Read Tedim Chin EZEKIEL 35 Bible Online

EZEKIEL 35 - Tedim Chin bible

EZEKIEL 35

¹TOPA in kei kiangah thu hong gen a,

²“Mihing ahi Ezekiel aw, Seir Mual lam nga inla, Edom mite mawhsakna thu gen in.

³Topa PASIAN ahi keima thugen, hih bangin gen in: “Seir Mualtung gam aw, kei, nangma lang ka hi hi. Nang a gamkhingin ka hong bawl ding hi.

⁴Na khuapite ka siasak ding a, na gam sungteng gamkhing ka suaksak ding hi. Tua ciangin TOPA ka hihna thu na thei ding hi.

⁵“Nang pen Israel mite’ gal na hi tawntung a, a mawhna hangun gim a tuah ni a nunung pen, a lungkham thuak hun laitakun Israel mite na siasakmang hi.

⁶Tua ahih ciangin kei pen a nungta Topa PASIAN ka hih takpi mah bangin, nangma sih nading ka bawl ding a, na si takpi ding hi. Nangmah in mi sisak na hih manin nangma tungah sihna hong tung ding hi.

⁷Seir Mualtung gam khempeuh gamkhing ka suaksak ding a, tua gam sunga a vak mi khempeuh ka that ding hi.

⁸Mualtung khempeuh si luanghawm tawh ka kidimsak ding a, mual le guam khempeuh dimin galsung a a site’ luanghawm a om ding hi.

⁹A gamkhingin kong bawl paisuak ding a, na khuapite sungah kuamah tengkik nawn lo ding hi. Tua ciangin TOPA ka hihna thu na hong thei ding hi.

¹⁰“Kei pen Israel le Judah mite’ Topa PASIAN hinapi-in, hih minam nihte nangma a’ in ngaihsunin a luah dingin na kigen hi.

¹¹Tua ahih manin kei pen a nungta Topa PASIAN ka hih takpi mah bangin, hih ka minam nihte tungah na heh gamtatna, na muhdah bawlna, le na hazat bawlna tawh kizui-in nangma tungah kong thukkik ding hi. Amaute tungah na gamtatnasa hangin gim hong pia ka hihna thu amaute in thei ding uh hi.

¹²Tua ciangin nangmah in, ‘Israel mualtungte gamkhing suak ta a, keima a’ ding hita hi,’ ci-in simmawhna tawh na kampaunate, TOPA ahi keimah in a za ka hihlam na thei ding hi.

¹³Kei hong gensia-in na kiphatsak paunate khempeuh a vekin ka za khin hi.

¹⁴“Tua ahih ciangin Topa PASIAN in hih bangin ka ci hi: Leitung buppi a lungdam theih nadingin nang a gamkhing pha mahmahin kong bawl ding a,

¹⁵keima mi Israel-te a siatgawp manin na lungdamna zah tawh kizui-in nangma tungah kong bawl ding hi. Seir Mualtung gam ahi Edom leitang khempeuh, gamkhing suak ding hi. Tua ciangin TOPA ka hihna thu mi khempeuh in hong thei ding uh hi,” hong ci hi.