Read Tedim Chin DANIEL 9 Bible Online

DANIEL 9 - Tedim Chin bible

DANIEL 9

¹Media mi ahi Ahasueras’ tapa Darias in Babylon gamteng a uk hi.

²Amah kumpi a suah a kum masa kumin keimah Daniel in, TOPA in kamsang Jeremiah tungah Jerusalem kum sawmsagih sung kisia ding hi, ci-in a genna thu ngaihsunin biakna laibute ka sim hi.

³An ngawlin, puanhampi silhin, vut lakah tu-in, Topa’ kiangah deih takin thu ka ngen hi.

⁴TOPA ka Pasian’ kiangah thu ngenin ka mite’ mawhna ka pulak hi. Keimah in, “Topa Pasian aw, nang na lian a, ka hong zahtak uh hi. Nang na thuman a, na thuciamna le na thupiakna a mangte le a hong itte a tawntungin na it hi.

⁵“Kote ka hih uhleh ka gilo uh a, mawh khinin ka khial khin uh hi. Na hong sawlna bang ka mang kei uh a, na thupiakna le na thukhamte ka taisan khin uh hi.

⁶Ka kumpite uh, ko hong ukte, ka pu ka pate uh, le minam khempeuh tungah na min tawh thu a hong gen na nasem kamsangte’ thu ka ngai kei uh hi.

⁷Topa, nang na hih leh na siangtho a, ahih hangin kote ka hih uhleh a zumhuai-in ka gamta uh hi. Judah gam le Jerusalem khuasunga teng Israel mite khempeuh thuman lo uh ahih manin, a nai a gamla gam tuamtuamah na thehthangzo hi.

⁸Ka kumpite uh, ko hong ukte, le ka pu ka pate uh a zumhuai-in gamta uh a, a hong uk Topa nangma tungah hong khial khin uh hi.

⁹Nang pen hehpihna tawh kidimin mawhna na maisak a, ahih hangin kote in nang ka hong langpan’ uh hi.

¹⁰TOPA Pasian aw, na nasem kamsangte tungtawnin kote’ zuih ding thukhamte nong piak hangin, tua thu ka mang tuan kei uh hi.

¹¹Israel-te khempeuh in na gensa thute le na thukhamte khempeuh a palsat khinzo uh hi. Na tungah khialhna ka hong bawl manun, na nasem Moses’ thukham sunga kigelh bangin kote’ tungah samsiatna a hong tung hi.

¹²Na gensa bangin kote tung le ko hong ukte tungah na hong bawlzo hi. Leitung a om khuapi dang khatpeuh sangin Jerusalem khuapi a nasia zaw-in gim na pia hi.

¹³Moses’ thukham sunga kigen gimna khempeuh ka thuak uh hi. TOPA Pasian aw, tu nangawnin zong nang kong lungdamsakna ding uh hanciam loin, na thuman ka zuih theih nadingun mawhna ka kisik kei uh hi.

¹⁴TOPA Pasian aw, nangmah in kote gim a pia dingin nong kithawi a, na hong pia takpi hi. Bang hang hiam cih leh na hihna khempeuh a thuman hi a, kote in na thu ka hong mang kei uh hi.

¹⁵“Kote’ Topa Pasian aw, na mihingte Egypt gam panin na hong lakhia a, na vangliatna tu dongin kiphawk lai hi. Ka mawh khin uh a, ka khial khin uh hi.

¹⁶Nang na siangtho hi. Tua ahih ciangin Jerusalem tungah hong heh nawn peuhmah kei in. Tua pen na khuapi hi a, na mual siangtho ahi hi. Kote le ka pate uh khialhna le gitlohna hangin, ka kiim ka pam uha mite khempeuh in Jerusalem le na mite a hong simmawh uh hi.

¹⁷Pasian aw, kong thungetna le kong thumna hong za in. A kisiasa na biakinnpi hong puahkik in. Mi khempeuh in nangmah Pasian na hihlam a theihtheih nadingun hong puahkik in.

¹⁸Pasian aw, kong thungetnate uh hong ngai inla hong za in. Hong en inla, kote’ siatna le na min a pua khuapi a siatna hong mu in. Kote’ gamtatna pha a suang hi loin nangma migitna suangin thu ka hong ngen uh hi.

¹⁹TOPA aw, kong thungetna uh hong za inla, ka mawhna uh hong maisak in. TOPA aw, hong ngai inla hong sem in! Mi khempeuh in Pasian na hihlam a hong theih nadingun hong zekai kei in. Hih khuapi le hih mite na neihsa ahi hi,” ka ci hi.

²⁰Keima mawhna le ka mipih Israel-te’ mawhna pulakin, ka TOPA Pasian kiangah a biakinn siangtho a hong puahkik nadingin thumin ka ngenngen hi.

²¹Thu ka nget laitakin ka maangmuh masak sunga ka muh mipa Gabriel, ka omna munah a hong leengsuk hi. Tua hun pen nitak lam biakpiak hun laitak ahi hi.

²²Amah in, “Daniel aw, hilhkholhna thu a theisak dingin a hong pai ka hi hi.

²³Pasian tungah thum dingin na kisak laitakin amah in a hong zazo hi. Pasian in nang hong it ahih manin, tua thu a gen dingin ka hong pai hi. Tu-in, tua maangmuhna thu ka hong hilhtel laitakin ciamteh in.

²⁴“Na mite le khuapi siangtho, a mawhna le a gamtat khialhnate a beina ding hun kum sawmsagih mun sagih sung a kisehzo hi. Tua ciangin mawhna kimaisak ding a, a tawntung thutang thu a hong tung ding hi. Genkholhna le maangmuhna thu a mantakin hong tangtung ding a, a Siangtho Pen Mun biakinnpi kisiansuah ding hi.

²⁵Hih thu ciamteh inla thei in: Jerusalem lamkikna ding thu a kipiak hun a kipan sathau kinilh pa hong pai dong kum sagih mun sagih sung hi ding hi. Jerusalem kongzing lampi nei le kulhpi nei-in kilamkik ding a, kum sawmguk le nih mun sagih sung kip ding a, ahih hangin buai hun sung ahi ding hi.

²⁶Tua hun a bei khit ciangin sathau kinilh pa thuman lopi-in a kithat ding hi. Galsim dingin a hong pai galkapmang lianpa in khuapi le biakinnpi a susia ding hi. A beina pen tuiciin tun bang hi ding a, a tawp dongin galdona le kisiatna vive ahi dingin Pasian in thu a khenzo hi.

²⁷Tua makai pa in mi tampite tawh kum sagih sung thuciamna kip bawl ding uh hi. Gangawh biakna le biakpiakna, hih hunlang sung a khawlsak ding hi. Biakinn dawn sangpen munah a Lipkhaphuai na kikoih ding hi; ahi zongin Pasian in tua a koihpa’ thuak dingin a geelsa thu a koihpa in a thuak hun ciang dong, a Lipkhaphuai na pen a koihna mun mahah omlai phot ding hi,” hong ci hi.