Read Tedim Chin DANIEL 11 Bible Online

DANIEL 11 - Tedim Chin bible

DANIEL 11

¹Israel a cing vantungmi pen kei hong huhpa le a hong dal pa ahi hi,” a hong ci hi.

²Tua ciangin amah in, “Tu-a na tunga kong gen ding thu, a thuman ahi hi. Kumpi thum in Persia gam uk lai ding a, tua banah a lina hong khang ding hi. Tua pa, a dangteng sangin a hauzaw ding hi. Amah in a hauh penpen laitak le a thahat pen laitakin Grik kumpi a to ding hi.

³Tua ciangin a minthang kumpi khat a hong kilang ding hi. Amah in gam zaipi tak uk ding a, ama thuthu-in a gamta ding hi.

⁴Ahih hangin a thahat pen laitakin a gam hong kitam ding a, khen li a kisuah ding hi. A suan a khakte in ama gam a ukkha kei ding uh hi. Midangte in uk ding uh a, ahi zongin amah zahin vang a neizo kei ding uh hi.

⁵“Egypt kumpipa a hong thahat ding hi. Ahi zongin a galkapmang lianpente khat thahat pen ding a, gam lianzaw a uk ding hi.

⁶Kum sauvei sim khit ciangin Egypt kumpipa in a kipawlkhawm theih nadingin Syria kumpipa le ama tanu a kitengsak ding hi. Ahih hangin tua kipawlkhawmna kip lo ding a, tua numei le a tonpih a silate le a ta le a pasal a kithatlum ding hi.

⁷“A sawt loin tua numei’ behte khat in Syria kumpi sim ding a, a kulhpi sungah tumin amaute a zogawp ding hi.

⁸Amah in amaute’ milim pasian-te le a na manpha ngun le khamte Egypt gamah a pua ding hi. Kum tawmvei sung bek kilemna a om ding hi.

⁹Syria kumpipa in Egypt gam sim ding a, ahih hangin zo zo loin a nungkik ding hi.

¹⁰“Syria kumpipa’ tate, galsim dingin kithawi-in galkap ding mi tampi a kaikhawm ding uh hi. Tua galkapmangte khat thahat diakin tuikhang bang ding a, galte’ kulhpi a luhzo ding hi.

¹¹Egypt kumpipa zong heh mahmahin Syria kumpipa simgawp ding a, a galkapte tampi tak a matsak ding hi.

¹²A galhatna hang le galkap tampi a thahna hangin kisathei mahmah ding a, ahih hangin a gualzo tawntung kei ding hi.

¹³Syria kumpipa khatvei kuankikin a masa sangin galkap a tamzaw a kaikhawm ding hi. A hun kicingta a sak ciangin galkap tampi le galhiam kicing piikpeek tawh a kuankhia ding hi.

¹⁴“Tua hun ciangin mi tampi tak in Egypt kumpipa a lehdo ding uh hi. Daniel’ mipihte ahi, mihoih lo pawlkhat in zong a muhsa uh maangmuhna hangin a lehdo ding uh a, ahih hangin a guallel ding uh hi.

¹⁵Tua ahih ciangin Syria kumpipa in kulhpi tawh a ki-umcih khuapite luhzo-in a la khin ding hi. Egypt galkapte in gal dosuakzo nawn lo ding uh a, galkap thahat pente a thaneem ding uh hi.

¹⁶Galdo zo ding om nawn lo uh ahih manin a galte uh a ututin a gamta ding uh hi. Thuciam Gamah zong lutin a khut sungah tua gam a om ding hi.

¹⁷“Syria kumpipa in a galkap neih khempeuh zangin galsim ding a ngaihsun ding hi. Olno takin a gualzawh theih nadingin a tanu le a galte tensak ding a ngaihsun ding hi. Ahih hangin a tangtungzo kei veve ding hi.

¹⁸Tua khit ciangin tuipi tungtawnin minam dangte sim ding a, tampi tak mah a zo ding hi. Ahih hangin gamdang makai khat in amah zogawp ding a, a minthanna teng a beisak ding hi.

¹⁹Kumpipa a kulhpi a zuankik dingin a gamah hong ciah ding a, ahih hangin gal lel khinta ahih manin amah a beita ding ahi hi.

²⁰“Tua ciangin kumpi dang khat in ama nung hong zuikik leuleu ding a, a gam sung khantoh nadingin phiangsiah tampi a dong dingin mi khat a sawl ding hi. Tawlno khat khit ciangin tua kumpipa kithatlum ding a, ahih hangin galsung a si ahi kei ding hi.

²¹“Ama zomah Syria kumpi ding pen migilo, kumpi dingin a kilawm lo mi khat ahi ding hi. Ahih hangin amah pen thakhat thu-in zuausiamna tawh kumpi a hong suakvat ding hi.

²²Ama thu a nial galkap honpite le Pasian’ siampi liante khempeuh a mangthangsak ding hi.

²³Zuaugen siamna zangin minam dangte tawh kilemna a bawl ding hi. Minam tawmno khat bek a uk hangin a thahatna a khang semsem ding hi.

²⁴Amah in a pu a pate’ hih ngei loh, gam hau, gam kilemte nangawn a sim ding hi. Tua ciangin galsung a a lak vante le nate a nungzuite tawh a hawm ding uh hi. Amah in galdalna kulhpite khempeuh luh ding hanciam ding a, ahih hangin tawmvei sung bek hun a nei ding hi.

²⁵“Egypt gam hangtakin a sim theih nadingin galkap tampi a kaikhawm ding hi. Egypt-te in zong galkap tampi tawh nasia takin a na do ding uh hi. Ahi zongin Egypt kumpipa in khemna thuak ding ahih manin gal a zo kei ding hi.

²⁶Ama muan pen a thudot mipilte in amah lehbawlin a siasak ding uh hi. A galkapte tampi tak si ding ahih manin gal a lel ding hi.

²⁷Tua kumpi tegel in sabuai khat tungah tu-in an a nekhawm ding uh hi. Ahih hangin a ngaihsutna uh a hoih zawsang om tuan lo ahih manin a kikhem tuak ding uh hi. A hun tung nai lo ahih manin a deih bang uh a ngahzo kei uh hi.

²⁸Tua ciangin Syria kumpipa, a galvan lakteng tawh a gamah ciahkik ding a, Pasian mite’ biakna suksiatsak ding a lungngai ding hi. A utbang peuhin gamta ding a, tua ciangin a gam lamah a ciahkik ding hi.

²⁹“Tua nung ciangin Egypt gam simkik leuleu ding a, ahih hangin a masa-a bangin a piang kei ding hi.

³⁰Rom mite, teembaw tawh hong pai-in amah do ding uh ahih manin a lau ding hi. Tua ciangin amah kilehkik ding a, a thangpaihna tawh Pasian’ mite’ biakna suksiat ding a hanciam ding hi. Amah in tua biakna a nusia mite’ zolsimna a mang ding hi.

³¹A galkapte pawlkhat in biakinnpi le biakinnpi huang a ninsak ding uh hi. Amaute in nisim biakpiaknate khawlsak ding uh a, a Lipkhaphuai na a suang ding uh hi.

³²Kumpipa in tua biakna a nusia mite a thuzawh theih nadingin zuaugen siamna a zang ding hi. Ahih hangin Pasian’ nung a zui mite ahih uhleh thahatin a gualzo ding uh hi.

³³Pilna a nei mite in a pilna uh midang tampite tawh a neikhawm ding uh hi. Ahih hangin tawlkhat sung mi pawlkhat in galsung a sihna le meikuang sunga thahna a thuak ding uh hi. Mi pawlkhatte in lawkgawpna le thongkiatna a thuak ding uh hi.

³⁴Tua bangin thahna a thuak laitakun, pawlkhat in huhna a ngah ding uh hi. Mi tampi in huhna a piak uh hangin amau’ meetna ding ngaihsutna bek ahi hi.

³⁵Mi pawlkhat in thahna a thuak ding uh hi. Tua bangin a pianna thu pen beina a tun mateng sianthosakna le mipha le misia khentelna, Pasian’ sehsa hun a tunna ahi hi.

³⁶“Syria kumpipa a ut bangbangin a gamta ding hi. Amah in, pasian-te sangin ka lianzaw a, a Lianpen Pasian sangin zong ka thupizaw lai hi, ci-in a kisathei ding hi. Pasian in amah gim a piak mateng tua bangin a om ding hi.

³⁷Kumpipa in a pu a pate’ biak pasian le numeite in a it pasian a thusim kei ding hi. Pasian a kici peuhmah khat beek a thusim kei ding hi. Bang hang hiam cih leh tuate sangin amah a lianzaw-in a kingaihsun hi.

³⁸Tua pasian-te sangin kulhpi a dal pasian a thupisim zaw ding hi. Amah in kham, ngun, suangmanpha, le a thupi letsongte, a pu a pate’ biak ngei loh pasian kiangah a pia ding hi.

³⁹Amah in a kulhpi a ciang dingin pasian dang a biate a sawl ding hi. Amah in amah kumpi-in a sang mite minphatna, zaliatna pia-in, leitang nangawn letsongin a pia ding hi.

⁴⁰“Syria kumpipa’ hun a bei dektak ciangin, Egypt kumpipa in amah a sim ding hi. Syria kumpipa in a thaneihteng siit loin tuikhang bangin sakol tawh, sakol galkapte tawh, teembaw tampi tawh Egypt a do ding hi.

⁴¹Amah in Thuciamna Gam zong sim ding a, mi tul tampi tak a that ding hi. Ahih hangin Edom gam, Moab gam, le Ammon gam sungah a omlai sunteng a suakta ding uh hi.

⁴²Amah in gam tampi tak sim ding a, Egypt nangawn zong a suakta kei ding hi.

⁴³Amah in Egypt gam sunga kiseel ngun le kham le a neihsa uh na manphateng khempeuh a la ding hi. Amah in Libya le Ethiopia gam zong a zo ding hi.

⁴⁴Tua ciangin, nisuahna lam le saklam panin thupiang in amah patausak ding a, thangpaihna tawh galdo-in mi tampi tak a that ding hi.

⁴⁵Amah in a kumpi puanbuk lianpite biakinn dinna mualtung le tuipi kikalah a lam ding hi. Ahih hangin amah a si ding hi. Bang hang hiam cih leh amah a huh ding kuamah a om kei hi,” a hong ci hi.