Read Tedim Chin EZEKIEL 32 Bible Online

EZEKIEL 32 - Tedim Chin bible

EZEKIEL 32

¹Zedekiah in a uk a kum sawm le nih kum, a kha sawm le nih a ni masa ni-in TOPA in kei kiangah thu hong gen a,

²“Mihing ahi Ezekiel aw, Egypt kumpipa Faro tamlawh inla, hih bangin ci in: “Minam dangte lakah, humpinelkai bangin na kingaihsun hi. Ahi zongin nang pen gunsung tokgawpin a ninsak, awle tawh na kibangzaw hi.

³Topa PASIAN ahi keimah in kong cihin-ah: Minam tampi hong kuansakin, ka ngen kong khuhsak ding a, tui gei-ah kong kaisak ding hi.

⁴Leilakah nang hong kaikhia-in, leilak kong denna ding a, vasate le ganhingte, a kham takun kong nesak ding hi.

⁵Mualteng guamteng, na sa ka dimsak ding hi.

⁶Na sisan tawh leitung khempeuh ka kawtsak ding a, mualteng guamteng na sisan tawh kidim ding hi.

⁷Nang kong suksiat ni ciangin vanpi ka khuhcip ding a, aksi ka mialsak ding hi. Ni, meiipi ka liahsak ding a, kha, ka mialsak ding hi.

⁸Vantung khuavak khempeuh ka mialsak ding a, na gam khempeuh khim zing ding hi, ci-in Topa PASIAN in ka gen khin hi.

⁹“Na theih ngei loh gamdangte-ah salin kong omsak ciangin minam tampite lunggim ding hi.

¹⁰Nang tunga kong bawlna thu minam tampite in lamdangsa ding uh hi. Ka namsau ka vik ciangin kumpite lau-in kigaih ding uh hi. Nang na puk ni ciangin a sihkhak ding uh lau-in mi khempeuh ling kelkel ding uh hi.

¹¹“Bang hang hiam cih leh Topa PASIAN in hih bangin ka ci hi: Babylon kumpipa’ namsau na thuak ding hi.

¹²Minam dang a gilo pente sung panin a galkapte uh a namsau uh doksakin, na mihonpite ka thatsak ding hi. “Na kisaktheihpih teng vatmai ding uh a, na minam khempeuh thatmang ding uh hi.

¹³A tui nekna mun a omna khempeuh uhah, na gan khawite ka that khin ding hi. Tui a siknin ding mihing ganhing khat zong om nawn lo ding hi.

¹⁴Bangmah in su nawn lo ding ahih manin, tuite ciim sitset ding a, gunte zong dum dide ding hi, ci-in Topa PASIAN in ka gen khin hi.

¹⁵Egypt gam gamkhing suaksakin, a gam sunga omteng ka suksiat ciangin TOPA ka hihna thu hong thei ding uh hi.

¹⁶“Hih pen kah la-in a kisa ding tamlawhna hi a, Egypt le a mite tamlawhna-in minam dang numeite in nei ding uh hi. Topa PASIAN in hih thu ka gen khin hi,” hong ci hi.

¹⁷Zedekiah in a uk a kum sawm le nih kum, a kha masa a ni sawm le nga ni-in TOPA in kei tungah thu hong gen a,

¹⁸“Mihing ahi Ezekiel aw, Egypt mi tampite’ hangin kapin thum in. Misite’ omna Leinuai gamah a vanglian minam dangte tawh amaute paisak in. Amaute kiangah hih bangin ci in:

¹⁹“Midang khempeuh sangin melhoihzaw hi lo na hi uh hiam? Ahi zongin pai unla, Pasian a thei lo mite’ han sungah va lum un, ci-in gen in.

²⁰“Galsung a a kithatte tawh si khawm ding uh hi. Egypt gam sunga om mi khempeuh a vatlum dingin namsau khat a baihsa-in om hi.

²¹Egypt mite a panpih galhang pente in misite’ gam Leinuai panin amaute na dawn ding uh a, ‘Pasian a thei lo, galsung a si mite hong paisuk uh a, hih lai-ah lumta uh hi,’ ci-in kiko ding uh hi.

²²“Assiria zong, a kimkotah a galkapte’ han tawh, tua lai mahah om hi. Amaute khempeuh zong gal sungah a si uh hi a,

²³Leinuai a thukpenna munah amaute’ han om hi. A galkap khempeuh gal sungah a si hi a, a hante uh ama kimkotah om hi. Ahi zongin amaute pen nidangin minam dangte a linglawngsak zo ngeite ahi uh hi.

²⁴“Elam zong, a kimkotah a galkapte’ han tawh, tua lai mahah om hi. Amaute khempeuh gal sungah a si uh hi a, misite’ gam Leinuai-ah Pasian a thei loin paisuk uh hi. A hin lai-un mi khempeuh a lausak ngeite hi uh a, ahi zongin tu-in amaute si-in mindai-in a om uh hi.

²⁵Galsung a a site lak mahah Elam lum a, ama kimkotah a galkapte’ han om hi. Amaute, Pasian a thei loin, gal sungah si uh hi. A hin lai-un mite a lausak ngeite hi uh a, ahi zongin tu-in amaute si-in mindai-in om uh a, galsung a site mah tawh a kibangin gimna a thuak uh hi.

²⁶“Meshek le Tubal zong tua lai mahah om uh a, a kimkot uhah a galkapte uh’ han om hi. Amaute khempeuh zong Pasian a thei lo, galsung a a si ahi uh hi. Ahi zongin a hin lai-un midangte a lausakzo ngeite ahi uh hi.

²⁷Hih mite pen misite’ omna Leinuai-ah a galvanteng uh tawh pai-in, a namsau uh kilukham sakin, a lum uh a awm tung uhah a kikoihsak kawmin limtakin a kivui tanglai galkapte bangin pahtawi a vuina ngah lo uh hi. Ahi zongin hih mite pen midang a lausakzo dingin a vanglian ngeite ahi uh hi.

²⁸Tua mah bangin nang Faro zong Pasian a thei lo, galsung a site lakah na om ding hi.

²⁹“Edom zong a kumpite le a gam ukte tawh tua lai mahah om hi. Amaute pen a thahat galkapte hi a, ahi zongin tu-in Pasian a thei loin galsung a a site lak, misite’ gam Leinuai-ah a lum uh hi.

³⁰“Leilu lam uliante le Sidon mite zong tua lai mahah om uh hi. Amaute’ vangliatna in midangte lausak ngei a, ahi zongin tu-in galsung a si mite tawh mindai-in paisuk uh a, Pasian a thei loin kivui uh hi. Misite’ gam Leinuai-a a paisukte tawh a mindaina uh kibang hi.

³¹“Egypt kumpipa Faro in hih mite khempeuh a muh ciangin ama sihna le a galkapte gal sungah a sihna thu tawh kisai-in a lung nuamtuam ding hi, Topa PASIAN in ci hi.

³²Bang hang hiam cih leh Faro in midangte lausak gawp ahih manin amah le a galkapte khempeuh kithatin, Pasian a thei loin galsung a a si mite tawh kivui khawm ding hi. Topa PASIAN keimah in hih thu ka gen khin hi,” hong ci hi.