Read Tedim Chin EZEKIEL 29 Bible Online

EZEKIEL 29 - Tedim Chin bible

EZEKIEL 29

¹Zedekiah in a uk a kum sawmna, a kha sawm, a ni sawm le nih ni-in TOPA in kei kiangah thu hong gen a,

²“Mihing ahi Ezekiel aw, Egypt kumpipa Faro’ lam nga inla, amah le Egypt gam khempeuh gim a kipiakna ding thu genkhol in.

³Topa PASIAN in hih bangin gen hi, ci-in Egypt kumpipa kiangah gen in: “Gun sungah a om awle lianpi ahi, nang Egypt kumpipa aw, kei pen nangma lang ka hi hi. Nail Gunpi, nangma a’ in na gen a, nangma bawlsa-in na ngaihsun hi.

⁴Na khaguh-ah sikkawi ka bulh ding a, na gun sunga om ngasa khempeuh nangma tungah ka belhsak ding hi. Tua ciangin nangma tungah a belh ngasa khempeuh tawh Nail gun sung panin nang kong kaikhia ding hi.

⁵Nang le na ngasa khempeuh gamlakah kong paai ding hi. Leilakah na pumpi kiphah ding a, phum lohin hong kikoih ding hi. Ganhingte le vasate’ an dingin nang ka hong pia ding hi.

⁶“Tua ciangin TOPA ka hihna thu Egypt mi khempeuh in hong thei ding uh hi. Bang hang hiam cih leh nang pen Israel mite’ muan le suan khat na hi ngei a, ahi zongin nang pen a khauh lo pumpeeng kung khat bang na hi lel hi.

⁷Nangma tungah amaute hong kingap uh ciangin nang na kitan a, amaute sunin na puksak hi.

⁸Tu-in Topa PASIAN in nang kiangah kong genin-ah: Namsau tawh mi kong simsak ding a, na mite le na ganhingte thatlummang ding uh hi.

⁹Egypt gam khempeuh a kinusia gam simtham suak ding a, tua ciangin TOPA ka hihna thu na hong thei ding hi. Nangmah in Nail Gunpi pen keima a’ hi a, keima bawlsa hi, ci na hih manin,

¹⁰nangmah le Nail Gunpi langah keimah ka pang hi. Egypt gam khempeuh, leilu lam Migdol khuapi panin leitaw lam Siene khuapi, Ethiopia gamgi dong, a kinusia gamkhing ka suaksak ding hi.

¹¹Na gam sungteng, mihing in ahi a, ganhing in ahi zongin sik nawn lo ding hi. Kum sawmli sung bangmah om lo ding hi.

¹²Leitung gam khempeuh lakah Egypt gam pen a gamkhing penin ka bawl ding hi. Kum sawmli sung khuapi sia dang khempeuh sangin a siazaw-in Egypt khuapite ka bawl ding hi. Egypt mite galtai-in ka bawl ding a, gam khempeuh le minam dang khempeuh kiangah taisakin ka kithehthangsak ding hi.

¹³“Bang hang hiam cih leh Topa PASIAN in hih bangin ka ci hi: Kum sawmli khit ciangin a kithehthangna minamte lak panin Egypt mite ka kaikhawmkik ding a,

¹⁴amaute’ piancilna mun Egypt gam khanglam Pathros gamah ka tengsak ding hi. Tua lai-ah kumpi gam ginaloin om ding uh a,

¹⁵kumpi gam khempeuh lakah a ginalo pen suak ding uh a, minam dang kuamah ukzo nawn lo ding uh hi. A ginalo mahmahin bawl ding ka hih manin amau’ deih bangin minam dang khat beek tasak zo lo ding uh hi.

¹⁶Israel mite in muan le suanin amaute neikik ngei nawn lo ding uh hi. Egypt-te a tuahsiat ciangin a suang khialkha ahih lamtak uh Israel mite in a phawk ding uh hi. Tua ciangin Topa PASIAN ka hihna thu Israel mite in hong thei ding uh hi,” hong ci hi.

¹⁷Zedekiah in a uk a kum sawmnih le sagih kum, a kha masa a ni masa ni-in TOPA in kei kiangah thu hong gen a,

¹⁸“Mihing ahi Ezekiel aw, Babylon kumpipa Nebukhadnezzar in Taia khuapi sim hi. A galkapte, nakpitakin hanciamsak lua ahih manin a sam nangawn uh pulhmangin, a liangkote uh a sa nangawn lengkhiamang a, ahi zongin tua bangin amau’ gim thamanin kumpipa le a galkapte in bangmah phattuamna ngah lo uh hi.

¹⁹Tua ahih ciangin Topa PASIAN ahi keimah in hih bangin thu kong gen hi: Tu-in Taia khuapi a simna hangin Babylon kumpipa Nebukhadnezzar tungah Egypt gam ka pia ding hi. Amah in Egypt gam luhin a nate uh sut ding a, galkapte’ thaman dingin Egypt-te’ neihsa khempeuh puakhiamang ding hi.

²⁰A galkapte in keima a dingin na hong sepsak uh ahih manin, ama hong nasepsak ka thuhna-in ama tungah Egypt gam a pia ka hi hi. Topa PASIAN ahi keimah in hih thu ka gen khin hi.

²¹“Hih thu hong tun ciangin Israel mite a thahat minamin ka bawlkik ding a, mi khempeuh’ zakna ding munah nang thu kong gensak ding hi. Tua ciangin TOPA ka hihna thu amaute in hong thei ding uh hi,” hong ci hi.