Read Tedim Chin EZEKIEL 43 Bible Online

EZEKIEL 43 - Tedim Chin bible

EZEKIEL 43

¹Tua khit ciangin a mipa in biakinn nisuahna lama om kongpi-ah hong paipih a,

²nisuahna lam panin Israel-te’ Pasian’ minthanna vang hong pai ka mu hi. Pasian’ awging pen tuipi ging tawh kibang a, ama minthanna vang in leitung taangsak lela hi.

³Hih ka maangmuhna pen, Pasian in Jerusalem khuapi a susia dingin a pailai a ka muh leh Khebar Gun gei-a ka muh tawh kibang hi. Tua ciangin thakhatin leilak kidenna-in ka boksuk hi.

⁴TOPA’ minthanna vang in nisuahna lam kongpi tawnin biakinn sungah a lut hi.

⁵Tua ciangin TOPA’ kha in hong la-in a tual sungnungah hong paipih a, tua lai panin, TOPA’ minthanna vang tawh biakinnsung a kidimna ka mu hi.

⁶Tua lai mun panin kei kiangah a mipa a din laitakin biakinnsung panin TOPA in kei hong hopihna ka za a,

⁷“Mihing ahi Ezekiel aw, hih lai munah ka kumpi tokhom om hi. Israel mite lak hih lai munah ka teng ding a, amaute ka uk tawntung ding hi. Israel mite le a kumpite un pasian dang biakna tawh ahi a, a kumpi sisate uh phawkna ding mual bawlna tawh ahi zongin ka min siangtho daisak ngei nawn lo ding uh hi.

⁸Bang hang hiam cih leh a kumpite un a kongkhuam uh le a kongzawlte uh keima biakinn kongkhuam le kongzawlte tawh kimatin bawl uh a, ka kikal uh kawm bek in hong hal hi. A muhdahhuai a gamtatnate khempeuh uh tawh ka min siangtho hong daisak uh a, kei zong ka heh manin amaute ka susiamang hi.

⁹Ahi zongin tu-in amaute in pasian dangte bia nawn loin, a kumpi sisate uh phawkna a mual uh a phiat ding uh ahi hi. Tua bangin a gamtat nak-uhleh amaute lakah ka teng paisuak tawntung ding hi,” hong ci hi.

¹⁰Tua ciangin TOPA in a thugen hong zomlai a, “Mihing ahi Ezekiel aw, Israel mite tungah biakinn thu le a geelna khempeuh cingtakin lak inla, amaute’ mawh gamtatna hangin maizumsak in.

¹¹Amaute a gamtatnasate uh hangin hong maizum theih uhleh, biakinn geelna, a lim, a lutna le a pusuahna, a buppi lim, a na khempeuh a kigeelna, le a zat dan ding khempeuh a cingtakin amaute tungah laktel in la, amaute in a kigelnate thei-in a zat dan ding bangin a zuih theihna dingun amaute a dingin lai-in gelhsak in.

¹²Biakinn tawh kisai ngeina in: Mualtung a om biakinn kimkot mun khempeuh pen biakna tawh kisai-in a siangtho ahi hi.

¹³“Biakna tau golna pen hih bang hi ding hi. A teh nadingin biakinn tehna a kizang ngeite mah hi ding hi. A biakna tau bul kimkot pen letmat sawmnih sangin, letmat sawmnih mah zai ding a, a tau kimkotah letmat sawm a sangin geivial nei ding hi.

¹⁴A tau bul panin a tau zawl nuainung ciang pi li hi ding a, a sahna letmat sawmnih hi ding hi. Tua ban siah pi sagih sangto ding a, letmat sawmnih sah ding hi.

¹⁵A tungnung pen, ganhing kihalna mun pi sagih sang ding a, a kiu li-ah letmat sawmnih a sang ki om ciat ding hi.

¹⁶A biakna tau dawnzang pen a dung a vai a kikim hi ding a, pi sawmnih sau-in pi sawmnih mah zai ding hi.

¹⁷Biakna tau a paito a laizang santeng pen a dung a vai a kikim, pi sawmnih le li hi ding a, a nuai dawl sangin letmat sawm pai-in neuzaw ding hi. Tua a dinna a nuai gual kimkot letmat sawmnih pai-in zai ding hi. Biakna tau tung kahna ding kahlei pen nisuahna lampangah om ding hi,” hong ci hi.

¹⁸Tua ciangin Topa PASIAN in kei kiangah, “Mihing ahi Ezekiel aw, hih biakna tau zatna ding ngeinate hih bang hi ding hi: Biakna tau a kizawh khit ciangin a tungah meihal biakpiakna le biakpiakna ganhing site thehna tawh apna a bawl ding na hi hi.

¹⁹Zadok’ suanlekhak Levi siampite pen keima na a sem dingin ka omna-ah a hong pai dingte ahi uh hi. Topa PASIAN keimah in hih thu kong pia hi. Mawhna hangin biakna-a piak dingin amaute tungah bawngtal khat na pia ding hi.

²⁰Nangmah in a sisan pawlkhat la-in biakna tau kiu li-a om ki lite, biakna tau paito a laizang kiute, le a kimkotah a om a geihualte na nuh ding a, hih bangin hihna tawh biakna tau siansuahin na ap ding hi.

²¹Mawhna hangin biakna-in a kipia bawngtal pen la-in biakinn huang pualam, a mun hong kigenna sanah a hal ding na hi hi.

²²A zing ciangin paubaanna a om lo keeltal khat la-in mawhna hangin biakna-in na pia ding hi. Bawngtal si tawh na siansuah mah bangin hih keeltal si tawh zong biakna tau na siansuah ding hi.

²³Hih bangin siansuahna na man khit ciangin, paubaanna a om lo bawngtal khat le tuutal khat na la ding a,

²⁴TOPA ahi keima kiangah nong paipih ding hi. Siampite in tua ganhingte tungah ci thehin, keimah hong biakna-in tua ganhingte hal ding uh hi.

²⁵Mawhna hangin biakpiakna-in ni sagih sung nisimin, paubaanna a om lo keeltal khat, bawngtal khat, le tuutal khat a pia ding na hi uh hi.

²⁶Siampite in ni sagih sung biakna tau apna bawlin zattheih dingin a baihsa-in omsak ding uh hi.

²⁷Hih bangin ni sagih sung a hih khit uh ciangin, a ni giat ni-a kipanin siampite in meihal biakna le thunuama biakpiaknate, biakna tau tungah piak ding kipan ding uh hi. Tua ciangin note tungah kei ka lungkim ding hi. Topa PASIAN keimah in hih thu ka gen khin hi,” hong ci hi.