Read Tedim Chin EZEKIEL 30 Bible Online

EZEKIEL 30 - Tedim Chin bible

EZEKIEL 30

¹TOPA in kei kiangah thu hong gen leuleu a,

²“Mihing ahi Ezekiel aw, Topa PASIAN ahi keima thugen hih bangin pulak in: “‘A lauhuai ni,’ ci-in awng in.

³Minamte’ siatna ding hun TOPA’ ni hong naita hi.

⁴Egypt gamah galpi tung ding a, Ethiopia gamah lungkhamna lianpi om ding hi. Egypt gamah mi tampi kithat ding a, a neihsa khempeuh uh kipuakhia-in, gam hawmguakin kinusia ding hi.

⁵“Tua galpi in Ethiopia gam, Put gam, Lud gam, Arabia gam, le Libya gam panin a kicial galkap khempeuh that ding a, keima mite’ lak pana galkapte nangawn si ding uh hi.

⁶“Leilu lama om Migdol khuapi panin leitaw lam Siene khuapi dong, Egypt gam a hute khempeuh gal sungah simang ding uh a, Egypt’ kiphatsakpih a galkapteng simang ding hi, ci-in Topa PASIAN in ka gen khin hi.

⁷Egypt gam, leitung gam khempeuhah a gamkhing pen suak ding a, khuapi dang a siate khempeuh sangin a khuapite siazaw ding hi.

⁸Keimah in Egypt gam haltumin, a gam sung a hute khempeuh ka beisak khit ciangin, TOPA ka hihna thu hong thei ding uh hi.

⁹“Tua bangin Egypt gam a siat ni hun hong tun ciangin bangmah khuaphawk loin a om Ethiopia mite kiangah kamtaite ka sawl ding a, amaute lau mahmah ding uh hi. Tua hun ding tu-in hong tungta hi.

¹⁰“Egypt’ hauhnateng a sumai dingin Babylon kumpi Nebukhadnezzar ka zang ding hi.

¹¹Amah le a kihtakhuai a galkapte hong pai ding a, gam sung khempeuh susia ding hi. Namsau tawh Egypt mite vatlum ding a, gam sung khempeuhah misi luanghawm dim ding hi.

¹²Nail Gun a tui ka kangsak ding a, migilote’ khut sungah Egypt ka koih ding hi. Gamdang mite in susia gawpin, gamkhing suaksak ding uh hi, TOPA ahi keimah in ka ci khin hi.

¹³“Milim khempeuh ka susia ding a, Memfis khuapi-ah a om pasian man lote ka beisak ding hi. Egypt gam a uk ding kuamah om nawn lo ding a, mi khempeuh lausakin ka lingsakgawp ding hi.

¹⁴Egypt gam khanglam Pathros gamteng gamkhing ka suaksak ding a, Egypt gam saklamah a om Zoan khuapi ka hal ding a, kumpi khua ahi Thebes, gim ka pia ding hi.

¹⁵Egypt gam sungah khuapi muanhuai pen Pelusium khuapi, ka hehna ka thuaksak ding a, Thebes khuapi mi khempeuh ka sumai ding hi.

¹⁶Egypt gam sung khempeuh ka haltum ding a, Pelusium khuapi in gimna lianpi thuak ding hi. Thebes khuapikulh khempeuh kicimgawp ding a, tui in a khuapi tuum ding hi.

¹⁷On khuapi le Pibeseth khuapi tangvalte, gal sungah si khin ding uh a, adangteng salin kiman ding hi.

¹⁸Egypt’ vangliatna ka suksiat ciangin Tahpanhes khuapi-ah khim zinggawp ding a, a kisaktheihpihna teng uh a beita ding hi. Egypt gam sung meiipi in khuhcip ding a, a mi khempeuh salin pai ding uh hi.

¹⁹Tu-a bangin Egypt tungah gim ka piak ciangin, TOPA ka hihna thu amaute in hong thei ding uh hi,” hong ci hi.

²⁰Zedekiah in a uk a kum sawm le khat kum, a kha masa a ni sagih ni-in TOPA in kei kiangah thu hong gen a,

²¹“Mihing ahi Ezekiel aw, Egypt kumpipa Faro’ khut ka kuaihtansak zo hi. A khut damkikin namsau a tawizawh nadingin kuamah in a khut tuamsak lo hi.

²²Tua ahih manin Topa PASIAN ahi keima thugen in: Kei pen Egypt kumpipa Faro’ lang ka hi hi. A khut a damlai pen le a kitansa zong, a lang nihin ka kuaihtansak ding a, a khut panin namsau ka kiasak ding hi.

²³Egypt mite pen, gam khempeuh le minam khempeuhte lakah ka thehthang ding hi.

²⁴Tua ciangin Babylon kumpipa’ khut ka khauhsak ding a, ama khut sungah ka namsau ka pia ding hi. Ahi zongin Egypt kumpipa Faro’ khut ka kuaihtansak ding a, a langte’ mai-ah tai-in a si ding hi.

²⁵Amah ka thaneemsak ding a, Babylon kumpipa ka thakhauhsak ding hi. Tua ciangin TOPA ka hihna thu amaute in hong thei ding uh hi. Babylon kumpipa’ khut sungah ka namsau ka piak ciangin amah in Egypt lam a ngat ding hi.

²⁶Tua ciangin gam khempeuh le minam tuamtuamte lakah Egypt mite ka thehthang ding hi. Tua ciangin TOPA ka hihna thu amaute in hong thei ding uh hi,” hong ci hi.