Read Tedim Chin EZEKIEL 41 Bible Online

EZEKIEL 41 - Tedim Chin bible

EZEKIEL 41

¹Tua ciangin a mipa in a laizang a om inndei-ah hong paipih hi. Tua inndei lutna lampi teh a,

²pi sawm le giat zai a, a pang tuak a om kawmte pi giat tuak a sah hi. A laizang a om inndei sung a teh ciangin pi sawmguk giat sau a, pi sawmthum le li zai hi.

³Tua ciangin inndei sungnungah amah pai a, tua sung lutna lampi a teh ciangin pi thum sau-in pi sawm zai a, a pang tuak a om kawmte pi sawm le nih tuak a sah hi.

⁴Tua inndei sungnung a teh ciangin a dung a vai pi sawmthum le li tuak a pha hi. Tua ciangin amah in kei kiangah, “Hih lai pen Siangtho Pen Mun ahi hi,” hong ci hi.

⁵Tua ciangin amah in biakinn kawm puanung teh a, pi sawm tak a sah hi. Hih kawm tawh a kimatin biakinn kimkotah inndei neuneu om a, tuate pi sagih vive a zai hi.

⁶Hih inndei neute dawl thum pha a, dawl khat gual paiphei suakah inndei neu sawmthum om hi. Tua inndei neute a dawl sanna tawh kizui-in a biakinn kawm pa to tektek a, tua inndei neute a nang dingin khuam a tuamin kul loin a biakinn kawm kimang toto hi.

⁷Tua biakinn kawm pang bela kibawl inndei neute sungah kahlei omto a, a dawl nuainung panin a tungnung dongin kizomto hi. A inndei neute a dawl sanna lamah a biakinn kawm a pat tektek mah bangin a sang lama om inndei neute a sung zai semsem hi.

⁸Biakinn kimkotteng a lei kitawito a, a mundangte sangin pi sawmin sangtozaw hi. Tua mun panin biakinn kawm le a kimkota inndei neute kipanto pan hi.

⁹Inndei neute a kawm sahna pi giat pha a,

¹⁰biakinn kimkotah suangphah bangin a kitawito-in a kibawl a zaina pi sawmthum le li ahi hi.

¹¹Biakinn kimkotah a om inndei neute-ah pai nading kongvang, leilu lamah khat omin, leitaw lamah khat om hi. Tua biakinn kimkotah pi giat paisuak a zai cial khat a om leuleu hi.

¹²Tua ciangin nitumna lamah biakinn lam a nga inn khat om hi. A inn dung pi zakhat sawmnga hi a, a vai pi zakhat sawm le guk hi a, a kimkota a kawm pi kua a sah hi.

¹³Tua ciangin mipa in biakinn teh a, pi zakhat sawmguk giat a pha hi. A kimkota mun awng, a innsung le a kawm tawh kigawmin pi zakhat sawmguk giat ahi hi.

¹⁴Nisuahna lampang biakinn mailam a vailam zong a mun awng tawh kigawmin pi zakhat sawmguk giat mah ahi hi.

¹⁵Tua ciangin biakinn nitumna lampangah a om, a tual lam a nga inn a sauna teh a, a kawm tegel tawh kigawmin pi zakhat sawmguk giat mah a pha hi. Biakinnsung lutna ding inndei, le a inndeipi, le Siangtho Pen Mun sungte pen

¹⁶a sual panin a kongvangneute ciang dong singpeek tawh kidap hi. A tawlette pen a pualam a kihui-in a kibawl ahi hi.

¹⁷Biakinn sunglam kawmte pen kongkhak zang ciang dong lim kibawlte tawh kidim a,

¹⁸nisuh kungte le kherub limte vive ahi hi. A masa-in nisuh kung, tua ciangin kherub, nisuh kung, kherub cih bangin a kimkot khempeuhah kihelhto dimdiam hi. Tua kherub-te in maitang nih ciat nei uh hi.

¹⁹A mihing maitang pen a pangkhat lama om nisuh kung lam nga a, a humpinelkai maitang pen a pang langkhat lama om nisuh kung lam a nga hi. A biakinnsung kimkotah hih bangin kibawl a,

²⁰sual panin kongkhak zang kikal sung khempeuhah a dimin a om hi.

²¹Biakinn deipi kongkhak khuamte pen a siik kikim vive ahi hi.

²²Tua ciangin Siangtho Pen Mun mai-ah sing tawh a kibawl biakna tau bang pian khat a om hi. Pi nga sang a, a dung a vai pi li ahi hi. A khete, a kingaknate, le a zawlte sing tawh a kibawl ahi hi. A mipa in kei kiangah, “Hih pen TOPA’ mai-ah a kikoih sabuai ahi hi,” hong ci hi.

²³Inndeipi sung lutna ding le Siangtho Pen Mun lutna dingah kongkhak a om hi.

²⁴Tua kongkhakte pen a laizangah a kituah, kongkhak peek nih nei-in a kibawl ahi hi.

²⁵Biakinnsung kawmte tungah a kibawl mah bangin hih biakinn deipi sung lutna-a kongkhakte tungah zong nisuh kung le kherub mah a kibawl hi. Kongkhak pualam, innsung lutna ding inndei sanah singpeek tawh liimsun khat a kibawl hi.

²⁶Hih inndeipi sung kawmte tungah a pualam a kihui tawlette om a, nisuh kungte tawh zepna zong a kibawl hi.