Read Tedim Chin EZEKIEL 39 Bible Online

EZEKIEL 39 - Tedim Chin bible

EZEKIEL 39

¹Topa PASIAN in kei kiangah, “Mihing ahi Ezekiel aw, Gog mawhsakna thu gen inla, Topa PASIAN in hih bangin ci hi, ci-in gen in: Meshek le Tubal minamte a ukpipa Gog aw, kei pen nangma langkhatah a pang ka hi hi.

²Mundang khatah nang kong paisak ding a, leilu lam gam pek panin Israel mualtung gamah kong tunpih ding hi.

³Tua lai mun panin na veilam khutah na tawi na thal hong betkhiatsakin, na taklam khutah na tawi na thaltangte zong kong betkhiatsak ding hi.

⁴Nang le na galkap honte le nang hong panpih minam khempeuhte pen Israel mualtung gamah na simang ding uh a, vasa nam khempeuh le gamsate in na sa uh ne ding uh hi.

⁵Topa PASIAN in hih thu gen khin ka hih manin gamlakah na tuk zeizai ding uh hi.

⁶Kuamah in nawngkaisak loin nuamtakin mite a om hithiatna Magog gam sung le tuipi gei-a gamte ka hal ding a, tua ciangin TOPA ka hihna thu mi khempeuh in hong thei ding uh hi.

⁷Keima mi Israel-te lakah ka min siangtho ka kitheisak ding a, keima min a daii dingin ka omsak nawn kei ding hi. Tua ciangin keimah pen a Siangtho, Israel-te’ Pasian ahi TOPA ka hihna thu minam khempeuh in hong thei ding uh hi,” hong ci hi.

⁸Topa PASIAN in, “Tua ka gengen ni hong tung takpi ding hi.

⁹Israel gam khuapite-ah a teng mite kuankhia-in, tua a kinusia galhiamte ansing dingin khawm ding uh hi. Tua a kinusia lumte, thal le thaltangte, molhtumte le teipite, mei-in cih ding uh a, kum sagih sung kikhom ding hi.

¹⁰Amaute in mei cih dingin a kinusia galhiamte nei uh ahih manin gamlakah sing tom kullo ding a, tulakah sing phuk ding zong kisam lo ding hi. Amaute in amau’ na a sutte’ na sutin, a suksiatsakte’ na suksiatsak ding uh hi. Topa PASIAN in hih thu ka gen khin hi,” hong ci hi.

¹¹TOPA in, “Hih thu hong pian’ ni ciangin Israel gam sung Si Tuipi nisuahna lamah a om Khualzin Mite’ Kuam a cihna sungteng, a kivui nadingun Gog ka pia ding hi. Gog le a galkap honpite, tua lai munah kivui ding ahih manin khualzin mite’ lampi khaktan ding a, tua mun pen, ‘Gog Galkapte’ Kuam,’ kici ding hi.

¹²Israel mite in a gam sung uh a siansakkik nadingin misi vuina-in kha sagih sung hun bei ding hi.

¹³Gam sunga om mi khempeuh in misi vuina-ah huh ding uh a, tua bangin a huhna hangun ka gualzawh ni-in pahtawina ngah ding uh hi. Topa PASIAN ahi keimah in hih thu ka gen khin hi.

¹⁴Kha sagih a cin khit ciangin, a gam sungteng uh a siangthosak theih nadingun a kimangngilhkha siluanghawmte zongin a phum dingin gam sungteng a zong kawikawi ding mi pawlkhat a seh ding uh hi.

¹⁵Gam sungteng a zon kawikawina uhah misi guh a muh simun, misi vuite in hong tawmin Gog Galkapte’ Kuam-ah a vui hun ma sungteng uh a kitheih nadingin a gei-ah ciaptehna khat bawl pahpah uh hi.

¹⁶(Tua galkap honpite’ min tamin a gei-ah khuapi khat om hi.) Tua bangin gam sung siangsak ding uh hi,” hong ci hi.

¹⁷Topa PASIAN in kei kiangah, “Mihing ahi Ezekiel aw, amaute a dingin ka bawlsak biakpiakna sa a ne dingin mun khempeuh panin vasa khempeuh le ganhing khempeuh hong pai nadingun sam in. Israel mualtung gamah pawi lianpi khat om ding a, a duh zahzahun sa ne-in si dawn ding uh hi.

¹⁸Tuutalte, tuunote, keelte le bawngtal thaute a kigawh bangin a kigo ahi galkapte’ sate ne-in, leitung gam ukte’ site a dawn ding uh ahi uh hi.

¹⁹Biakna dinga gawh bangin hih mite ka gawh ciangin vasate le ganhingte in a nekzawh zahzah uh a thaute ne ding uh a, a kham dongun a si dawn ding uh hi.

²⁰Amaute in ka sabuai tungah, sakolte le a tunga tuangte, galkapte le galkapmangte’ sa, a nekzawh zahzah uh ne ding uh hi. Topa PASIAN in hih thu ka gen khin hi,” hong ci hi.

²¹TOPA in kei kiangah, “Minamte lakah ka minthanna ka lak ding a, thu a tangin ka khennate ka sepkhiat theih nadingin ka vangliatna ka zatna dan amaute tungah ka lak ding hi.

²²Tua khit a kipanin amaute’ TOPA Pasian ka hihna thu, Israel mite in hong thei ding uh hi.

²³Tua ciangin kei tungah hong khialhna uh hangin Israel mite sal suak uh a, amaute nungngatin, a galte uh khut sungah pia-in gal sungah a vekun a sisak ka hihna,

²⁴le amaute’ nitna le a gitlohna uh tawh kituakin amaute tungah bawlin, amaute a nungngat ka hihna thu, minam dangte in thei ding uh hi,” hong ci hi.

²⁵Topa PASIAN in kei kiangah, “Tu-in Jakob suanlekhak Israel mite ka hehpih ding a, amaute a cithei-in ka bawlkik ding hi. Keima min siangtho ka hu ta ding hi.

²⁶Amaute’ gam sungah kuamah in su loin lungmuangin a omkik uh hun ciangin, kei hong lehbawlnate uh le a mindainate uh mangngilh theita ding uh hi.

²⁷Kei a siangtho ka hihna thu, minam tampite tungah ka lah nadingin a galte uh a omna gamdang khempeuh panin amaute lakhia-in ka kaikhawm kik ding hi.

²⁸Tua ciangin, minam dangte’ khut sungah salin amaute puakin, tua khit ciangin amaute khat zong siit loin kaikhawm kikin a gam sung uh ka tunpih kimna hangin amaute’ TOPA Pasian ka hihna thu, keima mite in hong thei ding uh hi.

²⁹Israel mite tungah ka kha ka sung ding a, amaute ka nungngat nawn kei ding hi. Topa PASIAN in hih thu ka gen khin hi,” hong ci hi.