Read Tedim Chin EZEKIEL 46 Bible Online

EZEKIEL 46 - Tedim Chin bible

EZEKIEL 46

¹“Topa PASIAN in hih bangin ci hi: Nisuahna lama om, tual sungnung kongpi pen nasep ni guk sung kikhakcip ding a, ahi zongin Sabbath ni le Khadet ni-in kihong ding hi.

²Siampite in meihal biakna le thunuama biakna a piak laitakun, gam uk ulianpa pen tual puanung lam panin inndei lianpi kongpi-ah pai-in kongpi khuamte gei-ah ding ding a, tua kongpi-ah bia-in tua khit ciangin pusuak kik ding hi. Nitak mateng tua kongpi kikhak lo ding hi.

³Sabbath ni le Khadet nisimin mi khempeuh in zong tua kongpi mai-ah TOPA bia-in kun ding uh hi.

⁴Gam uk ulianpa in Sabbath ni-in meihal biak nadingin paubaanna a om lo tuuno guk le tuutal khat pia ding hi.

⁵Tua ganhingte tawh a piakkhawm ding an tawh biakpiak nadingin zong, tuutal khat ciangin an bung khat kizuisak ding a, tuunote tawh piakkhop ding pen ama piaknop zahzah hi ding hi. An bung khat a piakna-ah sathau biing dim khat tawh kizuisak ding hi.

⁶Khadet ni ciangin paubaanna a om lo bawngtal khat, tuuno guk, le tuutal khat hi ding hi.

⁷Tuate tawh piakkhop dingin an tawh biakpiak nadingin bawngtal le tuutalte khat ciangin an bung khat pai, le tuunote tawh piakkhop ding pen ama piaknop zahzah hi ding hi. An bung khat a piakna-ah sathau biing dim khat tawh kizuisak ding hi.

⁸Gam uk ulianpa in a kuanlamin a tot lampiteng mah a ciah ciangin tawnin, inndeipi kongpi mahah pusuak ding hi.

⁹“A kiseh pawi hunte-ah TOPA a bia dingin a hong pai mite khempeuh pen a hong lutna kongpi zui-in kileh kik lo ding uh a, tangtakin paisuak ding uh hi. Leilu lam kongpi panin a lutte, leitaw lam kongpi-ah ciah ding uh a, leitaw lam kongpi panin a lutte, leilu lam kongpi-ah ciah ding uh hi.

¹⁰Gam uk ulianpa zong mihonte mah tawh lutin, amaute mah tawh pusuak khawm ding hi.

¹¹Pawi nite le a kiseh pawi hunte-ah an tawh biakna-in piak ding pen, bawngtal ahi a, tuutal ahi zongin khat ciangin an bung khat in zui ding a, tuunote tawh piakkhawm ding pen a mite’ piaknop zahzah hi ding hi. An bung khat a kipiak ciangin sathau biing dim khat in zui ding hi.

¹²Gam uk ulianpa in ama utthu-in biakpiakna, meihal biakna ahi a, thunuama biakna ahi zongin khat peuhpeuh a piak ciangin, ama lut nadingin nisuahna lama om tual sungnung kongpi kihonsak ding hi. Amah in Sabbath ni-in biakpiakna a bawl mah bangin pia ding hi. Amah a ciahkik khit ciangin a kongpi kikhak ding hi.

¹³“Gam uk ulianpa in meihal biakna-in piak dingin paubaanna a om lo kum khat a pha tuuno khat, zingsang simin TOPA’ tungah biakna-in pia ding hi. Hih pen nisimin a kipia ding ahi hi.

¹⁴Mangbuhnel lawh dim khat le a meek khoppih ding sathau hai khat tawh, an tawh biakna-in zong, nisimin pia ding hi. Hih meihal biakpiakna ngeina pen a kip paisuak ding ahi hi.

¹⁵Tua bangin tuuno, mangbuhnel, le sathau, zingsang simin TOPA tungah a kipia ngitnget ding ahi hi.

¹⁶“Topa PASIAN in hih bangin ci hi: Gam uk ulianpa in ama neihsa leitang mun khat peuhpeuh, a tapate khat peuhpeuh tungah a piak leh, tua leitang a ngah a tapa in a luah gamh-in nei paisuak ding hi.

¹⁷Ahi zongin gam uk ulianpa in ama nasemte khat peuhpeuh tungah leitang a piak leh, suahtakna kum a tun ciangin tua leitang pen a pia gam ukpa’ neihsa suakkik ding hi. Bang hang hiam cih leh tua leitang pen ama neihsa hi a, amah le a tapate bek in nei paisuak thei ding uh hi.

¹⁸Gam uk ulianpa in midangte’ neihsa leitang laksak ngei lo ding hi. Ama tungah a kipia leitang sung panin a tapate khenkhia bek ding hi. Ka mite’ leitang laksakin, bawlsia lo ding hi, ci-in gen in,” hong ci hi.

¹⁹Tua ciangin a mipa in biakinntual sungnung leitaw lamah a om kongpi gei-a inndeite-ah hong paipih hi. Hih inndeite pen siampite’ zat ding a siangtho inndeite ahi hi. Amah in tua inndeite’ omna nitumna lampang mong hong kawk a,

²⁰“Hih mun pen, siampite in mawhna le khialhna hangin biakna-in a kipia sate a huanna mun le an tawh biakpiaknate a emna ding mun ahi hi. Hih pen, tual puanungah biakna sa le ante paipihkha loin, tua a siangtho nate tawh tual puanunga om mite a lawhsakkhak loh nading uh ahi hi,” hong ci hi.

²¹Tua ciangin tual puanungah hong pusuahpih a, a tual kiu lite hong lak hi. Tua tual kiu lite’ kiu-ah tualno khat ciat na om hi.

²²Tua tualnote pi sawmguk giat sau-in pi sawmli le giat zai a, a vekin a golna kikim hi.

²³Tua tualno lite a umna kawm dingin suang kiciang ciat a, tua a kawmte belin meikhuk a om hi.

²⁴A mipa in, “Hihte pen, mite in biakna-in a piak sate, biakinnsung nasemte in a huanna anbuk ahi hi,” hong ci hi.