Read Tedim Chin EZEKIEL 37 Bible Online

EZEKIEL 37 - Tedim Chin bible

EZEKIEL 37

¹Ka sungah TOPA’ vangliatna hong om lamtak ka kiphawk a, ama kha in kei hong paipihin, misi guh tawh a kidimin a om kuampi khatah hong koih hi.

²Tua guhte lakah hong vakpih kawikawi a, tua guhte a tam mahmahna le a keu mahmahna ka mu hi.

³Amah in kei kiangah, “Mihing ahi Ezekiel aw, hih misi guhte a nungtakik thei ding hiam?” ci-in hong dong hi. Kei zong, “Topa PASIAN aw, hih thu nang bek in na thei ding hi,” ci-in ka dawng hi.

⁴Tua ciangin amah in, “Hih guhte tungah thu hilh inla, hih guhkeute in TOPA’ thu a ngaih nadingun gen in.

⁵Topa PASIAN ahi keimah in amaute tungah ka gen thu hih bangin gen in: Note sungah hu kong guan ding a, note kong nungtasakkik ding hi.

⁶Thagui le sazang kong guan ding a, vun tawh kong tuam ding hi. Tua ciangin na sung uhah hu hong guan in kong nungtasakkik ding hi. Tua ciangin TOPA ka hihna nong thei ding uh hi, ci-in gen in,” hong ci hi.

⁷Tua ahih ciangin hong sawl bangin thu ka gen hi. Tua bangin thu ka gen laitakin a kigawi zuazua a ging ka za a, tua guhte khatlekhat kizomkik uh hi.

⁸Tua bangin ka et laitakin thagui le sazang in tua guhte tuam a, tua ciangin a vun in zong hong tuam hi. Ahi zongin tua pumpite sungah hintheihna hu om nai lo hi.

⁹Tua ciangin amah in kei kiangah, “Mihing ahi Ezekiel aw, huihte tungah thu gen inla, hih a sisa pumpite sungah hu sangin a hingkiksak dingin mun khempeuh panin hong pai un, ci-in Topa PASIAN in thu hong pia hi, ci-in gen in,” hong ci hi.

¹⁰Tua ahih ciangin hong sawl bangin ka gen hi. Tua pumpite sungah hintheihna hu hong lut a, tua ciangin amaute hingin a khe-un hong ding uh hi. Galkap honpi khat zah pha-in tam mahmah uh hi.

¹¹Tua ciangin PASIAN in kei kiangah, “Mihing ahi Ezekiel aw, Israel mite pen hih guhte tawh kibang uh hi. Amaute in, ‘I keucip a, i lamet ding bangmah om nawn loin i nuntakna guipi beita hi,’ ci uh hi.

¹²Tua ahih ciangin ka mi Israel-te tungah thu gen inla, Topa PASIAN in hih bangin ci hi, ci-in gen in: Ka mite aw, tu-in note’ hankhuk kong honsak ding a, note hong paikhiatpihin, Israel gam kong tunpihkik ding hi.

¹³Note na kiphumna uh hankhuk hong honsakin kong paikhiatpih ciangin TOPA ka hihna thu nong thei ding uh hi.

¹⁴Note sungah keima nuntakna hu kong guan ding a, note hong hingsakkikin, na gam uhah kong tengsakkik ding hi. Tua ciangin TOPA ka hihna thu nong thei ding uh hi. Hih bangin kong hihna ding thu ka kiciamzo a, ka kiciam bangin kong hih ding hi. TOPA ahi keimah in hih thu ka gen khinzo hi, ci-in gen in,” hong ci hi.

¹⁵TOPA in kei kiangah thu hong gen a,

¹⁶“Mihing ahi Ezekiel aw, sing ciangkhut khat la inla a tungah, ‘Judah kumpi gam,’ ci-in gelh in. Tua ciangin adang khat la leuleu inla a tungah, ‘Israel kumpi gam,’ ci-in gelh leuleu in.

¹⁷Tua ciangin tua ciangkhut tegel ciangkhut khat a battheihna dingin na khut sungah tawikhawm in.

¹⁸Bang a cihnopna ahi hiam, ci-in na mipihte in hong dot uh ciangin

¹⁹amaute kiangah, Topa PASIAN in hih bangin ci hi: Israel ciangkhut la-in Judah ciangkhut tawh ka koihkhawm ding hi. Tua ciangkhut nihte ciangkhut khatin ka bawl ding a, ka khut sungah ka tawi ding hi, ci hi, ci-in gen in.

²⁰“Tua na gelh ciangkhut nihte mite’ muhin na khut sungah tawi-in

²¹amaute kiangah, Topa PASIAN in hih bangin ci hi, ci-in gen in: Amaute’ omna minam dangte’ lak panin Israel mite la-in ka kaikhawm ding a, amaute’ gamah ka paipihkik ding hi.

²²Israel mualtung gamah, amaute minam khatin ka gawmkik ding hi. Amaute a uk ding kumpi khat nei ding uh a, amaute minam nihin kikhen nawn lo ding uh a, kumpi gam nihin zong kikhen nawn lo ding uh hi.

²³Amaute pen a muhdahhuai milimte tawh kininsak nawn lo ding uh a, mawhnate tawh zong kininsak nawn lo ding uh hi. Amaute’ mawhna le kei hong lehheknate panin ka suaktasak ding hi. Amaute a siangtho mi-in ka bawl ding a, amaute keima mi hi-in, kei, amaute’ Pasian ka hi ding hi.

²⁴Ka nasempa David pen amaute’ kumpi hi ding a, mi khat’ ukna nuai-ah amaute kigawmin, ka thukhamte hoihtakin zui ding uh hi.

²⁵A pu a pate uh a tennasa ahi ka nasempa Jakob tungah ka piak leitangah amaute teng ding uh a, amaute bek hi loin a suan a khak dongun tengsuak ding uh hi. Ka nasempa David in amaute uk tawntung ding hi.

²⁶Amaute lungmuangin a om tawntungna ding uh thuciamna khat ka bawl ding a, amaute thupha pia-in a mi ka pungsak ding hi. Amaute’ lakah a om tawntung dingin ka biakinnpi ka phut ding hi.

²⁷Amaute tawh tengkhawmin, amaute’ Pasian ka hi ding a, amaute pen keima mite hi ding uh hi.

²⁸Amaute’ lakah a om tawntung dingin ka biakinnpi ka koih ciangin, TOPA ahi keimah in keima mi dingin Israel mite ka bawl khitna thu, minam dangte khempeuh in thei ding uh hi,” hong ci hi.