapi-ah hong hot uh a, nisuahna huihpi in tuipi laizangah nang hong mutsia hi.

²⁷Tua bangin nang na siat ni ciangin a tam mahmah na van khempeuh na sungah a om teembaw nasemte khempeuh, na lettamate le na sumbuk mite khempeuh, na sungah a om na galkap khempeuh, a vekpi-in nang tawh tuipi sungah tuummang khin uh hi.

²⁸Teembaw nasem tuikiate’ kikona in tuipi geiteng a thawn hi.

²⁹“Teembaw dangah a tuang mi khempeuh kumkhia uh a, a vekpi-un tuipi gei-ah pai uh hi.

³⁰Nangma hangin nakpitakin kap uh a, a lu uh leivui thehin vut lakah a bual uh hi.

³¹Nangma hangin a lu uh mettol uh a, dahna limin puanhampi silh uh a, na sa lua-in a kap uh hi.

³²Amaute in nang hong tamlawh uh a, ‘Tuipi sungah a daicipsuak Taia khuapi, kua dang tawh kitehthei ding a, ama thuak bang kua in thuak ngei ahi hiam?

³³Na sumbuk vante tuipi tungah a pai ciangin minam khempeuh’ tangsapna na cingsak hi. Nangma van hauhna in kumpi dangte hauhlawh hi.

³⁴Tu-in tuipi tungah na sia a, tuipi thuk sungah na kiasuk hi. Na vante le na mi khempeuh tuipi sungah nang tawh maimangta hi,’ hong ci ding uh hi.

³⁵“Tuipi gei-ah a teng mi khempeuh in lamdang hong sa ding uh hi. A kumpite uh zong lau mahmah ding uh a, a maiput uh laumai ding uh hi.

³⁶Tu-in nang a maimang paisuak na hita a, nangma tuah bang a tuahkhak ding uh leitungah a om sumbuk dang khempeuh lau-in ling uh hi,” a hong ci hi.