Read Tedim Chin EZEKIEL 34 Bible Online

EZEKIEL 34 - Tedim Chin bible

EZEKIEL 34

¹TOPA in kei kiangah thu hong gen a,

²“Mihing ahi Ezekiel aw, keima tuuhon ahi Israel mi a cingte mawhsakna thu gen in. Amaute kiangah thu gen inla, Topa PASIAN ahi keima thugen, amaute kiangah hih bangin gen in: Israel mi a cing note aw, gimna na thuak ding uh hi. Nomau mahmah na kivak uh a, tuute na don kei uh hi.

³Tuunawi ne-in, tuumul silhin, tuu thaute go-in a sa na ne uh hi. Ahi zongin tuute na vak kei uh hi.

⁴Tuu zawngkhalte na khoi kei uh a, a cinate damsak loin, a liamnate na tuamsak kei uh hi. A lampialte na khiang kei uh a, a mangte na zong kei uh hi. Tua bang bek hi loin, ngong bawlin na ukgawp zawsop uh hi.

⁵Tua tuute in a cing ding nei lo uh ahih manin kithehthang gawp uh a, gamsate’ an a suak lel uh hi.

⁶Tua ahih manin ka tuute kithehthang gawp uh a, mualtungte le mual sang tung khempeuhah vakmang uh hi. Leitung gam khempeuhah ka tuute kithehthang uh a, kuamah in zon ding kan dingin ngaihsun lo uh hi.

⁷“Tua ahih manin no tuucingte aw, TOPA ahi keima thugen ngai un:

⁸Kei pen a nungta Topa PASIAN ka hih takpi mah bangin, keima thu nong ngaihzawk ding uh hinapi-in, tu-in a cing om lo ahih manin gamsate in ka tuute manin thatin a ne uh hi. Ka tuu a cingte in a tuu uh zong lo uh a, amau pumpi bek mah kivakin ka tuute vak lo uh hi.

⁹Tua ahih manin no tuucingte aw, keima thugen ngai un.

¹⁰Topa PASIAN ahi keimah, note’ lang ka hihna thu tu-in kong pulak hi. Note’ khutsung panin ka tuute ka la ding a, tuute don loin note bek a kidon no tuucingte’ khut sungah ka tuute ka omsakkik nawn kei ding hi. Note’ khutsung panin ka tuute ka honkhia ding a, ka tuute, note’ nekin ka omsak nawn kei ding hi.

¹¹“Topa PASIAN keimah in note kiangah kong genin-ah: Kei mahmah in ka tuute zongin ka kem ding hi.

¹²Tuucingte in a kithehthang tuute kaikhawmin a kep bangin keimah in donin ka kem ding hi. Tua bang a lauhuai siatna ding hun laitakin a kithehthangna uh mun khempeuh panin ka kaikhawm ding hi.

¹³Gamdang panin amaute lakhia-in ka kaikhawm ding a, amaute’ leitangah ka tunpihkik ding hi. Israel mualtungte, lui geite, le mite’ tenna mun khempeuhah amaute ka gamtasak ding hi.

¹⁴Lungmuang takin Israel mualtung lonona le guam sung munnuamte le Israel gam lonona mun khempeuhah ka gamtasak ding hi.

¹⁵Kei mahmah in ka tuute ka cing ding a, nuamtakin a omna ding uh mun ka zonsak ding hi. Topa PASIAN keimah in hih thu ka gen khin hi.

¹⁶Keimah in a mangte zongin, a lampialte kaikhawmin, a liamte a liamma tuamsakin, a cinate damsakin, a cidam a thahatte zong a kibangin ka en ding hi. Bang hang hiam cih leh kei pen a manin a gamta tuucingpa ka hi hi.

¹⁷“No ka tuuhonte aw, Topa PASIAN ahi keima thugen ngai un: Note a tuamtuam ciatin thu kong khen ding a, note sung panin a hoih le a hoih lo hong khenin, tuu le keel zong kong khen ding hi.

¹⁸Note pawlkhat, lopa limci na nek bek uh tawh na lungkim kei uh a, na nek lohte nangawn uh na tuancilgawp uh hi. Tui a siang na dawn uh a, na dawn lohteng uh na siknin uh hi.

¹⁹Ka tuu dangte in na tuatcilsa uh lopa ne-in na sikninsa uh tuite a dawn uh kul hi.

²⁰“Tua ahih ciangin Topa PASIAN keimah in ka thugen ngai un: No tuu thaute le tuu gawngte kong khen ding hi.

²¹Note in a cidam lote na ki uh tawh si gawpin, a hon lak panin na nawtkhia uh hi.

²²Keimah in ka tuuhonte ka hon ding a, a dangte ka bawlsiasak nawn kei ding hi. Ka tuute khatlekhat kikalah thu ka khen ding hi.

²³Amaute a cing dingin ka nasempa David ka koih ding a, amah in amaute hoihtakin an vakin a kem ding hi.

²⁴TOPA ahi keimah, amaute’ Pasian ka hi ding a, ka nasempa David, amaute a ukpa hi ding hi. TOPA ahi keimah in hih thu ka gen khin hi.

²⁵Amaute lungmuang takin a om theih nadingun amaute tawh thuciamna khat ka bawl ding hi. Gam sung panin a lauhuai gamsa khempeuh ka beisak ding a, gamlakah nuamtakin gamta-in a lum thei ding uh hi.

²⁶“Amaute thupha pia-in ka mual siangtho kiimah ka omsak ding hi. A kisap hunhunin thupha guahtui ka zusak ding hi.

²⁷Singkungte tampi tak gahin, lo-ah an tampi piang ding a, mi khempeuh a leitang ciat uhah nuamtakin teng ding uh hi. Sal ahihna panun ka mite suakta sakin, a kikhihna kolte uh ka sutsak khit ciangin, TOPA ka hihna thu amaute in hong thei ding uh hi.

²⁸Gamdang mite in hih gawpgawp nawn lo ding uh a, gamsate in thatin ne nawn lo ding uh hi. Amaute lungmuang takin om ding uh a, kuamah in lausak nawn lo ding uh hi.

²⁹Amaute tungah logam hoih pia ding ka hih manin gam sungah gilkial dangtak om nawn lo ding hi. Minam dangte in amaute simmawhbawl nawn lo ding uh hi.

³⁰Israel mite ka hutna le amaute pen keima mi ahihna thu mi khempeuh in thei ding uh hi. Topa PASIAN in hih thu ka gen khin hi.

³¹“No ka ta ahi tuute aw, an ka hong vak tuuhon ahi keima mite na hi uh a, kei pen note’ Pasian ka hi hi. Topa PASIAN ahi keimah in hih thu kong gen khin hi,” hong ci hi.