Read Tedim Chin DANIEL 2 Bible Online

DANIEL 2 - Tedim Chin bible

DANIEL 2

¹Nebukhadnezzar kumpi a suahzawh a kum nihna kumin mang khat a man hi. A lungsim pataulua mahmah ahih manin a ihmu thei kei hi.

²Tua ahih ciangin bang mang man cih a hilh dingin mitphial siamte, mibum theite, le khongkhai siamte a samsak hi.

³Amaute hong pai-in kumpipa mai-ah a din uh ciangin kumpipa in, “Mang khat ka man a, tua ka mang pen bang hiam cih theinuam ka hih manin ka lungsim a patau mahmah hi,” a ci hi.

⁴Amaute in Aram pau tawh, “Kumpipa aw, na khansau hen! Na mang hong gen leteh a khiatna zong kong gen ding uh hi,” a ci uh hi.

⁵Kumpipa in, “Ka mangmat le a khiatna nong gen theih kei uhleh note kong semnengawp ding a, na inn uh suksiatgawp dingin ka ngaihsun khinzo hi.

⁶Ahi zongin ka mangmat le a khiatna nong gen theih uhleh, letsong le minphatna lianpi ka hong pia ding hi. Tua ahih ciangin tu-in ka mangmat bang hi a, a khiatna bang ahi hiam cih hong gen un,” a ci hi.

⁷Amaute in, “Kumpipa aw, na mang hong gen phot leteh a khiatna ka hong gen thei pan ding uh hi,” ci-in a dawngkik uh hi.

⁸Kumpipa in, “Ka ngaihsutsa teng hong zasak khinzo ka hih manin hun sau theihtheihna ding a zong na hihlam uh teltakin kithei hi.

⁹Ka mangmat nong gen theih kei uhleh note khempeuh thukhenna khat bek ka hong pia ding hi. Noteng khempeuh in lungsim kikhatin zuauthu gengen leeng a ngaihsutna hong kikheel ding hi, a ci nuam na hi tazen uh hi. Tua ahih ciangin ka mangmat hong gen phot un. Tua hileh a khiatna zong hong gen thei ding ci-in ka hong muang pan ding hi,” a ci hi.

¹⁰Khongkhai theite in, “Kumpipa aw, na deihna bang a hong gen thei ding hih leitungah mihing khat beek om lo ding hi. Kumpi gen loh milian pen le mi thupi pen khat beek in, a aisan theite, a mitphial siamte, le a khongkhai theite tungah tua bang thu a dong ngei kuamah om nai lo hi.

¹¹Kumpipa’ thudotna pen haksa lua mahmah ahih manin, mihing ahi lo pasian-te longal a gen thei ding kuamah om lo hi,” a ci uh hi.

¹²Tua thu hangin kumpipa heh mahmah a, Babylon sunga kumpi’ thudot mipilte khempeuh thahlup khit dingin thu a pia hi.

¹³Tua ahih ciangin mipilte khempeuh thahlup khitna ding thu kipia a, tua thahlup dingte sungah Daniel le a lawmte zong a kihel uh ahi hi.

¹⁴Tua ciangin Daniel zong Babylon gam sunga mipilteng a thatlum dingin a kisawl kumpi cing a ukpa Ariok kiangah kampau kidawm takin a va pai hi.

¹⁵Amah in Ariok kiangah, “Bang dingin kumpipa in hih zahtakin thukhauh suaksak ahi hiam?” ci-in a dong hi. Ariok in a thupiang khempeuh a gen hi.

¹⁶Tua ciangin kumpipa kiangah Daniel pai a, a mangmat a khiatna a hilh theih nadingin hun tawmvei sung a kingak lai nadingin phalna a ngen hi.

¹⁷Tua ciangin Daniel a inn-ah ciah a, a thupiangteng khempeuh a lawmte Hananiah, Mishael, le Azariah-te kiangah a ko hi.

¹⁸Amah in, vantung Pasian in eite hong hehpihin, tua thuthukpi genkhia thei-in, Babylon gam sunga mipil dangte tawh thahna i thuakkhawm loh nadingin thu i ngen ding hi, ci-in a gen hi.

¹⁹Tua ciangin tua zan sungin maangmuhna tawh tua thuthukpi Daniel’ tungah kihilh a, amah in vantung Pasian’ min a phat hi.

²⁰“Pasian’ min kiphat tawntung ta hen; amah pilin a vanglian hi.

²¹Amah in hun le khuahunte kheel a, kumpite koihin lah a lakhia hi. Amah in mite tungah pilna le theihna a pia hi.

²²Amah in thuthukpite le thusimte a lakkhia hi. Amah in khuamial sunga kiseelte thei a, khuavak in amah a umcih hi.

²³Nang pen ka pu ka pate’ Pasian na hi a, ka hong phat a, ka hong zahtak hi. Nangmah in pilna le thahatna na hong piazo hi. Ka thungetna nong za a, kumpipa kianga ka gen ding thu nong lakzo hi,” a ci hi.

²⁴Tua ahih ciangin kumpipa in Babylon mipilte a that dingin a sawl pa Ariok kiangah Daniel pai a, “Babylon gam sunga mipilte that kei in. Kumpipa kiangah hong paipih in; tu-in a mangmat a khiatna ka gen ding hi,” a ci hi.

²⁵Tua ciangin Ariok in thakhatin kumpipa kiangah Daniel paipih pah a, “Kumpipa aw, na mangmat a khiatna a hong gen thei ding Jew mi salte khat ka va mu hi,” ci-in a gen hi.

²⁶Kumpipa in Belteshazzar a kici Daniel kiangah, “Ka mangmat bang hi a, a khiatna bang hiam cih hong gen thei ding na hi hiam?” ci-in a dong hi.

²⁷Daniel in, “Kumpipa aw, tua na theihnop thu a hong gen thei ding khongkhai thei, mitphial siam, aisan siam kuamah om lo hi.

²⁸Ahih hangin thusim a lak thei vantungah Pasian khat a om hi. Amah in mai lamah bang thu hong piang ding cih nangmah Nebukhadnezzar kumpipa tungah a hong hilhzo hi.

²⁹Kumpipa na ihmut laitakin mailam a hong piang ding mang khat na man a, thuthukpi a lakkhia Pasian in a piang ding thu a hong lakkholzo hi.

³⁰Tu-in midangte sangin ka pilzawk manin kei tungah tua thu a hong kilak hi loin, Kumpipa in na mangmat a khiatna le na ngaihsut thu na theih nadingin a hong kilak ahi zaw hi.

³¹“Kumpipa aw, na mangin a tee daldal milim lian mahmah khat na mu a, kihtakhuai mahmahin na mai-ah a ding hi.

³²Tua milim lutang pen kham hoih mahmah tawh a kibawl ahi hi. A awm le a bante ngun tawh kibawl a, a gil le a pheite sumngo tawh kibawl hi.

³³A khete sik tawh kibawl a, a khepekte khen khat sik, khen khat tungman kigawm ahi hi.

³⁴Tua banga na et laitakin mualtung panin suangtumpi khat kuama khuk lohin hong tuk a, sik le tungman kigawm milim khete dengtanin a kithehthang hi.

³⁵Thakhatin sik, tungman, sumngo, ngun le khamte kitamnen gawp a, khuakhal lai-a ansi zap bangin a leengmang hi. Huih in leenmang khin ahih manin themkha beek a kimu nawn kei hi. Ahih hangin tua suangtum hong khangkhang a, mual cia hong pha-in leitung khempeuh a dim hi.

³⁶“Na mangmat pen tu-a teng ahi hi. Tu-in a khiatna ka hong gen ding hi.

³⁷Kumpipa aw, kumpi khempeuh lak pan nang a lianpen na hi hi. Vantung Pasian in kumpi-in nang hong koih a, vangliatna, thahatna, le zahtakna a hong pia hi.

³⁸Amah in mi’ tenna leitungteng, ganhingteng le vasate a uk dingin nang a hong koih hi. Tua kham lutang pen nangmah na hi hi.

³⁹Nang’ khit ciangin nang’ kumpi gam sangin a neuzaw kumpi gam adang khat hong piang ding a, tua khit ciangin sumngo ahi kumpi gam a thumna in leitung khempeuh uk ding hi.

⁴⁰Tua khit ciangin kumpi gam lina hong piang ding a, sik bangin a khauh ding hi. Sik in na khempeuh satnenin a gawivui bangin, a masa kumpi gamteng khempeuh a sukham ding hi.

⁴¹A khepek le a khemete khen khat sik le khen khat tungman kigawm ahi na mu hi. Tua pen kumpi gam kikhenthang ding hi, cihna ahi hi. Tungman le sik kigawm ahih mah bangin sik bangin a hoih khopkhat ciang khauhna a nei ding hi.

⁴²A khemete khenkhat sik hi a, a khenkhat tungman ahih mah bangin kumpi gam khenkhat thahatin khenkhat a thahat kei ding hi.

⁴³Sik le tungman kigawm na muh mah bangin tua kumpi gam ukte in kigawm ding hanciamin zileta-in a kimat ding uh hi. Ahih hangin sik le tungman a kimat theih loh mah bangin a kigawm thei kei ding uh hi.

⁴⁴Tua kumpite a maan laitakun vantung Pasian in a bei thei ngei lo ding kumpi gam a hong phut ding hi. Tua kumpi gam kuamah in zo zo lo ding a, tua gam in gamdang khempeuhte zogawpin a kip tawntung ding hi.

⁴⁵Kuama lawn lohpi-in mualtung pan hong tuksuk suangtum in sik, sumngo, tungman, ngun, le kham tawh kibawl milim a denpaih na mu hi. A lian Pasian in mai lamah bang hong piang ding cih Kumpipa tungah a hong hilh ahi hi. Na mangmat pen ahi bang teekteekin kong gen a, a khiatna zong a man bangin kong genzo hi,” a ci hi.

⁴⁶Tua ciangin kumpi Nebukhadnezzar zong Daniel’ mai leilakah kunsukin, Daniel tungah sagawh biakna le a namtui biakpiakna bawl dingin thu a pia hi.

⁴⁷Kumpipa in, “Hih thuthukpi hong genthei na hih manin na Pasian pen thuthuk a lak, pasian khempeuh sung pan a lianpen, kumpite’ tunga Topa ahi hi,” a ci hi.

⁴⁸Tua ciangin kumpipa in Daniel letsong hoih tampi pia a, a za liansak a, Babylon gamteng uksakin, Babylon mipil thudotte a ukpipa dingin a koih hi.

⁴⁹Kumpipa in Daniel’ ngetna mah bangin Shadrak, Meshak, le Abednego-te Babylon gam khen tuamtuamte a uk dingin koih a, Daniel pen kumpi inn sungah a omsak hi.