Read Tedim Chin EZEKIEL 7 Bible Online

EZEKIEL 7 - Tedim Chin bible

EZEKIEL 7

¹TOPA in kei kiangah thu hong gen a,

²“Mihing ahi Ezekiel aw, Topa PASIAN ahi keimah in Israel leitang tawh kisai-in ka gen thu hih bang ahi hi: A beina hita! Gam buppi a beina hita hi.

³Israel-te aw, tu-in na beina ding uh hong tungta a, note in ka hehna tu-in na thuakta ding uh hi. Na gamtatnasa uh tawh kizui-in thu kong khen ding a, na gamtatsiatna uh tawh kizui-in gim kong pia ding hi.

⁴Note kong zah kei ding a, zong kong khasiat kei ding hi. A muhdahhuai na gamtatnasate uh tawh kizui-in gim kong pia ding a, tua ciangin TOPA ka hih lamtak na hong thei ding uh hi,” a hong ci hi.

⁵Topa PASIAN in a gen thu in: “Note’ tungah haksatna khat khit khat a banbanin hong tung thuahthuah ding hi.

⁶A beina hong tungta hi. Note a man na hita uh hi.

⁷Israel gam sungah a teng note’ beina ding hong tungta ding hi. Mualsang dawn citeng a biakna munte-ah lungdamna om nawn loin buaina bek a omna ding hong naita hi.

⁸A sawt loin ka hehna thu na thuak ding uh a, na gamtatnasate uh hangin thu hong khenin, a muhdahhuai na gamtatnate uh hangin gim kong pia ding hi.

⁹Note kong zah kei ding a, zong kong khasiat kei ding hi. A muhdahhuai na gamtatnasate uh hangin gim a hong pia ding ka hi hi. Tua ciangin TOPA ka hihna le note tungah gim a hong piapa ka hihna na thei ding uh hi.

¹⁰“Siatna ding hun hong tungta hi. Na ngongtatna uh khang a, na kiphatsakna uh lian hi.

¹¹Migilote’ hauhna le lungmuannate haksa loin beimang ding hi.

¹²A hun hong tungta a, a ni hong naita hi. Mi khempeuh tungah ka hehna hong tungta ding ahih manin sumlei sumzuak nasepnate a kimanna om nawn lo hi.

¹³A neihsa a zuakkhia pa in a nuntak sungin a zuaksa van ngahkik lo ding hi. Mi khempeuh tungah hehna hong tung ahih manin a mawhna hangun kuamah nungta lo ding uh hi.

¹⁴“Amaute in gal peengkul tum uh a, a vekpi-un kiging uh hi. Ahi zongin mi khempeuh tungah ka hehna tungkim ding ahih manin galsim dingin kuamah kuankhia zo lo ding hi.

¹⁵Khua pualamah galkidona om a, khua sungah cinatna le gilkialna om hi. Gamlak a om khempeuh gal sungah si ding uh a, khuasunga om khempeuh cina le gilkialin si ding uh hi.

¹⁶Vakhu lau bangin mi pawlkhatte in mualtung tuh ding uh a, ahi zongin amau’ mawhna hangin si veve ding uh hi.

¹⁷Mi khempeuh’ khut zaw dakdakin, a khuk uh ling kelkel ding hi.

¹⁸Amaute in dahna limin puanhampi silh ding uh a, pumlingawp ding uh hi. A sam uh kimettolsak ding a, a mindai ding uh hi.

¹⁹TOPA’ hehna amau’ tungah a tun ni ciangin, a ngun a khamte un amaute suahtak thei lo ahih manin, a ngun a khamte uh nin bangin kongzing lakah paai ding uh hi. A gilkial uh ciangin zong an bangin tuate ne thei lo uh hi. Ngun le khamte in mawhna sungah amaute tumpihzaw hi.

²⁰Amaute in a kiphatsakpih uh kizepna a manphate, a muhdahhuai milim dingin a bawl uh hi. Tua ahih manin amaute’ hauhna pen amau mah in a kih dingin ka bawl hi.

²¹Amau’ nate, gamdang mite ka sutsak ding a, a neihsa khempeuh uh migilote sutsakin, ka ninsak ding hi.

²²Ka biakinn a kinitsak ciangin ka kho kei ding hi. Gutate in ka biakinn luhin ninsak ding uh hi.

²³“Na khuttum uh zial un. Bang hang hiam cih leh gam sungah mi kithahna dim a, khua sungah ngongtatna dim hi.

²⁴Minam gilo pente hong paipihin na innte uh ka luahsak ding hi. Minam dangte in na biakna mun ngeite uh a nitsak ciangin mi thahat-a a kineite’ kimuanna beita ding hi.

²⁵Lungkhamna na tuah uh ciangin lungnopna na zong ding uh a, ahi zongin na mu kei ding uh hi.

²⁶Lungkhamna khat khit khat a banbanin na tuak ding uh a, thusia bekbek na zaza ding uh hi. Kamsangte kiangah thu na dong ding uh hi. Siampite in mite tungah hong hilh ding thu thei lo ding uh a, upate in hong gen ding mel thei lo ding uh hi.

²⁷Kumpipa dahin thum ding a, ulian pen pa a cih nading thei loin omcipin, mi khempeuh lau-in ling ding uh hi. Na gamtatna uh tawh kizui-in gim kong pia ding a, midangte tungah thu na khen bangun note tungah thu kong khen ding hi. Hih bangin kong hih ciangin TOPA ka hih lamtak na thei ding uh hi,” cihna thu ahi hi.