Read Tedim Chin EZEKIEL 4 Bible Online

EZEKIEL 4 - Tedim Chin bible

EZEKIEL 4

¹Tua khit ciangin, “Mihing ahi Ezekiel aw, leiseek khat la-in na mai-ah koih inla, Jerusalem khuapi lahna-in tua leiseek tung git in.

²Tua ciangin tua khuapi a ki-umcihna lah nadingin na kiimah dumte, phungte, galpanna phualte, le kulh sukkhapna ding molhtumte bawl in.

³Tua ciangin sikpeek khat la inla, nang le khuapi kikalah kulh lim dingin koih in. Tua ciangin khuapi lam en in. Tua khuapi a ki-umcih hi-in, nang pen a umcihte’ lim ding na hi hi. Hih pen Israel mite a dingin lim hi ding hi.

⁴“Tua ciangin na veilam pang delhphahin lum in. Israel mite’ mawhna hanga gimna nangma tungah kong nga ding hi. Tua lai munah lumin amaute’ mawhna

⁵ni zathum le ni sawmkua sung na thuak ding hi. Bang hang hiam cih leh amau’ gimthuak ding kum khat sung dingin ni khat, amau’ thuak ding kum zah nangmah in a ni-in na thuak ding hi.

⁶Hih bangin na gamtat khit ciangin na taklam delhphahin na kihei leuleu ding a, Judah mite’ mawhna ni sawmli sung gim na thuak leuleu ding hi. Nangma thuak ni khat pen amau’ thuak ding kum khat tang ahi hi.

⁷Tua ciangin Jerusalem khuapi a ki-umcihna sal gega in. Na puanak ban zialto inla, tua khuapi siatna ding thu gen in.

⁸Nang pen khauhual tawh kong hencip ding a, tua khuapi umcihna a kiman mateng na kihei thei kei ding hi.

⁹“Tu-in mangbuh, mangbuhham, belawi, taang, le mangbuhman pawlkhat la inla, tuate hel khawmin anlumin bawl in. Na veilam delhphahin na lup hun ni zathum le ni sawmkua sung tua na bawl anlum na ne ding hi.

¹⁰Nek khatin anlum shekel sawmnih gik bek na ne ding a, ni khatin khatvei bek na ne ding hi.

¹¹Tui zong duh zahzah hi loin, ni khatin thawl khat bek na dawn ding hi.

¹²Na nek ding anlum pen mite’ muhin mihing ekkeu khawmin tuate mei-in na cih khit ciangin tua sungah na em ding hi,” hong ci hi.

¹³Tua ciangin TOPA in, “Israel mite, gam dangah ka thehthang hun ciangin thukham in nek dingin a kham an ninte tu-a mah bangin ne ding uh hi,” a hong ci hi.

¹⁴Ahi zongin kei zong ka dawngkik a, “Topa PASIAN aw, cikmahin kei ka kininsak ngei kei hi. Ka neu tung a kipan tu dongin ama thu-in a sitawm ganhing sa ahi a, gamsate’ nek baang ahi zongin ka ne ngei kei hi. A ninin a kiseh an khat peuhpeuh ka ne ngei nai kei hi,” ka ci hi.

¹⁵Tua ciangin amah in, “Tua ahihleh pha hi. Mihing ek tangin bawng-ek na zang ding a, tua bawng-ek am sungah na em ding hi,” a hong ci hi.

¹⁶Tua ciangin amah in thu hong genthuah lai a, “Mihing ahi Ezekiel aw, Jerusalem khuapi sungah an ka beisak ding a, mite in lunghihmawhna tawh a annek a tuidawnte uh ciangtan ding uh hi.

¹⁷An le tui loin amaute om ding uh a, amaute lunggimin, a tawpna-ah a mawhna hangun beimang ding uh hi,” a hong ci hi.