Read Tedim Chin EZEKIEL 9 Bible Online

EZEKIEL 9 - Tedim Chin bible

EZEKIEL 9

¹Tua ciangin Pasian hong kiko a, “Hih khuapi a susia ding no mihingte hong pai unla, na hiam zat ciat ding uh zong hong keng un,” ci-in a sam hi.

²Leilu lam biakinn kongpi pualam panin thakhatin mihing guk hong pai-in hiam khat ciat hong tawi uh hi. Saihadial puan a silh, lai gelhna ding a tawi mi khat tawh zong hong paikhawm uh hi. A vekpi-un sumngo biakna tau gei-ah hong ding uh hi.

³Tua ciangin ama omnasa kherub-te’ tung panin Israel-te’ Pasian’ minthanna vang hong pai-in biakinn kongah hong om hi. Tua ciangin amah in saihadial puan a silh, lai gelhna ding a tawipa samin,

⁴“Jerusalem khuasung khempeuhah pai kawikawi inla, hih khuapi sungah a muhdahhuai gamtatnate a kisepna hangin dahin a lungkham mi khempeuhte’ taltangah ciaptehna va bawl in,” ci-in a sawl hi.

⁵Tua ciangin Pasian in a midangte kiangah, “Khuasung khempeuhah amah va zui unla, mi va that un. Kuamah hinkhawi kei unla, kuamah khasiat kei un.

⁶Puteek, nungak, tangval, numei, naupang dong takin va thatlum un la, ahi zongin a taltangah ciaptehna a nei peuhmah su kei un. Hih ka biakinn mahmah panin kipan pah un,” a cihna ka za hi. Tua ahih manin tua biakinn sungah a ding Israel makaite, kipatna-in a nei pah uh hi.

⁷Tua ciangin amaute kiangah, “Biakinn ninsak un. A tualtengah misi luanghawm dimsak un. Tu-in kipan un,” ci hi. Tua ahih ciangin amaute kuankhia-in khua sungah mi thah ding a kipan uh hi.

⁸Tua bangin mi a kithah laitakin keimah guak ka om hi. Kei zong lei-ah bokin, “Topa PASIAN aw, Jerusalem tungah na hehna hangin Israel mi a omlaisun khempeuh that mangkhin ding na hi hiam?” ci-in ka kiko hi.

⁹Tua ciangin amah in hong dawng a, “Israel mite le Judah mite’ mawhna nak liat mahmah hi. Gam sung khempeuh mi thahna tawh kidimsak uh a, Jerusalem khuapi, siatna namkim tawh kidimsak uh hi. Amaute in, ‘TOPA in i gam susia khin a, TOPA in eite hong mu lo hi,’ ci uh hi.

¹⁰Tua ahih manin amaute ka zah kei ding a, kuamah ka khasiat kei ding hi. Amaute’ gamtatna, amaute’ tung mah ka tusak ding hi,” hong ci hi.

¹¹Tua ciangin saihadial puan silhin lai gelhna a tawi mipa in TOPA’ kiangah thu hong zasakkik a, “Nong sawl bangin ka sem khinzo hi,” hong ci hi.