Read Tedim Chin EZEKIEL 40 Bible Online

EZEKIEL 40 - Tedim Chin bible

EZEKIEL 40

¹Jerusalem khuapi a kilak zawh a kum sawm le lina kum, salin hong kipaipih zawh a kum sawmnih le ngana, a kha masa a ni sawm ni-in ka sungah TOPA’ vangliatna hong om lamtak ka kiphawk a, amah in kei hong paikhiatpih hi.

²Ka maang sungah, Pasian in Israel gamah hong paipih a, mual sang khat tungah hong koih hi. Khuapi tawh a kibang inn honpi bang khat ka mai-ah ka mu hi.

³Amah in tua khuapi nai-ah hong paipih a, sumngo bangin a tee mi khat ka mu hi. Tua mipa in pikhau khat le piciang khat tawi a, kongpi gei-ah a ding hi.

⁴Tua mipa in kei kiangah, “Mihing ahi Ezekiel aw, tu-a kong lah ding nate, na mit tawh limtakin enin, na bil tawh limtakin ngai inla, limtakin ngaihsun in. Hih lai-ah nang kong paipihna pen hih thu hang mah ahi hi. Na muh na khempeuhte, Israel mite tungah a gen ding na hi hi,” hong ci hi.

⁵Ka muh pen biakinn na hi a, a kimkotah kulh om hi. A mipa in pi sawm a pha tehna piciang la-in a kulh a teh hi. A teh ciangin pi sawm sahin, pi sawm mah sang hi.

⁶Tua ciangin nisuahna lama om kulhkongpi-ah amah pai a, a kahlei-ah kahto-in a khung a tun ciangin kulh kongvang teh a, pi sawm mah sang hi.

⁷Tua banah lampi khat om a, a lampi pang tuakah galvilna inndei neu thum tuak om hi. Inndei neute a dung a vai kikim a, pi sawm mah ahi hi. Inndei neu khatlekhat kikal pi giat sah hi. Tua galvilna inndei neute banah pi sawm mah a sau lampi khat om a, biakinnpi lam a maingat inndei golzaw sung a tung hi.

⁸Hih inndei golzaw a teh ciangin pi sawm le li pha hi.

⁹Hih inndei pen biakinn tunna ding lampi tawpna hi a, a biakinn lam neh pena om kawm pen pi li a sah hi.

¹⁰(Hih lampi pang tuak a om galvilna inndei neute pen a golna kikim a, a kikal-a kawmte zong a sahna kikim hi.)

¹¹Tua ciangin a mipa in a lampi teh a, pi sawm le guk zai-in pi sawmnih le nih a sau hi.

¹²Tua galvilna inndei neu mai ciatah letmat sawmnih sangin letmat sawmnih a sah kidalna khat a om hi. (Hih galvilna inndei neute pen a dung a vai pi sawm tuak ahi hi.)

¹³Tua ciangin inndei neu kawm nung panin lampi kantanin a gal sana inndei neu kawm nung dong teh a, pi sawm le nih a pha hi.

¹⁴Inndei nunung pen zomah biakinn tual om a, tua tual a teh ciangin pi sawmthum le li a pha hi.

¹⁵Kulhkong pua panin inndei nawlnung kawm pua dong lampi sauna pi sawmgiat le li a pha hi.

¹⁶Hih inndei neute’ kawm a pualam pangah tawlet neu om a, inndei kikal-a om kawm tungah zong a vang neu om hi. Lampi omna lampang, inndei kikal-a kawmte tungah nisuh kung lim kibawl hi.

¹⁷Tua ciangin a mipa in kongpi tawnin a tualah hong paipih hi. A tual pualam kawm tawh kizomin inndei sawmthum om a, tua inndeite mai-ah suang a kiphah lampi om hi.

¹⁸Hih suangphah pen a tual kimkotah om a, hih a pualama tual pen a sunglam a om tual sangin niamzaw hi.

¹⁹Tua ciangin a sunglam tual lut nadingin a sangzaw-ah kongpi khat om hi. A mipa in hih kongpi nih kikal a teh ciangin pi zakhat sawmguk giat a pha hi.

²⁰Tua ciangin a mipa in a pualam tual paina ahi, leilu lampangah a om kongpi lampi hong teh hi.

²¹Tua bangin a teh ciangin lampi pang tuak a om galvilna inndei neu thumte, a kikal-a om kawmte, le a inndei golzaw pen, nisuahna kongpi-ate mah bangin a dung a vai kikim ciat hi. Tua kongpi lampi pen pi sawmgiat le li sau a, pi sawmlinih zai hi.

²²A inndei golzaw, a tawlette, le nisuh kung lim a kibawlte pen nisuahna lam kongpi-a omte mah tawh kibangin kikim hi. Hih lai-ah zong kongpi lampi tun nadingin kahlei dawl sagih om a, a nawlnung a om a inndei golzaw pen in a tual lam maingat hi.

²³Nisuahna lampang a om bang teek mahin, leilu lam kongpi pana lutna-a a tual galkhatah tual sungnung lutna kongpi lampi khat mah a om hi. Tua kongpi nih kikal a teh ciangin pi za le sawmguk giat a sau hi.

²⁴Tua ciangin a mipa in leitaw lampangah hong paipih a, tua lai-ah kongpi lampi khat mah na om leuleu hi. A teh ciangin a dangte mah tawh kikim hi.

²⁵Kongpi dang a omte mah bangin hih lai-ah zong inndeite in tawlet nei uh hi. A kongpi lampi pen pi sawmgiat le li sau-in pi sawmlinih zai hi.

²⁶Tua kongpi lampi tun nadingin kahlei cial sagih mah om a, a inndei golzaw pen a nawlnung mahah omin a tual lam a nga hi. Lampi omna lampang, kawm sungnungte’ tungah nisuh kung lim mah kibawl hi.

²⁷Hih lai-ah zong tual sungnung paina kongpi lampi khat mah om hi. A mipa in konglekong kikal a teh ciangin pi za le sawmguk giat a pha hi.

²⁸Tua ciangin leitaw lam kongpi tawnin tual sungnungah hong paipih hi. A lampi a teh ciangin a dangte mah tawh kikim hi.

²⁹A galvilna inndei neute, a inndei golzaw, le kawm sungnungte pen, kongpi dangate mah tawh kibang hi. Hih kongpi lama om inndei neute-ah zong tawlet om hi. A lampi pi sawmgiat le li sau-in, pi sawmlinih zai hi.

³⁰

³¹A inndei golzaw pen tual puanung lam a nga hi. Lampi pang tuak a kawmte tungah nisuh kung lim kibawl a, hih kongpi lampi tun nadingin kahlei cial giat a om hi.

³²Tua ciangin nisuahna lam kongpi tawnin a tual sungnungah hong paipih hi. A lampi a teh ciangin a dangte mah tawh kikim hi.

³³A galvilna inndei neute, a inndei golzaw, le a kawm sungnungte zong, kongpi dangate mah tawh kikim hi. A kimkotah tawlette om a, a inndei golzaw-ah zong a om hi. A lampi, pi sawmgiat le li sau a, pi sawmlinih zai hi.

³⁴A inndei golzaw pen a tual puanung lam nga hi. Lampi pang tuakah a om kawmte tungah nisuh kung lim kibawl a, hih kongpi lampi tunna dingin kahlei cial giat a om hi.

³⁵Tua ciangin leilu lam kongpi lampi-ah hong paipih a, a teh ciangin a dangte mah tawh kibang hi.

³⁶A dangte mah bangin hih in zong galvilna inndei neute, kawmsung lam tung kizemte, inndei golzaw pen, le a kimkotah tawlette a nei hi. A lampi pi sawmgiat le li sau a, pi sawmlinih zai hi.

³⁷A inndei golzaw pen a tual puanung lam nga hi. Lampi pang tuakah a om kawmte tungah nisuh kung lim kibawl a, hih kongpi lampi tunna dingin kahlei cial giat a om hi.

³⁸Tual puanung sungah lampi tawh a kimatin inndei gol khat om a, a inndei pen a tual lam a nga hi. Hih lai munah, biakna-in a pum-a a hal ding uh ganhing luangte silsiang uh hi.

³⁹Hih inndei gol sungah sabuai li om a, a lang tuakah nih tuakin kikoih hi. Meihal biakna-a piak ding ahi a, mawhna le khialhna hanga biakna-in piak ding ganhingte ahi zongin, hih sabuaite tungah go uh hi.

⁴⁰Hih inndei pualam, leilu lam kongpi lutna pang tuakah zong sabuai nih tuak, a vekin sabuai li mah om hi.

⁴¹Tua ahih manin inndei sungah sabuai li, a pua-ah sabuai li, a vekpi-in giat om a, hih sabuaite pen, biakna-in piak ding ganhingte gawhna-in a kizang ahi hi.

⁴²Meihal biakna-in piak ding ganhingte bawl nadingin a kizang sabuai lite pen suang a kiseek ahi hi. Tua sabuaite letmat sawmnih sang a, a dung a vai letmat sawmthum tuak ahi hi. Biakna-in piak ding gan gawhna-in a zat uh na khempeuh, hih sabuaite tungah koih uh hi.

⁴³Hih sabuaite’ kimkotah khutpeek cia bang a zai geihual kibawl hi. Biakna-in piak ding sa khempeuh hih sabuaite tungah kikoih hi.

⁴⁴Tua ciangin a pualam panin a tual sungnungah hong paipih a, a tual sungnungah inndei nih na om hi. Khat pen leilu lam kongpi lampangah omin leitaw lam nga a, a khat pen leitaw lam kongpi lampangah omin leilu lam nga hi.

⁴⁵A mipa in kei kiangah hih bangin hong gen hi: Leitaw lam a nga inndei pen biakinn sungah na a sem siampite a’ ding hi a,

⁴⁶leilu lam a nga inndei pen biakna tau-ah na a sem siampite-a’ ding ahi hi. Tua siampite khempeuh pen Zadok’ suan Levi mite vive ahi uh hi. Ama na a sem dingin TOPA’ omna-ah amaute bek kipaisak hi, hong ci hi.

⁴⁷A mipa in hih tual sungnung a teh ciangin a dung a vai pi zakhat sawmguk giat tuak a pha hi. A biakinn mai-ah biakna tau khat a om hi.

⁴⁸Tua ciangin biakinn sung lutna inndei-ah hong paipih hi. Amah in a sung lutna lampi teh a, pi kua sau-in pi sawmnih le li zai a, a pang tuak a kawmte pi nga tuak a sah hi.

⁴⁹Innsung lutna inndei pen pi sawmthum le li sau a, pi sawmnih zai a, tua lai tun nadingin kahlei cial sawm a om hi. Innsung lutna inndei pang tuakah khuampi khat tuak a om hi.