Read Tedim Chin EZEKIEL 36 Bible Online

EZEKIEL 36 - Tedim Chin bible

EZEKIEL 36

¹TOPA in kei kiangah, “Mihing ahi Ezekiel aw, Israel mualte tungah thu gen inla, Topa PASIAN ahi keimah in amaute tungah gen ding ka neih thute hih bangin gen in:

²Israel-te’ galte in, ‘Hih tangtawng mualtung gamte tu-in eima a’ hita hi,’ ci vial uh hi.

³Tua ahih ciangin mailam thu ding gen inla, Topa PASIAN ahi keima thugen hih bangin pulak in: Na kimkot uhah a om minam dangte in no Israel mualtung gamte hong la-in na neihsate uh a hong suh uh ciangin, mite khempeuh in no Israel mite hong simmawh bawlin hong ciamnuihbawl lel uh hi.

⁴Tua ahih manin no Israel mualtung gamte aw, Topa PASIAN ahi keimah in mual lian le mual neute, lui le guamte, a kisia-in a kinusia munte, le a kiima minam dangte in luhgawpin a ciamnuihbawl khuapite tungah ka gen thute ngai un.

⁵“Topa PASIAN ahi keimah in a kimkotah a om minam dangte, le a diakdiakin Edom mite tungah ka hehluatna tawh thu ka gen hi. Amaute in lungdamin nuihna le simmawhna tawh keima leitang la-in a tang uh hi.

⁶Tua ahih ciangin Israel gam tawh kisai-in mailam thu genkhol inla, a kimkotah a om minam dangte in a simmawh bawlna hangun Topa PASIAN ahi keimah in hehna tawh ka thugente, mual lian, mual neu, lui le guamte tungah gen in.

⁷Topa PASIAN ahi keimah in a kimkotah a om minam dangte ka mindaisak ding khauhtakin ka kiciam hi.

⁸Ahi zongin Israel mualtung gamte-ah no ka mi Israel-te a dingin singkungte in teh le gah hong neikik ding uh a, a sawt loin note, inn-ah a hong ciahkik ding na hi uh hi.

⁹Kei pen note’ lamah kong pang ding a, pel loin na gam uh lo-in kikho kikin khaici kituhkik ding hi.

¹⁰A mi-in zong kong pungsak ding a, khuapite sungah tengkikin a sia khempeuh na puahkik ding uh hi.

¹¹A mihing a ganhingin kong pungsak ding a, a nidang sangin tam na phazaw ding uh hi. Ta tampi tak na nei ding uh hi. Nidangin na om ngei bangun kong omsakkik ding a, a nidang sangin a cithei zaw-in kong bawl ding hi. Tua ciangin TOPA ka hihna thu na hong thei ding uh hi.

¹²No ka mi Israel-te, na leitang uhah kong gamtangsakkik ding hi. Note’ leitang suak ding a, tua leitang in na tate uh gilkialin puksisak nawn lo ding hi.

¹³“Topa PASIAN ahi keimah in kong genin-ah: Israel mualtung gamte, mihing sane hi a, tua mualtung gamte in a gam sung mite’ tate laksak hi, ci-in a beisa hunah hong kigennate a man ahi hi.

¹⁴Ahi zongin tu a kipanin mihing sa a ne, gam sung mite’ tate a laksak gam hi nawn lo ding hi. Topa PASIAN in hih thu ka gen khin hi.

¹⁵Minam dangte’ hong kobawlna za nawn loin, a hong mindaisakna uh na thuak nawn kei ding uh a, na sung uhah a teng mite’ tate zong no Israel mualtung gamte in na laksak nawn kei ding uh hi. Topa PASIAN in hih thu ka gen khin hi,” hong ci hi.

¹⁶TOPA in kei kiangah thu hong gen a,

¹⁷“Mihing ahi Ezekiel aw, Israel mite amaute’ gamah a ten lai-un amaute’ gamtatna le a sepnate uh tawh tua gam ninsak uh hi. Amaute’ gamtatnate pen numeite’ neih nin zahin a ninin ka ngaihsun hi.

¹⁸Tua ahih manin gam sungah amaute’ mi thahna le a milimte uh tawh gam sungteng a nitsakna hangun ka hehnateng ka thuaksak hi.

¹⁹Amaute’ nuntakna zia le a gamtatna ziate uh tawh kizui-in amaute tungah thu ka khen a, gamdang mun citengah amaute ka thehthang hi.

²⁰Ahi zongin midangte in, ‘Hih mite pen TOPA’ mite hinapi-in, Pasian in amaute’ tungah a piak gam panin taikhia uh hi,’ ci-in a paina peuhpeuh uhah na kigen ahih manin, ka min siangtho hong daisak uh hi.

²¹Israel mite in a paina peuhpeuh uh gamdang mite lakah ka min siangtho hong daisak kawikawi uh ahih manin tua thu in ka lung hong himawhsak hi.

²²“Tua ahih ciangin Topa PASIAN keimah in Israel mite tungah ka gen ding thute hih bangin gen in: Israel mite aw, tu-a ka sep ding thu pen note kong khualna hang hi loin, minam dang khempeuhte’ lakah na daisak kawikawi uh ka min siangtho ka khualna hang hizaw hi.

²³Note in minam dangte’ lakah na daisaksa uh a lian ka min siangtho pen tu-in minam dangte’ lakah a sianthona ka langsak ding hi. Keimah in minam dangte’ lakah ka sianthona ka lah nadingin note kong zang ding hi. Tua ciangin TOPA ka hihna thu amaute in hong thei ding uh hi. Topa PASIAN ahi keimah in hih thu ka gen khin hi.

²⁴Gam khempeuh le minam khempeuhte lak panin note hong kaikhawm kikin na gam uhah kong tunpih kik ding hi.

²⁵Note tungah tui siangtho kong theh ding a, na milim biakna uh le note hong ninsak na dang khempeuh panin kong siangsak ding hi.

²⁶Note sungah lungtang thak le lungsim thak kong guan ding a, na suang lungtang uh hong lakkhiatsakin mihing lungtang kong guan ding hi.

²⁷Note sungah keima kha kong guang ding a, note tungah kong piak ka thukhamte le ka thupiakte limtakin kong zuisak ding hi.

²⁸Tua ciangin na pu na pate uh tungah ka piaksa gamah na teng ding uh a, note pen keima mi hi-in, kei pen note’ Pasian ka hi ding hi.

²⁹Note hong ninsak thei ding na khempeuh panin kong hu ding hi. An tampi ka piangsak ding a, gilkial na thuakkha nawn kei ding uh hi.

³⁰Na singgah kungte uh le na lolai ante uh tampi tak ka phasak ding a, minam dangte lakah gilkial a mindaina na thuakkha nawn kei ding uh hi.

³¹Na gamtatnasa uh na gitlohnate uh le na hoih lohnate uh na phawk kik ding uh a, na mawhna uh le na khialhnate uh hangin nomau mahmah na kimudahtawm ding uh hi.

³²Israel mite aw, hih thute khempeuh, note’ lungdam nadingin a bawl ding ka hihlohna thu na theih ding uh ka deih hi. Na gamtatnasate uh hangin maizumin na mindai ding uh ka deihna hizaw hi. Topa PASIAN in hih thu kong gen khin hi.

³³“Na mawhna khempeuh panun note kong siansak khit ciangin na khuapite uh sungah hong tengsakkikin, a sia khempeuh kong puahsakkik ding hi.

³⁴Na lote uh a nawkkha ngei mite’ muhna-ah gammang tulak a bat ngei hangin, tu-in tua lote kho-in note kong puahsakkik ta ding hi.

³⁵Hih leitang pen gammang tulak a bang ngei hinapi-in tu-in Eden Huan a batna le a kisusia, a kiluhgawp, a kinusiacip khuapite pen tu-in a muanhuai kulh tawh ki-umin a sungah mi a tenna thu mi khempeuh in gen belin nei ding uh hi.

³⁶Tua ciangin note’ kimkotah a om a suakta lai minam dangte in a siasa khuapite lamkikin, a kinusia lote a puahkik pa pen TOPA ahi keimah ka hihna thu hong thei ding uh hi. TOPA ahi keimah in hih thu ka gen khin a, ka gen bangin ka gamta ding hi.

³⁷“Tu-a tengbek hi loin adang zong ka hih lai ding hi. Keima tung pan Israel mite huhna ka ngensak ding a, tuuhonpi bangin Israel mite ka tamsak ding hi.

³⁸Tuhunin a sia-in a omcip khuapite pen a kiseh pawi hun ciangin biak nadingin a kipaipih, Jerusalem-a tuuhonpi om muamua bangin, mi tampi tawh kidim ding uh hi. Tua ciangin TOPA ka hihna thu hong thei ding uh hi,” hong ci hi.