Read Tedim Chin EZEKIEL 5 Bible Online

EZEKIEL 5 - Tedim Chin bible

EZEKIEL 5

¹Tua ciangin amah in, “Mihing ahi Ezekiel aw, namsau hiam khat la inla, na sam le na khamul ki-atkhia in. Tua ciangin a multe tawi tehin seh thum suah in.

²Umcihna lim na man ciangin khuapi lim sungah seh khat haltum in. Tua ciangin seh khat la leuleu inla, khuapi kiimah na paikawmin na namsau tawh satnen in. A omlai seh khat pen huihlakah lawn in. Keimah in ka namsau tawh tuate ka sat ding hi.

³Tua ciangin a multe tawmno khat la inla, na puanmongteep-ah tun in.

⁴Tua ciangin na tunsate sung panin tawmcikkhat la leuleu inla, meikuang sungah lawnin kangtumsak in. Tua sung panin mei hong kuangin Israel minam buppi hong lawh ding hi,” a hong ci hi.

⁵Tua ciangin Topa PASIAN in, “Hih Jerusalem khuapi lim en in. Leitung laizangah ka koih a, a kimkotah gamdang khempeuh ka omsak hi.

⁶Ahi zongin Jerusalem in ka thupiakna lehdo-in, minam dangte sangin a gilo zaw hong suak a, a kiima om gamdangte sangin a thumang lo zaw hong suak hi. Jerusalem in ka thupiakte nialin, ka thukhamte zui nuam lo hi.

⁷Jerusalem aw, tu-in Topa PASIAN ahi keima thugente ngai in. Ka thukhamte zui loin, ka thupiakte ngai lo na hih manin na kiima om minam dangte sangin siatna tamzaw na piangsak hi. Minam dangte’ gamtat ngeinate na zui hi.

⁸Tua ahih manin Topa PASIAN ahi keimah in nang kong langpanna thu a hong gen ka hi hi. Minam dang khempeuhte’ muhin nang tungah thu kong khen ding hi.

⁹Ka deih loh hih nate khempeuh na gamtatna hangin cikmahin ka hih ngei nai loh, cikmah ciangin zong ka hih nawn loh ding thu tawh nang Jerusalem gim kong pia ding hi.

¹⁰Tua kong gimpiakna hangin nang Jerusalem khuapi sungah papite in a tapate’ sa ne-in, tapate in a pate uh’ sa ne ding uh hi. No a mite gim kong pia ding a, a suaktakha sunsunte nangawn mun khempeuhah kong thehthang gawp ding hi.

¹¹“Tua ahih ciangin Topa PASIAN ahi keimah a nungta ka hih mah bangin, note in siatna nam khempeuh le a muhdahhuai gamtatna tawh ka biakinn ninsak na hih manun cikze hetloin note kong sukmang taak kei leh, ci-in ka kiciam hi.

¹²Note seh thum suah seh khat pen cina le gilkialin khuapi sungah na si ding uh hi. Seh thum suah seh khat, khuapi kiimah namsau-in na si ding uh hi. A omlai seh thum suah seh khat ahihleh mun khempeuhah hong thehthangin namsau tawh kong delh ding hi.

¹³“Ka lung a kim dongin kong hih ding a, ka hehna le ka sinsona teng na thuak ding uh hi. Note tungah hih thute hong tun ciangin, note’ cihtak lohna hangin deihsak luatna tawh a hong heh pau ka hihna na phawk ding uh hi.

¹⁴Na kiim uhah a om minamte in note hong muhkhak uh ciangin hong phitsanin hong pelh ding uh hi.

¹⁵Note tungah hehin sinsona tawh gim kong piak ciangin na kim uha a om minam dangte khempeuh lau ding uh hi. Amaute in note hong muhdah et-in hong simmawhbawl ding uh hi.

¹⁶Na annek ding uh hong khaktan sakin note kong puksisak ding hi. Note a hong susia ding gilkialna pen thaltang’ kapkhak bangin na na sa velval ding uh hi.

¹⁷Na tate uh a sisak dingin kialpi hong tungsakin, a that dingin gamsate kong paisak ding hi. Natna, gal kidona, le gal kikapnate in note hong sisak ding hi. TOPA ahi keimah in hih thu kong gen khin hi,” a hong ci hi.