Read Tedim Chin EZEKIEL 8 Bible Online

EZEKIEL 8 - Tedim Chin bible

EZEKIEL 8

¹Salin ka om uh kum guk a phak kum, a kha gukna, a ni nga ni-in sala om Judah makaite tawh ka inn sungah thu genin ka tut laitakun, thakhatin Topa PASIAN’ vangliatna ka sungah hong tum hi.

²Ka khuadak leh, mihing tawh a kibang pian khat ka mu hi. A kawng nuaisiah ding teng meikuang tawh kibang a, a kawng tungsiah ding teng sumsan kinawtngil tawh kibangin san heuhau hi.

³A khut ding tawh a kibang pian khat in hong sawkin ka samin hong man hi. Tua ciangin hih ka maang sungin Pasian’ kha in vanah hong lenpihto-in Jerusalem khuapi hong tunpih hi. Tua lai panin, Pasian a hehsuahna ahi milim a omna mun, biakinn tual sungnung lutna, leilu lam kongpi-ah hong paipih hi.

⁴Kuam sungah ka maang a ka muh bang teekin tua sanah Pasian’ minthanna vang ka mu hi.

⁵Amah in kei kiangah, “Mihing ahi Ezekiel aw, leilu lamah khuadak in,” hong ci hi. Kei zong ka khuadak leh, kongpi kianga biakna tau kiangah, Pasian’ hehsuahna milim ka mu hi.

⁶Tua ciangin amah in, “Mihing ahi Ezekiel aw, amaute’ gamtatnate na mu hiam? Israel mite in a bawl uh a muhdahhuai gamtatnate, ka mun siangtho panin a gamla semsemah kei hong nawhkhiatnate en in. Hihte sangin a mindaihuai zaw nangawn na mu lai ding hi,” a hong ci hi.

⁷Tua ciangin biakinn tual puanung lutna gei-ah hong paipih a, tua lai-ah kulh a vanna mun khat hong lak hi.

⁸Amah in, “Mihing ahi Ezekiel aw, hih kulhpi tovang in,” a hong ci hi. Kei zong kulh ka tovang a, kongkhak khat ka tuak hi.

⁹Tua ciangin amah in, “A sungah tum inla, a muhdahhuai a gamtatnate uh va en in,” hong ci hi.

¹⁰Kei zong a sungah tumin ka khuadak hi. Kawm tung khempeuhah gul lim, adang ganhing ninte lim, le Israel mite’ biak ganhing khempeuh a kisuai ziazua ka mu hi.

¹¹Tua lai-ah Israel minam makai sawmsagih na om a, tuate’ lakah Shafan’ tapa Jaazaniah zong na om hi. Amaute in paknamtui halna kuang khat ciat tawi uh a, paknamtui a kihalna khute van lamah kahto biaibuai hi.

¹²Tua ciangin amah in, “Mihing ahi Ezekiel aw, Israel mite a kimu lo munah a gamtatnate uh tu-in na mu hiam? Amaute in milim a dimna inn sungah biakna a bawl uh hi. Amaute in, ‘TOPA in hong mu lo hi. TOPA in hih gam nusia khinta hi,’ ci-in paulap zong uh hi,” hong ci hi.

¹³Tua ciangin, “Hihte sangin a muhdahhuai zaw a gamtatna uh zong na mu lai ding hi,” hong cithuah lai hi.

¹⁴Tua ciangin leilu lama om biakinn kongpi-ah hong paipih a, Tammuz a cih uh pasian a sihna hangin dahin a kapin a om numeite a hong lak hi.

¹⁵Tua ciangin amah in, “Mihing ahi Ezekiel aw, na mu hiam? Hihte sangin a muhdahhuai zaw na mu lai ding hi,” hong ci hi.

¹⁶Tua ciangin biakinn tual sungnungah hong paipih hi. Tua lai-ah biakinn kongkhak gei, biakna taute le innliim kikal sanah mihing sawmnih le nga khawng na om a, biakna tau nungngatin nisuahna lam nga-in nisuak tung na bia uh hi.

¹⁷Tua ciangin amah in, “Mihing ahi Ezekiel aw, huate na mu hiam? Hih Judah gammite in na muhsa a muhdahhuai a gamtatnate uh tawh lungkim nai lo lai uh a, gam sung khempeuhah ngongtatna dimsak uh hi. Tua banah ka heh semsem nadingin hih bangin gamta uh hi. A siathei tawpin hih bangin kei hong simmawh bawlna hong thei in.

¹⁸Tua ahih manin amaute in ka heh mahmahna thuak ding uh a, amaute zah loin, zong ka khasiat kei ding hi. Amaute in a thaneih tawpun kei kiangah thu hong nget uh hangin amaute’ thungetna ka ngai kei ding hi,” a hong ci hi.