Read Tedim Chin EZEKIEL 3 Bible Online

EZEKIEL 3 - Tedim Chin bible

EZEKIEL 3

¹Tua ciangin amah in kei kiangah, “Mihing ahi Ezekiel aw, nang tungah ka hong piak hih laizial ne in. Tua ciangin va pai inla, Israel mite kiangah thu va gen in,” a hong ci hi.

²Tua ahih manin kei zong ka kam ka ka a, ka nek dingin a laizial hong pia hi.

³Amah in, “Mihing ahi Ezekiel aw, ka hong piak laizial ne inla, na gilpi dimtakin ne in,” a hong ci hi. Kei zong tua laizial ka ne a, khuaizu tawh kibangin khum ka sa mahmah hi.

⁴Tua ciangin amah in, “Mihing ahi Ezekiel aw, Israel mite kiangah pai inla, nang tungah kong gen peuhpeuh, amaute tungah va gen in.

⁵A pau na theih loh minam dangte kiangah a hong sawl ka hi kei hi. Na mipih Israel-te kiangah a hong sawl ka hi hi.

⁶A pau na theih loh, pau haksa a zang minam liante kiangah nang hong sawl hi leng, amaute in na thugen hong mang ding uh hi.

⁷Ahi zongin Israel mite khat beek in na thu hong ngai lo ding uh hi. Keima kam teekteek nangawn ngai lo ding uh hi. Amaute a lungsim uh khauh a, demnopna lungsim nei uh hi.

⁸Tu-in amaute mah bangin a khauh mahmah, a duai mahmahin nang kong bawl ding hi.

⁹Suang khempeuh sangin a sakzaw, diamond suang zahin a sakin na lungsim kong bawl ding hi. Tua ahih manin hih a lehdo thei mite kihta kei in,” a hong ci hi.

¹⁰Tua khit ciangin amah in thu hong genthuah lai a, “Mihing ahi Ezekiel aw, nang tungah kong thugen khempeuh limtakin ngai inla ciamteh in.

¹¹Tua ciangin amaute in na thu hong ngai a, hong ngai kei zongin, salin a om na mipihte kiangah va pai inla, nang tungah kong thugen khempeuh amaute tungah va gen in,” a hong ci hi.

¹²Tua ciangin Pasian’ kha in hong paipihto a, zinling zahin a gin’ ngaih awging khat ka nungah ka za a, “Vantungah a om TOPA, ama minthanna hangin phat un,” ci-in a kiko hi.

¹³Ganhingte in huihlakah a khazapna le leengpei gingte ka za a, zinling zahin gin’ ngaih mahmah hi.

¹⁴Pasian’ kha in hong paikhiatpih laitakin lungkim hetloin ka heh suak mahmah hi. Ahi zongin TOPA’ vangliatna in kei hong zozaw hi.

¹⁵Tua ahih manin ka mipih salte’ omna, Khebar Gun gei-a a om Telabib munah ka va tung a, ka muhsa thute ngaihsunin tua lai-a amaute lakah ni sagih sung ka om hi.

¹⁶Ni sagih a cin khit ciangin TOPA in kei hong hopih a,

¹⁷“Mihing ahi Ezekiel aw, Israel minamte’ galvil pa dingin nang kong koih hi. Nangma tungah ka hong gen hilhkholhnate khempeuh amaute tungah na gensawn ding hi.

¹⁸Migilo pa khat pen si ding hi, ci-in kong gen ciangin, amah kikheelin a nuntak theih nadingin thu na hilhkholh kei leh, tua mipa pen mawhnei mahin si ding a, ahi zongin ama sihna thu ahihleh nang kong ngawh ding hi.

¹⁹Migilo khat hilhkhol napi-in a mawh bawlna a tawp kei leh, a mawhnei mahin si ding a, ahi zongin nangma nuntakna suakta ding hi.

²⁰“Mihoih mahmah khat gamtatsiat ding hong kipan leh a lauhuaina munah amah ka koih ding hi. Amah hilhkhol kei lecin si ding hi. Ama mawhna hangin si ding a, ama gamtat hoihsate phawkin ka nei kei ding hi. Ama sihna thu-ah nang kong ngawh ding hi.

²¹Ahi zongin a khialhloh nadingin mihoih khat na hilh a, na thu hong mangin mawhna a bawl kei leh amah nungta ding hi. Nang zong na suakta ding hi,” a hong ci hi.

²²Ka sungah TOPA’ vangliatna hong om lamtak ka phawk a, amah in kei kiangah, “Ding inla, kuam sungah va pai in. Tua lai mun panin nang kiangah thu kong gen ding hi,” hong cihna ka za hi.

²³Tua ahih manin kei zong kuam sungah ka va pai a, Khebar Gun gei-a ka muh bang teek mahin tua lai-ah TOPA’ minthanna vang ka mu hi. Kei zong lei-ah ka boksuk a,

²⁴ahi zongin ka sungah Pasian’ kha hong lutin ka khe-in hong dingsak hi. Tua ciangin amah in, “Inn-ah ciah inla, inn kikhaknelh in.

²⁵Mihing ahi Ezekiel aw, khauhual tawh nang hong kikhih ding a, mite kiangah na paikhia thei kei ding hi.

²⁶Na leii ka zawsak ding a, hih a lehdo thei mite na thuhilh thei kei ding hi.

²⁷Ahi zongin nang kong hopih kik ciangin kong pau theisakkik ding a, amaute kiangah, ‘TOPA Pasian in hih bangin ci hi,’ na ci ding hi. Tua ciangin mi pawlkhat in na thu hong ngai ding uh a, ahi zongin amaute pen a lehdo thei minam ahih uh manin pawlkhat in na thu hong ngai lo ding uh hi,” a hong ci hi.