Read Tedim Chin EZEKIEL 28 Bible Online

EZEKIEL 28 - Tedim Chin bible

EZEKIEL 28

¹TOPA in kei kiangah thu hong gen a,

²“Mihing ahi Ezekiel aw, Taia khuapi a ukpa kiangah Topa PASIAN ahi keimah in ka gennop thu, ama tungah hih bangin gen in: “Kisaktheihna lungsim lianpi nangmah in na nei a, kei, pasian khat ka hi hi, na ci hi. Nang pen pasian bangin pil na kisak hangin mihing na hi lel bek hi.

³Danel sangin pil na kisa zaw a, theih loh a nei loin na kingaihsun kha hi.

⁴Na pilna le na siamna tawh ngun le kham tampi na nei hi.

⁵Sumbawl na siamna tawh na hauhna na behlap a, na hauhna na kisaktheihpih hi.

⁶“Tua ahih manin Topa PASIAN ahi keimah in ka hong genin-ah: Nang pen pasian zahin a pil kisa na hih manin

⁷thukhualna a nei het lo galte, nang ka hong simsak ding hi. Na pilna le na siamna tawh na lamsa na khempeuh amaute in hong vatmaisak ding uh hi.

⁸Amaute in nang hong that ding uh a, na hankhuk ding tuipi sungah hong khia ding uh hi.

⁹Nang a hong that ding a hong kuan ciangun, kei pasian bang hi ing, na ci lailai diam? Nang hong thatte na tuah ciangin mihing na hih lelna hong kilang ding hi.

¹⁰Gamdang mite’ khut sungah ui bang lelin na si ding hi. Topa PASIAN ahi keimah in hih thu ka gen khin hi,” a hong ci hi.

¹¹TOPA in kei kiangah thu hong genkik a,

¹²“Mihing ahi Ezekiel aw, Taia kumpipa in a thuak ding tawh kisai-in tamlawh inla, Topa PASIAN ahi keima thugen, hih bangin gen in: “Nidang lai-in mi kicing etteh pha khat na hi a, pilna le hoihna tawh a kidim na hi hi.

¹³Pasian’ Eden huan sungah nang na teng a, suangmanpha nam khempeuh tawh na kizem hi. Karnelian, topaz, le jasper, khrisolait, beryl, le onik, sapfaia, karbankel, le emerald suangmanphate, nangma kizepna hi a, kham tawh kibawl kizepna tampi tak zong na nei lai hi. Hihte khempeuh nangma a dingin na suah ni-in a hong kibawlsak ahi hi.

¹⁴Sathau a kinilh kherub-te nang ka hong cingsak a, ka mual siangtho tungah nang na teng a, a tee zaizai suangmanphate lakah na vak kawikawi hi.

¹⁵Gamtatsiat ding na kipat ma hun ciang dong, na suah tung a kipanin na gamtatna khempeuh paubaanna khat beek om lo hi.

¹⁶Na sumbawl luatna hangin mi ngongtat na suak a, mawhna sungah na tungkha hi. Tua ahih manin ka mual siangtho panin nang ka hong hawlkhia a, a tee zaizai suangmanphate lak panin nang a hong cing kherub-te in a hong hawlkhia uh hi.

¹⁷Na melhoihna na kisaktheihpih kha a, na minthanna in nang hong haitatsak hi. Leilak ka hong denna a, kumpi dangte hilhkholhna-in nang ka hong koih hi.

¹⁸A man loin sum na bawl luatna hang, tua bang na mawhna hangin na biakna munte na siasak hi. Tua ahih manin khuapi sung ka hal a, a vekpi-in kangtummang hi. Nangmah a hong en mi khempeuh’ muhna-ah vutlevai ka hong suah hi.

¹⁹Tu-in nang a maimang paisuak na hita a, nangma tuah bang a tuahkhak ding uh nang hong theisa minam khempeuhte lau-in a ling uh hi,” a hong ci hi.

²⁰TOPA in kei kiangah thu hong gen a,

²¹“Mihing ahi Ezekiel aw, Sidon lam nga inla, a siatna ding thu genkhol in.

²²Topa PASIAN ahi keimah in ka gen thu, amaute kiangah hih bangin gen in: “Sidon khuapi aw, kei pen nangma lang ka hi a, nangma tungah ka hong bawlna hangin mite in kei hong phat ding uh hi. Nangma sungah a teng mite gimpiakna tawh ka sianthona ka lah ciangin TOPA ka hihna thu amaute in hong thei ding uh hi.

²³Nangma sungah cinatna ka tungsak ding a, na kongzing khempeuhah sisan ka luangsak ding hi. Na kimkot khempeuh panin nang hong kisim ding a, na mi khempeuh kithatlum mang ding hi. Tua ciangin TOPA ka hihna thu na hong thei ding hi,” a hong ci hi.

²⁴Tua ciangin TOPA in kei kiangah, “A kimkota om Israel mi a simmawh minam dangte in tu-in simmawh nawn lo ding uh a, Israel mite sunin a nasak thei ding ling le lingkung tawh kibang nawn lo ding uh hi. Tua ciangin TOPA ka hihna hong thei ding uh hi,” a hong ci hi.

²⁵Topa PASIAN in kei kiangah, “Minam tuamtuamte lakah ka thehthangna panin Israel mite ka kaikhawm kik ding a, kei pen a siangthopa ka hihna thu minam khempeuh in hong thei ding uh hi. Tua ciangin ka nasempa Jakob ka piak leitang ahi amaute’ gam sungah Israel mite a teng ding uh hi.

²⁶Tua gam sungah lungmuang takin teng ding uh a, amaute in inn lamin, leenggui suan ding uh hi. Israel mite a simmawh minam dangte gim ka pia ding a, Israel mite ahihleh lungmuang takin om hithiat ding uh hi. Tua ciangin TOPA amau’ Pasian ka hihna thu amaute in hong thei ding uh hi,” a hong ci hi.