Read Tedim Chin EZEKIEL 44 Bible Online

EZEKIEL 44 - Tedim Chin bible

EZEKIEL 44

¹Tua ciangin a mipa in nisuahna lam biakinn huang kongpi pua-ah hong paipih a, a kongpi na kikhak hi.

²TOPA in kei kiangah, “Hih kongpi kikhak paisuak ding a, kihong kik ngei lo ding hi. Israel-te’ TOPA Pasian keimah in hih kongpi tawn khin ka hih manin kuamah dang in tawn thei nawn lo ding a, a kikhak den ding ahi hi.

³Ahi zongin hih lai-ah gam uk na a sem laitak ulianpa pen keima omna-ah biakna an siangtho a ne dingin hong pai thei ding hi. Amah hong pai ciangin inndeipi tawnin inndei sungnung kongvangah hong lutin tua lai mahah pusuak ding hi,” hong ci hi.

⁴Tua ciangin a mipa in leilu lam kongpi tawnin biakinn mai-ah hong paipih a, ka khuadak leh, TOPA’ biakinnsung khempeuh ama minthanna vang tawh na kidim hi. Kei zong leilak kidenna-in ka boksuk hi.

⁵Tua ciangin TOPA in kei kiangah, “Mihing ahi Ezekiel aw, tu-a na muh ding nate le na zak ding thute khempeuh hoihtakin ciamteh in. Ka biakinn a zatna ding ngeina om khempeuh tu-in a hong gen ding ka hi hi. Biakinn sungah a pai thei dingte le Siangtho Pen Munah a pai thei lo dingte khempeuh limtakin ciamteh in.

⁶A lehdo thei hih Israel mite tungah Topa PASIAN keimah in ka gen thute, hih bangin gen in: No Israel mite aw, a beisa huna a muhdahhuai na gamtatnate khempeuh uh khawl un.

⁷Keimah biakna-in sathaute le sasite nong piak uh ciangin, keima thu a mang lo, vun a ki-at lo gamdang mite a sungah na lutsak uh a, ka biakinn na ninsak uh hi. Tua bangin a muhdahhuai na gamtatnate uh tawh ka thuciamna na siasak uh hi.

⁸Ka biakinn sungah biakna ngeinate na zui kei uh a, ka biakinn sungah gamdang mite peuh na na semsak uh hi.

⁹“Tua ahih ciangin Topa PASIAN in tu-in kong genin-ah: Vun ki-at lo gamdang mite peuhmah ka biakinn sungah lut lo ding uh a, note lakah a teng gamdang mite nangawn lut lo ding uh hi.

¹⁰No Israel midangte bangin kei hong nusia-in milim a bia Levi mite in zong gim thuak ding uh hi.

¹¹Amaute in biakinn kongcin, biakinnsung nasepte sem thei ding uh hi. Meihal biakna-a kipia ganhingte le mite in biakna-in a piak ganhingte go thei ding uh a, mite’ na a sepsak dingin tavuan la ding uh hi.

¹²Ahi zongin amaute in milim biakna lamah Israel mite makai-in mawhna sungah Israel mite tunpih uh ahih ciangin, amaute gim ka piak ding, Topa PASIAN keimah nakpitakin ka kiciam hi.

¹³Amaute in keima siampi na sem loin, keima biakna na a siangtho nate nai-ah pai thei loin, Siangtho Pen Munah zong lut thei lo ding uh hi. Hihte pen, a muhdahhuai a gamtatnasate uh hangin a hamsiatna uh ahi hi.

¹⁴Ahi zongin biakinn sunga nasep a kisam dangte a sem dingin amaute ka seh thei ding hi, ci-in gen in,” hong ci hi.

¹⁵Tua ciangin Topa PASIAN in keima kiangah, “Zadok’ suanlekhak Levi mi siampite ahihleh, Israel mi adangte in kei hong nusiat laitakun, amaute in citakin biakinn sungah keima na hong sem uh ahih manin, tu-in amaute in keima na hong semin, keimah biakna-in sathaute le sasite keima kiangah hong pia ding uh hi.

¹⁶Ka biakinn sungah amaute lutin, ka biakna tau-ah na semin, biakinn sunga biaknate-ah makai ding uh hi.

¹⁷A tual sungnung paina kongpi-ah a lut uh ciangin saihadial puan silh ding uh hi. Tual sungnung sung le biakinn sungah na a sep laitakun samul puan peuhmah silhlo ding uh hi.

¹⁸Amaute in saiha dial puan khimin, saihadial puan tengin, khua-ul a suaksak thei kawnggak gak lo ding uh hi.

¹⁹Midangte a omna biakinntual puanungah a pusuah ma-un, biakinn sungah na a sep laitakun a zat uh puante suahin inndei siangtho sungah nusia ding uh hi. Tua lai panin amaute in puan dangte silhin pusuak ding uh hi. Tua hikeileh a biakna puan siangthote un midangte lawhkha ding hi.

²⁰“Amaute in a sam uh mettol lo ding uh a, a saulua-in zong hawi lo ding uh hi. A kilawm ciang bekin met ding uh hi.

²¹Biakinntual sungnungah a lut ma-un siampite in leenggahzu ne lo ding uh hi.

²²Meigong numei ahi a, a kimasa numei ahi zongin zi-in nei lo ding uh a, Israel nungak, ahih kei leh siampite’ zi meigongte bek tenpih thei ding uh hi.

²³“Amaute in ka mite tungah, biakna na a siangtho le a mawkmawk nate, le a nin le a siang nate a kilamdanna hilh ding uh hi.

²⁴Thunei khat peuhpeuh a om ciangin, keima ngeina omsa tawh kizui-in thu khen ding uh hi. A kiseh pawite a ngeina omsa bangin bawl ding uh a, Sabbath-te siangthosak ding uh hi.

²⁵Siampite pen misi lawnna tawh kininsak lo ding uh hi. Ahi zongin, a nu uh ahi a, a pa uh ahi a, a sanggam pasal uh ahih kei leh pasal a nei nai lo a sanggam numeite uh hangin kininsak thei ding uh hi.

²⁶Amaute a kisiansuah khit uh nipikal khat ciang bekin,

²⁷biakinntual sungnungah pai-in biakinn sungah na a sepkik theih nadingun kisiansuahna biakna pia ding uh hi. Topa PASIAN in hih thu ka gen khin hi.

²⁸“Israel mite tungah ka piak, khang khat pan khang khatah a kiluah suksuk ding sung panin siampite’ tanh pen siampi nasep za ahi hi. Amaute in Israel mite lakah neihsa gamh nei lo ding uh hi. Amaute’ kisapna khempeuhah kei a kicing khin ka hi hi.

²⁹An tawh biakna, mawhna le khialhna hanga biakna, le Israel mite lak panin keima a dingin a kipiakhiate khempeuh amaute in ne ding uh hi.

³⁰Anpal sung panin a limci penteng le kei tungah hong kipia na khempeuh, amaute in tang ding uh hi. Israel mite’ inn sungah ka thupha a tuntheih nadingin amaute in anlum a em simun, biakna-in siampite tungah a em masak penpen uh pia ding uh hi.

³¹Siampite in vasa ahi a, ganhing ahi zongin, sa’ nek baang hitaleh ama thu-in a sitawm mawkte hitaleh, ne lo ding uh hi.