Read Tedim Chin DANIEL 8 Bible Online

DANIEL 8 - Tedim Chin bible

DANIEL 8

¹Belshazzar kumpi a suahzawh a kum thumna kumin keimah Daniel in a nihveina maang ka mu hi.

²Ka maangmuhna ah thakhatin Elam gam sunga om Susa khuapi kulh sungah a omin ka kingaihsun a, Ulai gun gei-ah ka ding hi.

³Ka khuadaktoh leh gun gei-ah tuutal khat a dingin a om ka mu hi. Amah in a sau mahmah ki nih nei a, a ki po nunung pen a po masa sangin a sauzaw hi.

⁴Tua tuutal in a ki tawh nitumna lam, saklam, le khanglam a si kawikawi ka mu hi. Ama ut bangin kiphasakin gamta ahih manin amah a khozo ding le a thahatna pan a suaktazo ding ganhing khat beek a om kei hi.

⁵A bangci hi ding hiam, ci-in ngaihsun thei loin ka om laitakin nitumna lam panin keeltal khat a hong tai veva hi. Hat lua mahmah ahih manin a khe in lei a sukha kei hi. A mit tegel kikalah a tuampian ki lamdang khat a nei hi.

⁶Ki nih a nei gun gei-a a ding ka muh tuutal kiang a hong phak ciangin a thaneih zahin a si hi.

⁷Hehlua mahmah ahih manin tua tuutal laigawp a, a ki tegel a suktansak hi. Tuutal in nang zo lo ahih manin lei kidenna a, a huhzo ding kuamah a om kei hi.

⁸Tua keeltal a thahatna hong khangto semsem a, ahih hangin a thahat pen laitakin a ki a kitan hi. Tua a ki pona munah a lamdang ki li hong poto kik a, mun tuamtuam a kawk hi.

⁹Tua ki lite lak pan khat’ tungah ki neu dang khat hong po a, khanglam, nisuahna lam, le Thuciamna Gam lamah a vangliatna a lak hi.

¹⁰Vantung galkapte nangawn a dozo zah dong dingin a thahatna hong khangto a, aksi pawlkhatte leitungah lawnkhia-in, a tuancilgawp hi.

¹¹Amah in vantung galkap kumpipa nangawn do-in, ama tunga kipia tawntung biakpiaknate nangawn khawlsakin, biakinnpi biaknate a beisak hi.

¹²Nisim biakpiaknate ah mawhna dim a, biakna man pen leilakah a kipaikhia hi. A sepna peuhpeuhah tua ki thahat mahmah hi.

¹³Vantung mi khat in adang vantungmi khat kiangah thu a dot ka za a, “Hih maangmuhna bang tanvei sawt ding a, a muhdahhuai mawhna in nisim biakpiakna bang tanvei khaktan ding ahi hiam? Vantung galkapte le biakinnpi bang tanvei kituancil ding ahi hiam?” a ci hi.

¹⁴Amah in, “Zingsang le nitak biakpiakna tulnih le zathum vei a cin khit ciangin biakinnpi kipuahkik ding hi,” a ci hi.

¹⁵Keimah Daniel in maangmuhna a khatna thei nuamin ka hanciam hi. Thakhat thu-in mihing mel tawh a kibang khat ka mai-ah a hong ding hi.

¹⁶Ulai gungal panin mihing’ aw khat hong ging a, “Gabriel aw, a muh nate ama kiangah a khiatna hilh in,” a cihna ka za hi.

¹⁷Gabriel hong pai-in ka kiangah hong ding a, laulua mahmah ka hih manin leitungah ka puk hi. Amah in, “Leitung mi aw, a khiatna thei in. Maangmuhna pen hun beina ding lahna ahi hi,” ci-in ka kiangah a hong gen hi.

¹⁸Amah in thu a hong gen laitakin sibupin leilakah ka tuk hi. Ahih hangin amah in hong domto-in a hong dingsak hi.

¹⁹Amah in, “Pasian’ hehna hangin thupiang dingte ka hong lak ding hi. Na maangmuh pen hun beina ding lahna ahi hi.

²⁰Na muh ki nih a nei tuutal pen Media le Persia gam kumpite a cihnopna ahi hi.

²¹Keeltal pen Grik kumpi gam hi a, a mit kikal-a a po ki pen kumpi masa pen a cihnopna ahi hi.

²²Ki po masa pen a kitan khit ciangin a nunga hong po ki lite pen tua gam panin kumpi gam li hong piang ding a cihnopna ahi hi. Ahih hangin tua gamte ahihleh a masa pen kumpi gam zahin a thahat kei ding uh hi.

²³“Tua kumpi gamte a bei ding hun a nai ciangin gilo lua mahmah ding uh ahih manin gim a kipia ding hi. Tua ciangin ama thu bek thu a sa, mawhna pawlpawl tawh a kidim, zuauphuah hat kumpi khat a hong om ding hi.

²⁴Amah thahat mahmah ding a, ahih hangin ama thahatna ahi kei ding hi. Amah in a dipkuathuai siatna piangsak ding a, a hihna khempeuhah a thahat mahmah ding hi. Amah in mi thahatte le Pasian’ mite a susia ding hi.

²⁵A lungsim daplan lua ahih manin zuauphuah siamna tawh a hih khempeuh a tangtun ding hi. Amah kiliansak lua-in theihkholh lohin mi tampi susia-in, a lianpen kumpite’ kumpipa nangawn a langpan’ ding hi. Ahih hangin mihing thahatna kizang loin amah a kisusia ding hi.

²⁶Hih zingsang le nitak biakpiakna maangmuhna thu a hong kihilh telna pen a man ahi hi. Tu-in hih maangmuhna thu a hong tun ding hun sawtpi hi lai ding ahih manin imcip phot in,” hong ci hi.

²⁷Keimah Daniel, ni tawmvei sung thazaw gawpin ka ci a na hi. Tua ciangin tho-in ka nasep ngei a semkik dingin kumpi inn-ah ka pai hi. Ka maangmuhna thu thei zo lo ka hih manin cih nading mel thei loin daptakin ka om hi.