Read Tedim Chin EZEKIEL 38 Bible Online

EZEKIEL 38 - Tedim Chin bible

EZEKIEL 38

¹TOPA in kei kiangah thu hong gen a,

²“Mihing ahi Ezekiel aw, Magog gam a om Gog kumpipa mawhsakna thu gen in. Amah pen Meshek minamte le Tubal minamte a ukpa ahi hi. Amah mawhsakna thu gen inla,

³Topa PASIAN in hih bangin ci hi, ci-in gen in: Meshek le Tubal minamte a ukpipa Gog aw, kei pen nangma langah ka pang hi.

⁴Nang hong lehhei-in, na khaguh-ah sikkawi kong bulh ding a, na galkap honpite khempeuh tawh kong kaikhia ding hi. Na galkap honpite pen a sakolte uh le a sakol tung tuangte uh tawh tam mahmah a, na galkap khempeuh in lum le namsau nei kim uh hi.

⁵Persia gam, Kush gam, le Put gammite in zong nang hong panpih uh a, amaute in lum le siklukhu nei kim uh hi.

⁶Leilu lam gam peka om Gomer gam a galkapte khempeuh le Bethtogarmah gam a galkapte khempeuh in nang hong panpih uh a, minam dang tampite in zong nang hong pawlpih uh hi.

⁷Tua ahih manin tu-in nang le na pawlte khempeuh a kigalging sa-in om unla, na thupiakna bangin a gamtang pah lian dingin na galkapte khempeuh omsak in.

⁸Minam tuamtuamte lak panin kikaikhawm kikin a gam uh a kitutkik zawh gallauna nei loin a om Israel mite’ gam a sim dingin kum tampi khit ciangin kong sawl ding hi. Sauveipi sung kinusia-in gamkhing a suak ngei hinapi-in, tu-in a mite khempeuh lungmuang takin a omna Israel mualtung gamte a sim ding na hi hi.

⁹Nang le na galkap honpite le nang hong pawlpih minam tampite in khuapi huih bangin na simgawp ding uh a, meiipi bangin a gam sung khempeuh na tuamcip ding uh hi.

¹⁰“Topa PASIAN ahi keimah in nang Gog tungah kong genin-ah: Tua hun ding hong tun ciangin na lungsim sungah gitloh gamtat ding ngaihsut na kipan ding hi.

¹¹A khuapite in galnanna ding kulh nei loin, lungmuang takin a om hithiat, a kihutawm zo lo ding gam khat, simgawp ding na ngaihsun ding hi.

¹²A sia ngeisa khuapite sungah a teng mite luhin a nate uh na sutgawp ding hi. Tua mite pen minam tuamtuamte lak panin a kikaikhawm kik, tu-in ganhing le neihsa van zong nei kikin, leitung lam khempeuh a kituahna lamkabom sanah a teng mite ahi uh hi.

¹³Sheba mite le Dedan mite, le Tarshish khuapite-ah a teng sumbukte in nang kiangah, ‘Ngun le khamte, ganhingte le vante na ngah nadingin luhgawpin a sutgawp ding le genzawh loh van tampi tawh a ciahkhia dingin galsim dingin na galkapte na kaikhawm nai hiam?’ ci-in hong dong ding uh hi, ci-in gen in,” hong ci hi.

¹⁴Tua ciangin Topa PASIAN in kei kiangah, “Mihing ahi Ezekiel aw, hih bangin thu gen in hong ci hi: Keima mi Israel-te lungmuang takin a om hun laitakin nangmah na kihanthawntawm ding a,

¹⁵leilu lam peka na omna gam panin sakol tung vive-ah a tuang, minam tampite kiang panin na kaihkhop a thahat galkap hon tampite masuanin na kuankhia ding a,

¹⁶khuapi huih in gam sung a nawkgawp bangin keima mi Israel-te na sim ding hi. A hun a tun ciangin, nangmah zangin na ka sepna tawh minamte lakah ka sianthona ka lahtheih nadingin keima gam a sim dingin kong sawl ding hi.

¹⁷Ni khat ni ciangin Israel mite a sim dingin mi khat ka sawl ding hi, ci-in keima nasem Israel kamsangte tungtawnin, sawtpek lai-in ka gengen niloh mipa pen nang na hi hi. Hih thu Topa PASIAN in gen khinzo hi.

¹⁸“Ahi zongin Gog in Israel gam a sim ni ciangin ka heh suak mahmah ding hi.

¹⁹Tua ni ciangin ka hehluatna tawh Israel gamah nakpitakin zin ling hen, ka ci ding hi.

²⁰Ngasate le vasate, ganhing a neu a lian, le leitung a om mi khempeuh, keimah kihtakna hangin lau-in ling ding uh hi. Mualte pukin, keente cimin, kulh le phung khempeuh kicimmang ding uh hi.

²¹Gimna a tuamtuamte tawh Gog ka lausakgawp ding hi. Topa PASIAN in hih thu ka gen khin hi. Ama mite khatlekhat namsau tawh kisatgawp ding uh hi.

²²Pulnatna le sisan luanna tawh amah gim ka pia ding hi. Amah le a galkap honte le amah a panpih minam tampite tungah guahpi, gialpi, meikuang le kaat kuang, ka zusak ding hi.

²³Hih bangin hihna tawh a lian a siangtho ka hihna thu, keimah in minam khempeuh tungah ka langsak ding a, tua ciangin TOPA ka hihna thu amaute in hong thei ding uh hi,” hong ci hi.