Read Tedim Chin EZEKIEL 6 Bible Online

EZEKIEL 6 - Tedim Chin bible

EZEKIEL 6

¹TOPA in kei kiangah thu hong gen a,

²“Mihing ahi Ezekiel aw, Israel mualsang dawnte en inla, amaute tungah kong thupiak gen in.

³Topa PASIAN ahi keimah in mual liante, mual neute, guam thukte, kuampite kiangah ka gen ding thute, Israel minamte in a ngaihna ding uh gen in. Mite in milim a biakna munte a vatgawp dingin namsau khat kong kuansak ding hi.

⁴Biakna taute kiphelkek ding a, paknamtui taute kisatkham ding hi. Tua lai-ah a om mi khempeuh kithatin, a milimte uh’ mai-ah kipaithang gawp ding hi.

⁵Israel misi luanghawmte ka thehthang gawp ding a, a guhte uh biakna tau kiimah ka lawnthang gawp ding hi.

⁶Israel khuapite khempeuh beimang ding a, milim a biakna uh mun khempeuh kisusia ding hi. Tua ahih manin a biakna taute uh le a milimte uh vutlevai suakin, a paknamtui taute uh kisatvui gawp ding ahih manin, milim biak nadingin a bawlsa khempeuh uh maimang ding hi.

⁷Mun citengah mi kithatlum ding a, a suakta sunsunte in kei pen TOPA ka hih lamtak hong phawk ding uh hi.

⁸“Tua banga kihonthahna panin pawlkhat ka suaktasak ding a, minam dangte lakah kithehthangin,

⁹salin a om ding uh hi. Tua bangin salin a omna uh mun panin, amau’ lungsim cihtak lohna uh hangin kei hong nusiatna uh le keimah sangin milim a deihzawkna uh hangin a maizum nadingun gim a pia ding ka hih lamtak thei-in kei hong phawk ding uh hi. Amau’ gitlohna le a haitatnasate uh hangin amau mahmah kimudahtawm ding uh hi.

¹⁰Tua ciangin kei pen TOPA ka hih lamtak hong thei ding uh a, amaute gimpiak ding ka genkholhnate a mawkpau ka hihlohlam a phawk ding uh hi,” a hong ci hi.

¹¹Tua ciangin Topa PASIAN in, “Israel mite’ gitlohna le a muhdahhuai a gamtatnate khempeuh uh hangin na khut singin lei tuan inla, a dahin kap in. Amaute galkidona, kial, le natna hangin si ding uh hi.

¹²A gamla a om mite cina-in si ding uh a, a nai-a omte gal sungah si ding uh hi. A omlai sunte gilkialin puksi ding uh hi. Amaute in keima hehna thuak ding uh hi.

¹³Milimte’ lak le biakna tau kiimah si luanghawm kithehthang ding a, mual sang tungteng, mual dawnzangteng, singniim nuai citeng, tawsaw kung lian nuai khempeuh, le milim biakna-in paknamtui a halna uh mun khempeuhah si luanghawm om ziazua kawikawi ding hi. Tua ciangin TOPA ka hih lamtak mi khempeuh in hong thei ding uh hi.

¹⁴Keimah in ka khut zanin a gam khempeuh uh ka susia ding hi. Leitaw lam sehnel gam pan a kipanin leilu lam Riblah khuapi dongin, Israel mite’ omna mun khempeuh, siit nei loin ka vatmai ding hi. Tua ciangin TOPA ka hih lamtak mi khempeuh in hong thei ding uh hi,” a hong ci hi.