Read Tedim Chin EZEKIEL 45 Bible Online

EZEKIEL 45 - Tedim Chin bible

EZEKIEL 45

¹“Israel minamte tungah piak dingin leitang a kihawm ciangin, TOPA’ tanh dingin seh khat kituamkoih ding hi. Tua a kituamkoih leitang pen a dung tai sawm hi ding a, a vai tai giat hi ding hi. Tua sung khempeuh a siangtho biakna leitang hi ding hi.

²Hih leitang sung panin biakinn ding tawh kisai-in a dung pi zagiat sawmli, a vai pi zagiat sawmli mah kisehin, tua banah a kimkot pi sawmgiat le li paisuak mun awng tawh hi lai ding hi.

³Hih biakna leitang siangtho sung panin siangtho pen mun le biakinn mun dingin a saulam tai sawm, a zailam tai li kisehkhia ding hi.

⁴Hih a kisehkhia mun sungteng pen biakna leitang siangtho hi ding a, TOPA’ biakinn sungah na a sem siampite a’ ding hi ding hi. Hih mun sungteng pen siampite’ inn lamna ding mun le biakinn lamna ding mun siangtho hi ding hi.

⁵Hih banah, a dung tai sawm, a vai tai li a pha sehkhat kibawl leuleu ding a, biakinn sungah na a sem Levi mite a’ ding hi ding hi. Tua sungtengah amaute’ tenna ding khua om ding hi.

⁶Khuapi huangsung dingin a dung tai sawm, a vai tai nih a pha leitang khat kisehkhia ding hi. Hih mun pen a siangtho leitang tawh kizom pah ding a, Israel mite khempeuh a’ ding hi ding hi.

⁷“Gam sung a uk uliante a dingin zong leitang kisehkhia ding hi. A siangtho leitang le khuapi huang panin kipanin nitumna lamah a gamgi ciang, nisuahna lamah zong a gamgi ciang mah hi ding a, nitumna pan nisuahna gamgi pen Israel minamte khat in a ngahzah tan mah hi ding hi.

⁸Hih munteng pen Israel gam sung panin Israel uliante’ neih hi ding hi. Tua ahih manin amaute in Israel mite bawlsia nawn lo ding uh a, mun a omlaiteng khempeuh, a minam zui-in Israel minamte a tangsak ding uh hi.

⁹“Topa PASIAN in hih bangin ci hi: No Israel a uk uliante aw, na mawh gamtatna uh sauveizo lua ta hi. Na ngongtatnate uh le mi na nenniamnate uh khawl unla, thuman thutangin na sem un. Amau’ leitang panun ka mite notkhia nawn kei un. Topa PASIAN keimah in hih thu kong gen hi.

¹⁰“Mi khempeuh in tawisuang man le tehna man zang ding uh hi.

¹¹An tehna bung le tui tehna bung kikim ding a, a kizang ding etkakna pen beem hi ding hi. Beem khatah an bung sawm, tui bung sawm mah hi ding hi.

¹²A gik tehna pen, gerah sawmnih ciang shekel khat, shekel sawmguk ciangin mina khat hi ding hi.

¹³“Biakna na piakna ding zia uh pen, mangbuh na neihzah uh pan sawmguk-ah khat, mangbuhham zong sawmguk-ah khat mah,

¹⁴sathau na neihzah uh sung pan seh za-ah khat (bung tawh tehin bung sawm ciangin beem khat-a seh),

¹⁵tuu na neih sung uh panin zanih ciangin khat hi ding hi. Hihte pen an tawh biakna, meihal biakna, thunuama biakpiaknate hi a, na mawhnate uh a maitheihna ding ahi hi. Topa PASIAN in hih thu kong pia hi.

¹⁶Israel mi khempeuh in hihte pen biakna-in a piak dingin, amau a uk ulianpa tungah puak ding uh hi.

¹⁷Gam uk ulianpa in biakna-in piak ding ganhingte, an tawh biakna-in zat dingte, le pawi khempeuh, Khadet ni, Sabbath nite-in Israel mibuppite a dingin tuiphih biaknate a piak ding ama nasep ahi hi. Israel mite’ mawhna a maitheih nadingin mawhna hanga biakna, an tawh biakna, meihal biakna, le thunuama biakpiakna-in a zat dingte khempeuh amah in a si ding ahi hi.

¹⁸“Topa PASIAN in hih bangin ci hi: Kha khatna a ni masa ni-in paubaanna a om lo bawngtal khat biakna-in pia-in biakinn a siangsak ding na hi uh hi.

¹⁹Siampipa in mawhna hanga biakpiakna ganhing si pawlkhat la-in biakinn kongkhuamte, biakna tau ki lite, le tual sungnung lutna kong khuamte nuh ding hi.

²⁰Tua bangmahin tua kha a ni sagih ni-in zong, tup lohpi le theih lohna hangin a khialkha mite a dingin siansuahna a bawl ding na hi uh hi. Tu-a bang danin biakinn a siangthosak ding na hi uh hi.

²¹“A kha masa a ni sawm le li ni-in Paisan Pawi na kipan ding uh a, mi khempeuh in ni sagih sung silngo sawh loh anlum na ne ding uh hi.

²²Tua pawi bawl a kipat ni-in gam uk ulianpa in amah le mi khempeuh a dingin mawhna hanga biakpiakna-in bawngtal khat pia ding hi.

²³Tua pawi ni sagih sung nisimin paubaanna a om lo bawngtal sagih le tuutal sagih la-in TOPA tungah meihal biakna-in pia ding a, tua banah mawhna hanga biakna-in nisimin keeltal khat zong a pia ding ahi hi.

²⁴Bawngtal le tuutal a kipiazah tawh kizui-in an tawh biak nadingin an bung khat pai le sathau biing khat pai tawh piakhawm ding hi.

²⁵“A kha sagihna a ni sawm le nga ni-in nipikal khat sung a kibawl ding Buk Pawi kipan ding a, mawhna hanga biakpiakna, meihal biakna, le an tawh biakna-in piak dingin an le sathaute, nisimin a kisamzah, gam uk ulianpa in pia ding hi.