Read Tedim Chin EZEKIEL 48 Bible Online

EZEKIEL 48 - Tedim Chin bible

EZEKIEL 48

¹“Leilu lam gamgi pen, Mediterranean Tuipi panin kipanin Hethlon khuapi-ah, Hamath khua lutna-ah, tua panin Damaskas le Hamath gamgi kituahna sana om Hazarenan khuapi ciang sun ding hi. Minam khat in leitang khen khat ciat ngah ding uh a, a kikal uh gamgite pen gambup nisuahna gamgi panin gambup nitumna gamgi ciang hi ding a, leilu lam panin a hawm uh kipan suk ding uh hi. Leilu lam a khungnung penah Dan minamte,

²a zomah Asher Minamte,

³a zomah Naftali Minamte,

⁴a zomah Manasseh Minamte,

⁵a zomah Efraim Minamte,

⁶a zomah Reuben Minamte,

⁷a zomah Judah Minamte hi ding hi.

⁸“Tuate zomah Pasian a dingin a kipia leitang hi ding a, a zaina pen leilu lam panin a kipan leitaw lam tai sawm hi ding hi. A dunglam pen gambup nisuahna gamgi panin gambup nitumna gamgi dong, minam dangte’ ngahzah tan mah hi ding a, a laizang sanah biakinn om ding hi.

⁹TOPA a dingin a kipia leitang a sauna tai sawm hi ding a, a zaina tai giat hi ding hi.

¹⁰Siampite in hih a siangtho leitang sung panin tanh ngah ding uh a, leilu lampang le leitaw lampang tai sawm tuak hi-in, nisuahna lam le nitumna lampang tai li tuak hi ding hi. Siampite’ ngahna sung hih leitang laizangah TOPA’ biakinn om ding hi.

¹¹Hih munteng pen Zadok’ suanlekhak siampite a’ ding ahi hi. Bang hang hiam cih leh Israel midangte a gamtat khialh uh ciangin Levi midangte bangin va zui lo uh a, hih mite in citakin keima na hong sem uh hi.

¹²Tua ahih manin Levi midangte zomah hih bangin a mun tuam diak khat nei ding uh a, tua mun a siangtho pen mun khat hi ding hi.

¹³Hih siampite’ zomah Levi mite in leitang ngah ding uh a, a sauna tai sawm hi-in, a zaina tai li hi ding hi.

¹⁴TOPA tungah a kipia hih leitang siangtho pen, leitang khempeuh panin a hoihpen mun hi a, hih leitang sung panin mun khat peuhpeuh, kizuak thei lo, adang tawh zong kikhek thei lo, midang tungah zong kipia thei lo ding hi. Hih leitang pen a siangtho leitang hi a, TOPA-a’ ahi hi.

¹⁵“A omlai leitang, a sauna tai sawm le a zaina tai nih pen a siangtho leitang hi loin a mawkmawk leitang hi ding a, mite’ taang zat ding mun hi ding hi. Tenna ding le a mun awngthawl hi ding a, a laizangah khuapi om ding hi.

¹⁶A khuapi golna a dung a vai-in a kikim hi ding a, a pang li-in pang khat ciangin pi tulsagih zanga sawmguk hi ding hi.

¹⁷Khuapi kimkot paisuakah pi zali sawmnih paisuak a zai mun awng om ding hi.

¹⁸Khuapi a kilam khit ciangin a siangtho leitang lamah a awng lai, nisuahna lam tai li, nitumna lam tai li a omlaiteng pen khuapi sungah a teng mite in a khawh ding leitang hi ding hi.

¹⁹Khuapi sungah nasemin a om mi peuhmah in Israel minam sung panin kuamah kideidanna om loin hih leitang kho thei ding uh hi.

²⁰Hih a kisehkhia leitang buppi pen a pang li-in tai sawm pai hi ding a, hih pen leitang siangtho le khuapihuam sung kigawm hi ding hi.

²¹“A pang li-in tai sawm paisuak a pha, TOPA a dingin a kipia leitang le khuapi huamteng a kilakkhiat khit ciangin, a pang tuakah a omlai leitang, nitumna lamah tuipi dong, nisuahna lamah gambup gamgi dong, gam uk uliante a’ ding hi ding hi. Hih leitang a kipia kikal sungah, biakinn, TOPA’ tungah a kipia leitang, Levi mite a kipia leitang, le khuapihuam leitangte om ding a, gam uk uliante’ leitang in hihte laitaak ding hi. Hih gam uk uliante’ leitang pen leilu lamah Judah Minamte a’ le leitaw lamah Benjamin Minamte a’ kikalah om ding hi.

²³“Hih leitang panin leitaw lampangah, Israel minam a omlaite in leitang ngah ding uh a, a kikal uh gamgite pen gambup nisuahna gamgi panin gambup nitumna gamgi ciang hi ding a, leilu lam panin a hawm uh kipan suk ding uh hi. Leilu lam a khungnung penah a ngah ding Benjamin Minamte,

²⁴a zomah Simeon Minamte,

²⁵a zomah Issakhar Minamte,

²⁶a zomah Zebulun Minamte,

²⁷a zomah Gad Minamte hi ding hi.

²⁸“Leitaw lam panin Gad Minamte a kipia leitang banah gambup gamgi om ding a, Tamar khuapi panin kipanin Meribathkadesh bual nawk ding a, tua panin sak nitumna lam manawhin Egypt-te’ gamgi zui ding a, Mediterranean Tuipi-ah tawp ding hi.

²⁹Tu-a ka gen bangin Israel minamte in a khang a khangin a luah suksuk ding uh leitang dingin amaute tungah a kipia ding leitang ahi hi. Topa PASIAN in hih thu kong gen khin hi.

³⁰“A khuapi sungah lutna ding kulhkongpite om hi. A khuapikulh pang lite, pang khat ciangin pi tulsagih zanga sawmguk sau hi. A pang khatah kulhkongpi thum ciat om a, Israel minamte khat ciat tam hi. Leilu lampang a om kulhkongpi thumte in Reuben, Judah, le Levi tam hi. Nisuahna lampang a omte in Josef, Benjamin, le Dan tam hi. Leitaw lampang a omte in Simeon, Issakhar, le Zebulun tam hi. Nitumna lampang a omte in Gad, Asher, le Naftali tam uh hi.

³⁵Khuapi kimkot a sauna pi tul sawmthum zanih sawmli pha a, tu a kipanin hih khuapi min pen, ‘Hih lai-ah TOPA om hi,’ kici ding hi,” hong ci hi.