Read Tedim Chin EZEKIEL 47 Bible Online

EZEKIEL 47 - Tedim Chin bible

EZEKIEL 47

¹Tua ciangin biakinn lutna kongkhakah hong paipih kik hi. Biakinn kongkhak sangkil nuai panin tui luang a, biakinn ngatna nisuahna lamah luang sukin, biakna tau leitaw lampang tawn suk hi.

²Tua ciangin a mipa in leilu lam kongpi tawnin hong pusuahpih a, nisuahna lam kongpi pualamah hong paipih hi. Leitaw lam kulhkongpi-ah a tui hong luangkhia hi.

³A mipa in a tehna piciang tawi-in a tui luanna nisuahna lam pi tulkhat zaguk sawmgiat ciang dong tehsuk a, a tui kei hong ngaptansak hi. A tui pen siakmit ciang bek thuk hi.

⁴Tua ciangin pi tulkhat zaguk sawmgiat ciang tehsuk leuleu a, tua lai-ah a tui hong ngaptansak a, khuk ciang tum hi. Tua ciangin pi tulkhat zaguk sawmgiat ciang tehsuk leuleu-in a tui hong ngaptansak a, ka kawng ciang tum hi.

⁵Tua ciangin pi tulkhat zaguk sawmgiat ciang mah tehsuk lai leuleu a, a tui thuklua ta ahih manin ka ngapzo kei hi. Thuklua ahih manin a tui i peek loh buangin a kikantan zo ding hi lo hi.

⁶Tua ciangin amah in, “Mihing ahi Ezekiel aw, hihte khempeuh hoihtakin ciamteh in,” hong ci hi. Tua ciangin a mipa in tua gun gei mahah hong paipih kik a,

⁷tua lai mun ka tun ciangin a gun lang nih tuakah singkung tampi tak a po ka mu hi.

⁸Amah in kei kiangah, “Hih tui pen nisuahna lam manawhin gam sung nawkin Jordan Kuam-ah luangsukin Si Tuipi sungah tung hi. Si Tuipi a tun ciangin hih tui in tuipi tui pen, tuisiang suaksakkik hi.

⁹Hih tui a luanna mun peuhpeuhah ganhing namkim le ngasa tampi om hi. Hih tui in Si Tuipi tui siangsakkikin, a luanna peuhpeuhah nuntakna omsakkik ding hi.

¹⁰Engedi khua panin Eneglaim khua ciang dong tuipi dungah ngasa bengte omin, tua dungah a ngen uh zalin phokeu ding uh hi. Mediterranean Tuipi sungah ngasa a omzah mah bangin ngasa nam tampi om ding hi.

¹¹Ahi zongin tuipi dunga om nawnglakte le bualte-a om tuite siang lo ding a, cikhuk dingin a tuaci mahin omlai ding uh hi.

¹²Hih gun pang tuakah a gah nek dingin singkung nam khempeuh po ding hi. A tehte pulh ngei lo ding a, a gah tawh zong kilawi ngei lo ding hi. Biakinn panin a luangkhia tui ngah ding uh ahih manin khasimin a gah thak gah tawntung ding uh hi. A singgahte an ding hi ding a, a tehte zatui-in kizang ding hi,” hong ci hi.

¹³Tua ciangin Topa PASIAN in kei kiangah, “Israel minam sawm le nihte’ gamh dingin leitang hawm ding a gamgi ding hih bang hi ding hi. Josef minamte in a dangte’ ngahzah nih ngah ding uh hi.

¹⁴Hih gam na pu na pate uh tanh dingin ka piakna ding thu, amaute tungah thupi takin ka kiciam khinzo hi. Tua ahih manin tu-in note’ lakah a kikim dimdiamin hawm un.

¹⁵“Leilu lam gamgi pen, Mediterranean Tuipi panin kipanin Hethlon khuapi-ah, Hamath khua lutna-ah, Zedad khuapi-ah,

¹⁶tua panin Berothah le Sibraim khuapite-ah (hih khuate pen Damaskas kumpi gam le Hamath kumpi gam kikalah om hi), tua panin Hazerhattikon khuapi (Hauran kumpi gamgi gei-a om) hi ding hi.

¹⁷Leilu lam gamgi pen Mediterranean Tuipi a kipanin nisuahna lam manawhin Damaskas le Hamath gamgi a om Hazarenan khuapi ciang hi ding hi.

¹⁸“Nisuahna lam gamgi pen, Damaskas le Hauran gamgi kituahna panin hong kipan sukin, Jordan Gun zuisuk a, Jordan Gun nitumna lampangteng Israel gam hi-in, nisuahna lampangteng Gilead gam hi a, tua panin Si Tuipi kimang sukin Tamar khuapi ciang hisuk ding hi.

¹⁹“Leitaw lam gamgi pen, Tamar khuapi panin hong kipanin Meribathkadesh bual hong nawkin, tua panin sak nitumna lam manawhin Egypt gamgi zuito-in Mediterranean Tuipi sun ding hi.

²⁰“Nitumna lam gamgi pen, Mediterranean Tuipi hito-in, Hamath khualutna tawh a kitang ciang hito ding hi.

²¹“Tua ahih ciangin hih gam sungteng, no Israel minamte lakah hawm un.

²²Note a dingin na neih kip tawntung ding uh gamh hi ding hi. Hih leitang na hawm uh ciangin note lakah hong tengin ta a nei khinsa minam dangte zong note mah bangin tanh na pia ding uh hi. Amaute pen Israel minam taktakte mah bangin na ngaihsun ding uh a, Israel minam dangte mah bangin leitang hawmna-ah ai sawk thei ding uh hi.

²³Note’ lakah a teng gamdang mite in amau’ tenna minamte tawh leitang ngahkhawm ding uh hi. Topa PASIAN in hih thu kong gen khin hi.