Read Tedim Chin EZEKIEL 42 Bible Online

EZEKIEL 42 - Tedim Chin bible

EZEKIEL 42

¹Tua ciangin mipa in a tual puanungah hong paipih a, biakinn nitumna lam mongah a om inn tawh a kigamla lo, biakinn leilu lama om inn khatah hong tunpih hi.

²Leilu lampang hih inn dung pi zakhat sawmguk giat hi a, a vai pi sawmgiat le li ahi hi.

³Tua inn pangkhat pen biakinn gei-a mun awng pi sawmthum le li a zai a omna lam nga a, a pang langkhat pen tual puanunga suangphah lam a nga hi. Tua inn pen cial thum a pha a kitawito tungah kilam a, a tunga a cialte pen a nuai-ate sangin neuto zaw tektek hi.

⁴Hih inn leilu lampangah pi sawm le guk zai-in, pi zakhat sawmguk giat a sau lampi khat tung a, a lutna kong zong tua lam mahah a om hi.

⁵A cial tungnungah a om inndeite pen a nuai-ate sangin neuzaw hi. Bang hang hiam cih leh tuate pen a sangto zaw, a kawcik zaw-ah om uh hi.

⁶Biakinn tuala a inn dangte mah bangin tua inndei dawl thumte pen a cial tungah kinga uh a, a tuamin khuam nei lo uh hi.

⁷A cial nuainung a om inndeite pen pi sawmgiat le li sau a, tua lai panin tua inngualte tawh a paikhawm hilhel pi sawmgiat le li mah a sau kulh khat a om hi. Tua ciangin biakinn galkhat lama om kulh pen pi zakhat sawmguk giat sau hi.

⁹Tua ciangin biakinn nitumna lama om ahi, kulh a kipatna mun a inn nisuahna lam mongah kongkhakte a om hi.

¹¹Leilu lampang a om mah bangin hih inndeite mai-ah zong lampi khat a om hi. A sauna, a pianzia le a kongte zong leilu lama om mah tawh kibang hi.

¹²Nisuahna lampang a kulh a kipatna mun a inn leitaw lamah kongkhakte a om hi.

¹³Tua ciangin a mipa in kei kiangah, “Leilu lama om leh leitaw lama om hih inn nihte pen biakna inn siangtho ahi hi. TOPA’ omna-ah a lut siampite in biakna-in a kipia a siangtho pente, hih innte sungah ne uh hi. Hih inndeite a siangtho ahih manin, a kipia nate an tawh biaknate le mawhna le khialhna hangin biakna-in a kipia sate, a sungah koih uh hi.

¹⁴Siampite in TOPA tungah biakna pia-in biakinn sungah a lut khit uh ciangin a pualamah a pusuah nop uhleh, TOPA tungah biakna a piak laitakun a silh uh puante suahin hih inndeite sungah koih ding uh hi. Tua lai panin puan dang silhin midangte omna-ah pai thei pan uh hi,” hong ci hi.

¹⁵A mipa in biakinn sunglamteng a teh a zawh khit ciangin nisuahna lam kongpi tawnin hong pusuahpih a, biakinn pualamteng a teh hi.

¹⁶Amah in a tehna piciang la-in nisuahna lampang teh a, pi zagiat sawmli a pha hi.

¹⁷Tua ciangin leilu lampang, leitaw lampang, le nitumna lampang teh a, a thumin a sauna kikimin pi zagiat sawmli ciat a pha hi.

²⁰Tua ahih manin a umna kulh a pang li-in a teh ciangin a pang li mahin kikim a, pang khat ciangin pi zagiat sawmli vive pha a, tua deina kulh pen biakna-a a siangtho le a mawkmawkte a kikhenna ahi hi.